စင်္ကာပူနိုင်ငံ၏ အထိမ်းအမှတ်ဖြစ်သည့် Merlion များအနက် အမြင့်ဆုံးဖြစ်သည့် စင်တိုဆာကျွန်းမှ Merlion ကို ၂၀၁၉ ခုနှစ်၊ အောက်တိုဘာလ (၂၀) ရက်နေ့ နောက်ပိုင်းတွင် ဖယ်ရှားတော့မည်ဖြစ်သော်လည်း မာရီနာကမ်းခြေမှ ရုပ်တုအပါအဝင် စုစုပေါင်း Merlion ရုပ်တုငယ် (၆)ခု ကျန်ခဲ့မည်ဖြစ်သည်။

စင်တိုဆာကျွန်းရှိ ၁၉၉၅ ခုနှစ်က တည်ဆောက်ခဲ့သော အမြင့် (၃၇) မီတာရှိသည့် Merlion ရုပ်တုကို စင်တိုဆာကျွန်း တောင်နှင့်မြောက်ကမ်းခြေကို ဆက်သွယ်မည့် အမေရိကန်ဒေါ်လာ (၆၅.၃) မီလျံတန်ဖိုးရှိ စီမံကိန်းကြောင့် ဖယ်ရှားမည်ဖြစ်ရာ စင်္ကာပူတွင် ကမ္ဘာလှည့်ခရီးသွားအများအပြား အမှတ်တရ ဓါတ်ပုံရိုက်လေ့ရှိသည့် Merlion ရုပ်တု (၂)ခုအနက် မာရီနာကမ်းခြေမှ အမြင့် (၈.၆) မီတာရှိသည့် Merlion တစ်ခုသာ ကျန်တော့မည်ဖြစ်သည်။

Merlion ရုပ်တုများအနက် မာရီနာကမ်းခြေရှိ စင်္ကာပူ၏ ပထမဆုံး Merlion ရုပ်တုကို ၁၉၇၂ ခုနှစ်တွင် စတင်တည်ဆောက်ခဲ့ခြင်းဖြစ်ပြီး အနီးတွင် အမြင့် (၂)မီတာရှိသည့် Merlion ရုပ်တုတစ်ခုလည်းရှိကာ Merlion Park ဟု လူသိများခြင်းဖြစ်သည်။

မာရီနာကမ်းခြေရှိ Merlion ရုပ်တုနှစ်ခုမှာလည်း စတင်တည်ဆောက်စဉ်က မြစ်ဝတွင်ရှိခဲ့ရာမှ တံတားတည်ဆောက်လိုက်ပြီးနောက် မြင်ကွင်းကွယ်သွားသဖြင့် လက်ရှိနေရာဖြစ်သည့် ဖူလာတန်ဟိုတယ်ရှေ့သို့ ၂၀၀၂ ခုနှစ်တွင် ရွှေ့ပြောင်းထားခဲ့ခြင်းဖြစ်သည်။

စင်္ကာပူ၏ အမှတ်တံဆိပ်အဖြစ် လူသိများနေသည့် ခြင်္သေ့ခေါင်းနှင့် ငါးခန္ဓာကိုယ်ဆက်ထားသည့် Merlion ပုံစံကို ၁၉၆၄ ခုနှစ်တွင် ဗြိတိန်သတ္တဗေဒပညာရှင် အဲလစ်ဖရေဆာဘရူနာက စင်္ကာပူခရီးသွားလုပ်ငန်းမြှင့်တင်ရေးအဖွဲ့အတွက် ရေးဆွဲပေးခဲ့ခြင်းဖြစ်ပြီး ရုပ်တုအောက်ပိုင်းရှိ ငါးခန္ဓာကိုယ်မှာ တံငါရွာလေးအဖြစ် အစပြုခဲ့သည့် စင်္ကာပူကို ကိုယ်စားပြုကာ ခြင်္သေ့ခေါင်းမှာ စင်္ကာပူကျွန်းကို ခြင်္သေ့မြို့တော်ဟု အမည်ပေးခဲ့ခြင်းကို ကိုယ်စားပြုခြင်းဖြစ်သည်ဟု သိရသည်။

Tachileik News Agency
Ref: TimeOut