ရှမ်းပြည်နယ် (အရှေ့ပိုင်း) တာချီလိတ်မြို့ မဟာမြတ်မုနိဘုရားကြီးကျောင်းတိုက်အတွင်း ညအိပ် ရပ်နားထားသည့် မော်တော်ယာဉ်များအား ပိုင်ရှင်များအနေဖြင့် လာရောက်ဖယ်ရှားပေးရန်နှင့် ဆရာတော်၏ အန္တိမအဂ္ဂိဈာပနကျင်းပမည့် ၂၀၁၉ ခုနှစ်၊ အောက်တိုဘာ (၃၀) ရက်နေ့အထိ ယာဉ်ရပ်နားခြင်းမပြုကြရန် ဂေါပကအဖွဲ့က မေတ္တာရပ်ခံနေသည်ကို တွေ့ရသည်။

"ကျောင်းဝင်းအတွင်းမှာ ညအိပ်ရပ်ထားတဲ့ကားတွေက ပိုင်ရှင်ဘယ်သူတွေမှန်းလည်း မသိဘူး။ ညအိပ်ထားတာ လချီနေပြီ။ မနက်ဖြန်ကစပြီး (၃၀) ရက်နေ့ထိ ဒီမှာက လုံးဝလာရပ်လို့ မရတော့ဘူး။ ရပ်ကွက်အုပ်ချုပ်ရေးမှူးတွေကနေလည်း အသိပေးခိုင်းထားတယ်။ နောက် အောက်တိုဘာ (၃၀) ရက်နေ့ကတော့ မနက် (၄) နာရီကနေစပြီး ကျောင်းဝင်းထဲကနေ မော်တော်ယာဉ်တွေ ဖြတ်လို့မရဘူး။ ကျောင်းဘေးက လမ်းမကြီးကတော့ သွားလို့ရတာပေါ့။ ကျောင်းဝင်းပတ်လည်မှာလည်း ကားတွေ ရပ်လို့မရဘူး။ ကျောင်းကိုလာတဲ့ကားတွေက ရွှေတိဂုံဘုရားပေါ်မှာ ရပ်လို့ရတယ်။ ဆောက်လုပ်ရေးဝင်းထဲ ရပ်လို့ရမယ်။ ရှမ်းရိုးမကွင်းထဲ ရပ်လို့ရတယ်။ ကျောင်းကိုတော့ လမ်းလျှောက်လာရမှာပေါ့"ဟု အမျိုးသားလွှတ်တော်ကိုယ်စားလှယ် ဦးစိုင်းလုံစံခတ်က တာချီလိတ်သတင်းအေဂျင်စီသို့ ပြောသည်။

မဟာမြတ်မုနိကျောင်းတိုက်ဝင်းအတွင်း မော်တော်ယာဉ်များ လာရောက်ရပ်နားထားလေ့ရှိပြီး မော်တော်ယာဉ် အချို့မှာ လနှင့်ချီ၍ လာရောက်ထားရှိရာ ဆရာတော်၏ အန္တိမအ၈္ဂိဈာပနအခမ်းအနား ပြင်ဆင်ရာတွင် အနှောင့်အယှက်ဖြစ်နေရသဖြင့် အောက်တိုဘာလ (၂၄)ရက်နေ့မှစ၍ လာရောက်ဖယ်ရှားပေးပါရန် ရပ်ကွက်အုပ်ချုပ်ရေးမှူးများက ရပ်ကွက်အတွင်း အသိပေးထားသည်ဟု သိရသည်။

ဆရာတော်၏ အန္တိမအဂ္ဂိဈာပနအတွက် အစမ်းလေ့ကျင်မှုကို အောက်တိုဘာ (၂၆) ရက်နေ့တွင် ပြုလုပ်မည်ဖြစ်ကြောင်း သိရသည်။

မဟာမြတ်မုနိဘုရားကြီးကျောင်းတိုက် ဆရာတော်၏ အန္တိမအဂ္ဂိဈာပနကို ၂၀၁၉ ခုနှစ်၊ အောက်တိုဘာ (၃၀) ရက်နေ့တွင် မြို့မသုဿန်သစ်(ပုံလို့) တွင် ကျင်းပပြုလုပ်မည်ဖြစ်ရာ အနယ်နယ်အရပ်ရပ်မှ ပရိတ်သတ် သိန်းဂဏန်းအထိ လာရောက်မည်ဟု ခန့်မှန်းထားသဖြင့် သုဿန်သို့သွားရာ တောင်တက်လမ်းတွင် ယာဉ်ကြောပိတ်ဆို့နိုင်သဖြင့် တောင်ခြေတွင် မော်တော်ယာဉ် ရပ်နားကွင်း စီစဉ်ပေးထားကာ တောင်ပေါ်သို့ ကြို၊ ပို့ယာဉ်များဖြင့်သာ တက်ရောက်ရမည်ဖြစ်ကြောင်း သိရသည်။

Tachileik News Agency
သတင်း၊ဓါတ်ပုံ #ဟန်စိုးထိုက်