...................

တာချီလိတ်၊ မေလ(၈)ရက်
ရှမ်းပြည်နယ်အရှေ့ပိုင်း တာချီလိတ်မြို့တွင် စားသောက်ဆိုင်များနှင့် ဟိုတယ်များအနဖြေင့် ပြေစာများတွင် ကုန်သွယ်လုပ်ငန်းခွန် တံဆိပ်ခေါင်းများ ကပ်နှိပ်ခြင်း မရှိသည့်အတွက် တာချီလိတ်မြို့နယ် အခွန်ဦးစီးဌာနမှ သတိပေးပြောဆိုလိုက်ကြောင်း သိရသည်။

"ဒီကလုပ်ငန်းရှင်တွေက ကုန်သွယ်လုပ်ငန်းခွန် တံဆိပ်ခေါင်းတွေကို ပြေစာတွေမှာ မကပ်တာပဲရှိတယ်။ သူတို့ဟာသူတို့ စိုက်ပြီးဆောင်နေတဲ့ သဘောရှိတယ်။ ဒီလို မကပ်တာတွေ့ရင် သတင်းပေး တိုင်တန်းခွင့်ရှိတယ်။ သတင်းပေးတိုင်တန်းတဲ့ သူကို ဆုကြေးချီးမြှင့်ရမယ်လို့ ဥပဒေမှာ ပါရှိပါတယ်။ ပြီးရင် လာရောက် တိုင်တန်းသူကို အစိုးရကိစ္စမှတစ်ပါး ဖော်ထုတ်ပြောဆိုခွင့်မရှိဘူး။ ဒါကြောင့် လုပ်ငန်းရှင်များအနေနဲ့ ကုန်သွယ်လုပ်ငန်းခွန် တံဆိပ်ခေါင်းများကပ်နှိပ်ကြပါ "ဟု တာချီလိတ်မြို့နယ် အခွန်ဦးစီးဌာနမှူးရုံးမှ လက်ထောက်ညွှန်ကြားရေးမှူး ဦးတိုးလှိုင်က ပြောသည်။

လစဉ် အခွန်ဦးစီးဌာနသို့ ပြေစာအမှတ်တံဆိပ် လာထုတ်လျှက်ရှိရာ ၂၀၁၅- ၂၀၁၆ ခုနှစ်တွင် ပြေစာအမှတ် တံဆိပ် ကပ်နှိပ်ရောင်းချခြင်းမှရရှိသည့်အခွန်ငွေ ကျပ်သန်းပေါင်း(၁၄၇)ခန့်ရှိကြောင်း၎င်းထံမှ သိရသည်။

ပြေစာများတွင် ကုန်သွယ်လုပ်ငန်းခွန် တံဆိပ်ခေါင်းများ ကပ်နှိပ်ခြင်းမရှိပါက ပထမအကြိမ် ပျက်ကွက်ခြင်း အတွက် ကျပ်(၂)သိန်း၊ ဒုတိယအကြိမ် ပျက်ကွက်ခြင်းအတွက် ကျပ်(၅)သိန်း၊ တတိယအကြိမ် ပျက်ကွက်ခြင်း အတွက် ကျပ်(၇)သိန်း၊ တတိယအကြိမ်နှင့် အထက်ပျက်ကွက်ခြင်းအတွက် တစ်ကြိမ်လျှင် ကျပ်(၁၀)သိန်းထိ ဒဏ်ငွေပေးဆောင်ရမည်ဖြစ်ကြောင်း သိရသည်။

"ဒီမှာက ဘတ်နဲ့ရှင်းတာ။ ပြေစာအမှတ်တံဆိပ်ကကျတော့ ကျပ်နဲ့။ဒီတော့ ကျသင့်ငွေကို (၃၅)ကျပ်နဲ့မြှောက် (၂၀)နဲ့တစ်ခါစား ကျသင့်တဲ့ တံဆိပ်ခေါင်းကိုကပ်ဆိုတော့ သိပ်မကပ်ကြတော့ဘူး။ ဒီတော့ ဒီကိစ္စကို တိုင်တန်းတဲ့သူ ရှိလာခဲ့ရင် ကျွန်တော်တို့ကတော့ အရေးယူဆောင်ရွက်ပေးရမှာဖြစ်တဲ့ အတွက် လုပ်ငန်းရှင်တွေကို သတိပေးတာပါ။"ဟု မြို့နယ်အခွန်ဦးစီးဌာနမှူးရုံးမှ လက်ထောက် ညွှန်ကြားရေးမှူး ဦးတိုးလှိုင်က ပြောသည်။

