ကျိုင်းတုံ၊ မေလ(၁၉)ရက်
ရှမ်းပြည်နယ် (အရှေ့ပိုင်း)ရှိ အကျဉ်းထောင်များတွင် နိုင်ငံရေးအကျဉ်းသားနှင့် နိုင်ငံရေးပြစ်မှုနှင့် တရားစွဲဆိုခံထားရသူများမရှိကြောင်း ရှမ်းပြည်နယ်ဒုတိယရဲတပ်ဖွဲ့မှူး ရဲမှူးကြီးထွန်းဦးက ပြောကြားလိုက်သည်။

"ဟိုးအရင်တုန်းကတော့ နိုင်ငံရေးအကျဉ်းသားတွေကို ဒီဘက်တွေမှာ ထောင်ပြောင်းရွှေ့ ခံရတာတွေရှိတယ်။ ကိုမင်းကိုနိုင်တို့ ဆိုရင်လည်း ဒီဘက်တွေကို ပြောင်းရွှေ့ခံရဖူးတယ်။ အခုတော့ ရှမ်းအရှေ့ တစ်ခုလုံးမှာ နိုင်ငံရေးအကျဉ်းသားရော နိုင်ငံရေးပြစ်မှုတွေနဲ့ တရားစွဲဆိုခံထားရတဲ့ သူတွေမရှိပါဘူး"ဟု ရှမ်းပြည်နယ် ဒုတိယရဲတပ်ဖွဲ့မှူး ရဲမှူးကြီးထွန်းဦးက ပြောသည်။

ရဲတပ်ဖွဲ့၏ ရက်(၁၀၀) စီမံချက်တွင် နံပါတ်(၃)အချက်အနဖြေင့် နိုင်ငံရေးအကျဉ်းသားများနှင့် နိုင်ငံရေးပြစ်မှုများနှင့် တရားစွဲဆိုခံထားရသူများကို လုပ်ထုံးလုပ်နည်းများနှင့်အညီ လွှတ်ပေးရမည်ဟု ပါရှိသော်လည်း ရှမ်းပြည်နယ်အရှေ့ပိုင်းရှိ ကျိုင်းတုံမြို့အကျဉ်းထောင်နှင့် မိုင်းဆတ်မြို့ အကျဉ်းထောင်တို့တွင် လွှတ်ပေးရန် နိုင်ငံရေးအကျဉ်းသားမရှိခြင်းဖြစ်ကြောင်း သိရသည်။

"ရှမ်းအရှေ့မှာ အဖြစ်များဆုံး အမှုက မူးယစ်ဆေးဝါးအမှုတွေပါ။ မူးယစ်ဆေးဝါးနဲ့ ပတ်သက်ပြီးတော့ မူးယစ်ဆေးဝါး သုံးစွဲမှု၊ လက်ဝယ်ထားရှိမှု၊ ဖြန့်ဖြူးရောင်းချမှု ဒါတွေပါ ပါတယ်။ "ဟု ရှမ်းပြည်နယ် ဒုတိယရဲတပ်ဖွဲ့မှူး ရဲမှူးကြီးထွန်းဦးက ပြောသည်။

ရှမ်းပြည်နယ် အရှေ့ပိုင်းတွင် နိုင်ငံရေးအကျဉ်းသား၊ နိုင်ငံရေးပြစ်မှုဖြင့် တရားစွဲဆိုခံရမှု၊ မတရားအသင်း အက်ဥပဒေပုဒ်မ – ၁၇(၁)ဖြင့် တရားစွဲဆိုခံရမှုများ မရှိကြောင်းလည်း၎င်းထံမှ သိရသည်။

ရှမ်းပြည်နယ်အရှေ့ပိုင်းတွင် ရှိသော အကျဉ်းထောင်(၂)ခုအနက် ကျိုင်းတုံအကျဉ်းထောင်တွင် အကျဉ်းသားပေါင်း (၁၆၅၀)နှင့် မိုင်းဆတ်အကျဉ်းထောင်မှာမူ ယခုလက်ရှိတွင် အကျဉ်းထောင်(က) အဆင့်ကိုမြှင့်တင်ဆဲဖြစ်သည့်အတွက် အကျဉ်းသား (၁၀၀၀)ပင်မရှိကြောင်း ကျိုင်းတုံမြို့ ဒုတိယပြည်နယ် ရဲတပ်ဖွဲ့မှူးရုံးမှ သိရသည်။

နိုင်ငံတော်၏ အတိုင်ပင်ခံပုဂ္ဂိုလ်ရုံး၏ ကြငြောချက်အမှတ် ၂/၂၀၁၆ ဖြင့် ပြစ်မှုဆိုင်ရာ ကျင့်ထုံးဥပဒေပုဒ်မ (၄၉၄)အရ နိုင်ငံရေးအကျဉ်းသားများ၊ နိုင်ငံရေးတက်ကြွလှုပ်ရှားသူများ၊ နိုင်ငံရေးနှင့် ဆက်နွှယ်ပြီး အမှုရင်ဆိုင်နေရသူများအား ဧပြီလ(၈)ရက်နေ့တွင် သက်ဆိုင်ရာအကျဉ်းထောင်မှ အကျဉ်းသား (၈၃)ဦးအား လွှတ်ပေးခဲ့ခြင်းဖြစ်သည်။

သတင်း။ ဇွဲမြတ်