လောင်းကစားလုပ်ငန်းနှင့် ဒုစရိုက်မှုများ ပေါများသည့် တာချီလိတ်မြို့တွင် ဆိုင်ကယ် Taxi သမားတစ်ဦး သတ်ခံရမှု ဖြစ်ပွားပြီးနောက် မြို့တွင်းရှိ လောင်းကစား ဂိမ်းခုံများအနက် အချို့လောင်းကစားဂိမ်းခုံကို ၂၀၂၅ခုနှစ် ဇန်နဝါရီလ(၂၀)ရက်နေ့တွင် တာချီလိတ်ရဲတပ်ဖွဲ့က ဝင်ရောက် စစ်ဆေးမှုများ လုပ်ပြုလုပ်ကြောင်း သိရသည်။
"တာချီလိတ်မြို့ပေါ် အခုရက်ပိုင်း ငါးဂိမ်းခုံတွေမှာ လှည့်ကင်းရဲတွေ ဝင်ဝင်စစ်နေတာတွေ့ရတယ်။ ဖမ်းတာ ဆီးတာတော့ မဟုတ်ပါဘူး။ ဝင်စစ်တဲ့သဘောမျိုးပဲ ဘုရင့်နောင်ပုဂ္ဂလိကဈေးနားက နေရာရယ်။ ဆန်ဆိုင်း(ခ)ရပ်ကွက်ထဲက ဂိမ်းခုံအချို့ရယ် အဲ့နေရာတွေကို ဝင်စစ်တယ်။ နေ့ခင်းဘက် စစ်တာ။ အခုလို ဝင်စစ်ရုံစစ်တာမျိုးဆိုတော့ ဒါတွေကို သူတို့က ခွင့်ပြုပေးထားလို့ဆိုတာ အရှင်းကြီးပဲ မဟုတ်လား။ ပြည်နယ်ရဲတပ်ဖွဲ့မှူး(ကျိုင်းတုံ)ရဲ့ ရဲမှူးကြီး သန့်ဇင်ကရော တာချီလိတ်အခြေအနေမှန်ကို သိရဲ့လား မသိဘူးလားတော့မသိဘူး။ သူ့အောက်က လူတွေကတော့ ဖြစ်ချင်တိုင်း ဖြစ်နေတယ်"ဟု အမည်မဖော်လိုသည့် သတင်းရင်းမြစ်တစ်ဦးက Tachileik News Agency သို့ ဇန်နဝါရီလ(၂၁)ရက်နေ့တွင် ပြောသည်။
ထိုသို့ စစ်ဆေးမှုအတွင်း လူငယ်တစ်ဦးကို ဖမ်းဆီးခေါ်ဆောင်သွားကြောင်းလည်း သိရသည်။
"ဟုတ်တယ်ဗျ မနေ့က ဂိမ်းခုံအချို့ကို ဝင်စစ်ကြတယ်။ ဘုရင့်နောင်ဈေးဘက်က ဂိမ်းခုံကို ဝင်စစ်ရင်းနဲ့ လူအများကြီးထဲမှာမှ ကောင်လေးတစ်ယောက်ကို လက်ထိပ်ခတ်ပြီး ဖမ်းခေါ်သွားတယ်။ ဖမ်းခံရတဲ့ ကောင်လေးက အောင်ကိုလို့ သိရတယ်"ဟု အမည်မဖော်လိုသည့် ဒေသခံ တစ်ဦးက ပြောသည်။
တာချီလိတ်မြို့တွင် ယခုရက်ပိုင်းတွင် နေ့ပိုင်း၌ လောင်းကစား ဂိမ်းခုံများအနက် အချို့နေရာများကို ဝင်စစ်သလို ညပိုင်းတွင်လည်း ကင်းလှည့်ကာ ရှောင်တခင် စစ်ဆေးမှုများ ပြုလုပ်နေကြောင်း သိရသည်။
တာချီလိတ်မြို့တွင် ၂၀၂၅ခုနှစ် ဇန်နဝါရီလ(၁၆)ရက်နေ့က အမျိုးသားတစ်ဦး လောင်းကစားရှုံး၍ လိုအပ်သည့် ငွေအတွက် ဆိုင်ကယ် Taxi သမားတစ်ဦးကို သတ်ပြီး ဆိုင်ကယ် လုယူသည့် ဖြစ်စဉ် ဖြစ်ပွားပြီးနောက် တာချီလိတ်ရဲတပ်ဖွဲ့က လောင်းကစားဂိမ်းခုံ အချို့ကို လိုက်လံ စစ်ဆေးခြင်း ဖြစ်ကြောင်း သိရသည်။
