ကျောက်မဲတွင် (၇၃)နှစ်မြောက် အာဇာနည်နေ့အခမ်းအနားကို ဌာနဆိုင်ရာများက လူအနည်းငယ်ဖြင့် ကျင်းပပြီး အထိမ်းအမှတ် သစ်ပင်စိုက်
COVID 19 ကာကွယ်ရေးအတွက် လူစုလူဝေးမဖြစ်စေရန် ရှမ်းပြည်နယ် ( မြောက်ပိုင်း ) ကျောက်မဲမြို့တွင် (၇၃)နှစ်မြောက် အာဇာနည်နေ့ အလေးပြုခြင်း အခမ်းအနားကို ၂၀၂၀ ခုနှစ်၊ ဇူလိုင်လ (၁၉)ရက်နေ့၌ ဗိုလ်ချုပ်အောင်ဆန်းပန်းခြံတွင် ဌာနဆိုင်ရာများသာပါဝင်သည့် လူအနည်းငယ်ဖြင့် ကျင်းပသည်။
ကျောက်မဲမြို့၊ မြို့အဝင်မုခ်ဦးအနီး၊ ဗိုလ်ချုပ်အောင်ဆန်းပန်းခြံရှိ ဗိုလ်ချုပ်အောင်ဆန်းရုပ်တုရှိ ရာ ပြည်သူ့ရင်ပြင်၌ ဇူလိုင်လ ( ၁၉ ) ရက်နေ့၊ နံနက် ( ၈ ) နာရီမှစ၍ တစ်ဦးနှင့်တစ်ဦး ( ၆ ) ပေစီခြားကာ အာဇာနည်ခေါင်းဆောင်ကြီးများအတွက် လွမ်းသူ့ ပန်းခွေများ ချထားခြင်းတို့ ပြုလုပ်ခဲ့ပြီးနောက် အလေးပြုခဲ့ကြခြင်းဖြစ်သည်။
(၇၃) နှစ်မြောက် အာဇာနည်နေ့ အခမ်းအနားသို့ ကျောက်မဲရှိ ခရိုင်၊ မြို့နယ် အဆင့်ဌာနဆိုင်ရာများ၊ လူမှုကူညီရေး အသင်းအဖွဲ့များမှ တစ်သင်းလျှင် နှစ်ဦးစီဖြင့် ပါဝင်တက်ရောက်ခဲ့ခြင်း ဖြစ်ပြီး အထိမ်းအမှတ်အနေဖြင့် ပြည်ထောင်စုလမ်းမကြီးနံဘေးတွင် သစ်ပင်အချို့လည်း စိုက်ပျိုးခဲ့ကြသည်။
Tachileik News Agency
သတင်း/ဓါတ်ပုံ - နေဖြိုးမြင့်
