တာချီလိတ်မြို့တွင် ယာဉ်ကြောပိတ်ဆို့မှုများဖြစ်ပေါ်လေ့ရှိသည့် လမ်းများအနက် မြန်မာ - ထိုင်း အမှတ်(၁) ချစ်ကြည်ရေးတံတား အနီးရှိ ရွှေနန်းတော် အ၀င်လမ်း(ယုဇနလမ်း)အား သြဂုတ်လ(၃၁)ရက်နေ့က စတင်ပြီး တစ်လမ်းမောင်းအဖြစ် သတ်မှတ်လိုက်ရာ ယနေ့ စက်တင်ဘာလ(၁)ရက်နေ့ဆိုလျှင် (၂)ရက်ပြည့်ပြီ ဆိုသော်လည်း အဆိုပါ လမ်းအား တစ်လမ်းမောင်းအဖြစ် မသိရှိသေးသူ တော်တော်များများ ရှိနေတာကို တွေ့ရှိရသည်။
"တစ်လမ်းမောင်း သတ်မှတ်လိုက်တာ မသိသေးတဲ့ လူတွေတော်တော်များများရှိနေသေးတယ်၊ သူတို့ကလည်း ယာဉ်ထိန်းတွေ စောင့်ကြပ်နေချိန်ပဲ လိုက်နာကြတယ်၊ ယာဉ်ထိန်းတွေ မရှိတဲ့အခါဆို ကျွန်တော်တို့က လှမ်းအော်ပြီး ဆိုင်ကယ် ဒီဘက်ကို တက်လာလို့ မရဘူး၊ တစ်လမ်းမောင်း ဖြစ်သွားပြီလို့ အသိပေးပြောလည်း မရဘူးဗျာ၊"ဟု အမှတ်(၁)တံတား ထိပ်ရှိ တက္ကစီသမား တစ်ဦးက တာချီလိတ်အွန်လိုင်းသို့ ပြောရှာသည်။
ထိုကဲ့သို့ တစ်လမ်းသွားအဖြစ် သြဂုတ်လ(၃၁)ရက်နေ့က သတ်မှတ်လိုက်ပြီးနောက် စက်တင်ဘာလ (၆)ရက်နေ့အထိ ဒဏ်ကြေးကောက်ခံခြင်းမပြုဘဲ ပညာပေးကာလအဖြစ်သာ ဆောင်ရွက်သွားမှာဖြစ်ပြီး ပညာပေးကာလ ကျော်လွန်သွားပါက တရားရုံးတွင် ဒဏ်ငွေဆောင်သည့် ဒဏ်ရိုက်မှုမျိုး ပြုလုပ်သွားမှာ ဖြစ်ကြောင်း ယာဉ်ထိန်းရဲတစ်ဦး၏ ပြောပြချက်အရ သိရသည်။
တစ်လမ်းသွားလမ်းနှင့် ပတ်သက်၍ အ၀င်အဖြစ် ရွှေနန်းတော် အ၀င်လမ်း(ယုဇနလမ်း)ကို သတ်မှတ်ထားပြီး အထွက်လမ်းအဖြစ် အလူရာဟိုတယ်လမ်းကို သတ်မှတ်ထားရှိသည်။
