ရှမ်းပြည်နယ်အရှေ့ပိုင်းဒေသရှိ အာခါ၊ လားဟူ၊ ဝနှင့် ရှမ်းတိုင်းရင်းသားများ၏ ကောက်သစ်စားပွဲများကို အောက်တိုဘာလလယ်မှ စတင်ကာ ကျေးရွာများအလိုက် ကျင်းပလျှက်ရှိရာ ၂၀၁၉ ခုနှစ်၊  နိုဝင်ဘာလ (၂)ရက်နေ့တွင် ကျိုင်းတုံမြို့ရှိ ဖားရံနွဲ့ကျေးရွာ နှစ်ခြင်းခရစ်ယာန်ဘုရားကျောင်း၌ ကောက်သစ်စားပွဲ ကျင်းပသည်။

ရှမ်းပြည်နယ်အရှေ့ပိုင်းဒေသရှိ ခရစ်ယာန်ဘာသာဝင် အာခါ၊ လားဟူ၊ ဝနှင့် ရှမ်းတိုင်းရင်းသားများသည် အောက်တိုဘာလလယ်မှစ၍ ဒီဇင်ဘာလအစောပိုင်းကာလများအထိ  သီးနှံများရိတ်သိမ်းပြီးချိန်၌ ကျေးရွာလူကြီးများက သင့်တော်မည့် နေ့ရက်ကို ရွေးချယ်၍ ကျေးဇူးတော်ချီးမွမ်းရာနေ့အဖြစ် သတ်မှတ်ကာ ကောက်သစ်စားပွဲများကို ကျင်းပလေ့ရှိခြင်းဖြစ်သည်။

ကောက်သစ်စားပွဲကျင်းပရာတွင် ယခုနှစ်တွင် ထွက်ရှိသော သီးနှံများအတွက် ဘုရားကျောင်းများ၌ ကျေးဇူးတော် ချီးမွမ်းခြင်း၊ ဧည့်ပရိတ်သတ်များကို ဖိတ်ကြား၍  ယခုနှစ်တွင် စိုက်ပျိုးရရှိသော ဆန်အသစ်နှင့် ရိုးရာဟင်းများဖြင့် ဧည့်ခံကျွေးမွေးခြင်း၊ စိုက်ပျိုးရရှိသည့် သီးနှံအသစ်များကို လက်ဆောင်ပေးခြင်းများအပြင် အချို့ကျေးရွာများတွင် ဖျော်ဖြေရေးပွဲများလည်း ထည့်သွင်းကျင်းပလေ့ရှိခြင်းဖြစ်သည်။

ကောက်သစ်စားပွဲကျင်းပသည့် ကျိုင်းတုံမြို့ရှိ ဖားရံနွဲ့ကျေးရွာမှာ လူထုအခြေပြုခရီးသွားလုပ်ငန်း ဖေါ်ဆောင်ရေးအတွက် ပြင်ဆင်နေခြင်းဖြစ်ပြီး လိုအပ်သည့် လမ်းပန်းဆက်သွယ်ရေးနှင့် လျှပ်စစ်မီးသွယ်တန်းနိုင်ရေးကို ကျိုင်းတုံမြို့မှ ပြည်နယ်လွှတ်တော်ကိုယ်စားလှယ် ဒေါက်တာဝဏ္ဏစိုးက (၁၁) ကြိမ်မြောက် ပြည်နယ်လွှတ်တော်အစည်းအဝေး၌ တင်ပြတောင်းခံခဲ့ရာ ၂ဝ၁၉- ၂၀၂ဝ ဘဏ္ဍာနှစ်တွင် ကျောက်ချောလမ်း ရမည်ဖြစ်ပြီး လျှပ်စစ်မီးသွယ်တန်းရေးအတွက်လည်း ၂ဝ၁၈-၁၉ ဘတ်ဂျက်တွင် ခွင့်ပြုထားခြင်းဖြစ်သည်။

သတင်း #ဇွဲမြတ်
ဓါတ်ပုံ - Dr.Wunna Soe