"ကျွန်မတို့ အနေနဲ့ ပြေစာပေါ်မှာ ကုန်သွယ်လုပ်ငန်းခွန် တံဆိပ်ခေါင်း ကပ်နှိပ်ပေးလိုက်တာတွေမှာ၊ ကပ်နှိပ်ပေးလိုက်တာပဲ ရှိတယ်။ အဆင်မပြေဘူး။ စားသုံးသူနားက ကောက်လို့မရဘူး၊ အဲ့လို ကုန်သွယ်အခွန် တံဆိပ်ခေါင်း ကပ်ပေးလိုက်ပြီး ကောက်ရင် အဆဲခံရတာရှိသလို၊ မလာချင်ကြတော့ တာတွေလည်း ရှိတယ်၊ နင်တို့ဆိုင် လာစားတာတောင် ငါတို့က အခွန်ဆောင်ရသေးတာလား ဆိုပြီး ပြောတာတွေလည်းရှိတာပေါ့။ ဒီကိစ္စနဲ့ ပတ်သက်ပြီး စားသုံးသူတွေ နားမလည်တာတွေ များနေသေးတယ်၊ တာချီလိတ်မှာ ဘယ်ဆိုင်မှ အဲ့လို မလုပ်နိုင်သေးဘူး၊ လက်ရှိမှာတော့ ကျွန်မတို့လို စားသောက်ဆိုင်တွေအနေနဲ့ သဘောတရားအရသာ ကပ်ပေးလိုက်ရသလိုပဲ ဖြစ်နေတယ်"ဟု ပုန်းထွန်ရပ်ကွက်ရှိ စားသောက်ဆိုင်ပိုင်ရှင် အမျိုးသမီးတစ်ဦးက ဆိုသည်။

၂၀၁၆ခုနှစ် ပြည်ထောင်စု၏ အခွန်အကောက်ဥပဒေမှာ ၂၀၁၆ ခုနှစ် ဧပြီလ(၁)ရက်နေ့မှ စတင်ကာ အကျိုးသက်ရောက်ခြင်းဖြစ်ပြီး အခွန်ကျသင့်မည့် လုပ်ငန်းများအဖြစ် (က)ကုန်စည်ထုတ်လုပ်ရောင်းချခြင်း၊ (ခ)ကုန်စည်တင်သွင်းခြင်း၊ (ဂ)ကုန်သွယ်မှုဆောင်ရွက်ခြင်း၊ (ဃ)ဝန်ဆောင်မှုဆောင်ရွက်ခြင်း စသည့်လုပ်ငန်းများ ပါဝင်ခြင်းဖြစ်သည်။

ကုန်သွယ်လုပ်ငန်းခွန်မကျသင့်စေသည့်ကုန်စည်အမျိုးအစားများမှာ ၂၀၁၅ ခုနှစ် ပြည်ထောင်စု အခွန်အကောက်ဥပဒေအရ (၇၉)မျိုးမှ၂၀၁၆ ခုနှစ် ပြည်ထောင်စု အခွန်အကောက်ဥပဒေတွင် (၈၆)မျိုးထိတိုးလာပြီး ကုန်သွယ်လုပ်ငန်းခွန် မကျသင့်စေသည့် ဝန်ဆောင်မှုလုပ်ငန်းများတွင် ၂၀၁၅ ခုနှစ်ပြည်ထောင်စုအခွန်အကောက်ဥပဒေအရ (၂၃)မျိုးမှ ၂၀၁၆ ခုနှစ်ပြည်ထောင်စု အခွန်အကောက် ဥပဒေအရ (၂၉)မျိုး အထိရှိလာခဲ့ခြင်းဖြစ်သည်။

သတင်း။ ဇွဲမြတ်