ရှမ်းပြည်နယ်မြောက်ပိုင်းမှ သယ်ဆောင်လာသည့် ကျပ်သိန်းပေါင်း(၃၆၃)တန်ဖိုးရှိ မူးယစ်ဆေးဝါးများအား စစ်ကိုင်းတိုင်းဒေသကြီး ပင်လယ်ဘူးမြို့တွင် သြဂုတ်(၃၀)ရက်နေ့၌ ဖမ်းဆီးရမိကြောင်း ပင်လယ်ဘူး မြို့မရဲစခန်းမှ သိရသည်။

"ရှမ်းပြည်မြောက်ပိုင်းက လာတဲ့ ကားပေါ်ကမိတာပါ။ ကျွန်တော်တို့က မူးယစ်ဆေးဝါးတွေ သယ်ဆောင်လာတယ်လို့ သတင်းရလို့ မန္တလေး - ပင်လယ်ဘူး ကားလမ်းမပေါ်မှာ စောင့်နေတာ။ ကားအမျိုးအစားက ဂရင်းဂါဗင်ချီ(၄)ဘီးကား ထိုင်ခုံအမှတ်(၆)မှာထိုင်တဲ့ အမျိုးသမီးတစ်ဦးရဲ့ ပလပ်စတစ်ခြင်းထဲမှာ ကြွပ်ကြွပ်အိတ်နဲ့ထည့်ထားတာ"ဟု ပင်လယ်ဘူး မြို့မရဲစခန်းမှ ခေတ္တစခန်းမှူး ဒုရဲမှူး သက်တင်ဦးက ပြောသည်။

အဆိုပါအမျိုးသမီးထံမှ မူးယစ်ဆေးဝါးများမှာ အလေးချိန်(၃၆၃)ဂရမ်ရှိသည့် ဘိန်းဖြူဟု ယူဆရသည့် ဖြူ/ဝါရောင် အမှုန့်များနှင့်အတူ ရွှေထည်ပစ္စည်းမျိုးစုံ(၂၅)မျိုး စုစုပေါင်းအလေးချိန် (၇.၅)ကျပ်သားခန့် တန်ဖိုးကျပ်(၅,၇၉၀,၅၀၀)တို့ကိုလည်း တွေ့ရှိရကြောင်း သိရသည်။

မူးယစ်ဆေးဝါးများနှင့်အတူ ဖမ်းဆီးရမိသည့် မပြုံးအား ပင်လယ်ဘူးမြို့မရဲစခန်းမှ မယ(ပ)၆၁/၂၀၁၆ မူးယစ်ဆေးဝါးနှင့် စိတ်ကို ပြောင်းလဲစေသော ဆေးဝါးများဆိုင်ရာ ပြစ်မှုပုဒ်မ ၁၅/၁၉(က)/၂၁ ဖြင့် အမှုဖွင့်လှစ် အရေးယူထားကြောင်း သိရသည်။

သတင်း - ရန်နိုင်စိုး