တာချီလိတ်ခရိုင်အတွင်း မူးယစ်ဆေးဝါးတားဆီးနှိမ်နင်းမှုများကို သက်ဆိုင်ရာဌာနအသီးသီးက ဆောင်ရွက်လျှက်ရှိသော်လည်း မူးယစ်ဆေးဝါးသုံးစွဲသူများအတွက် ဆေးဖြတ်စင်တာ ဖွင့်လှစ်နိုင်ခြင်း မရှိသေးကြောင်း သိရသည်။

"တာချီလိတ်မှာတော့ မူးယစ်ဆေးဝါးသုံးစွဲသူ များတယ်။ မူးယစ်ဆေးဖြတ်တဲ့စခန်းက မရှိဘူးဖြစ်နေတယ်။ အစိုးရပိုင်းအနေနဲ့ လူမှုဝန်ထမ်းက လုပ်တယ်။ လူကယ်ပြန်က လုပ်တယ်။ နောက် MANAက လုပ်တယ်။ လိုအပ်တဲ့ အကူညီတွေကို ဌာနဆိုင်ရာတွေနဲ့ MANAတို့ ပေါင်းစပ်ပြီး လုပ်ရတာတွေရှိပါတယ်။ လိုအပ်တာကတော့ ဆေးဖြတ်စင်တာလိုအပ်တယ်။ ဝန်ကြီးဌာနတွေရဲ့ ပံ့ပိုးမှုတွေ ကူညီမှုတွေရရင်တော့ ပိုပြီးအဆင်ပြေပါတယ်။"ဟု တာချီလိတ်မြို့နယ်အုပ်ချုပ်ရေးမှူး ဦးထွန်းဝင်းအောင်က အမေရိကန်သုံးရုံးအဖွဲ့နှင့် တွေ့ဆုံစဉ်က ပြောလိုက်ခြင်း ဖြစ်သည်။

လက်ရှိတွင် လူမှုဝန်ထမ်းဦးစီးဌာနအနဖြေင့် ဆေးဖြတ်လိုသူများအား အမည်စာရင်းများကောက်ခံကာ မူးယစ်ဆေးဝါးသုံးစွဲသူများ စာရင်းသွင်းပြီး (မက်သတုန်း)အစားထိုး ဆေးကုသမှုများရှိပြီ ပြည်သူ့ဆေးရုံသို့ အမည်စာရင်း လာရောက်ပေးသူတို့အား စုဆောင်းပြီး တာချီလိတ်ပြည်သူ့ဆေးရုံတွင် ကုသမှုများ ပြုပေးလျှက်ရှိသော်လည်း စနစ်တကျဖြင့် ဆေးဖြတ်ကာ ပြည်လည်ထူထောင်မှုပြုလုပ်သည့် ဆေးဖြတ်ရေးစခန်းထားရှိရန် လိုအပ်နေသေးကြောင်း၎င်းမှ ပြောသည်။

တာချီလိတ်မြို့ပေါ်ရှိ မူးယစ်ဆေးဖြတ်လိုသူများအား မြို့ပေါ်ရှိ လူမှုကူညီရေးအသင်းများနှင့် ချိတ်ဆက်ကာ လူမှုဝန်ထမ်းဦးစီးဌာနမှတဆင့် ကျိုင်းတုံမြို့ရှိ ဆေးဖြတ်စခန်းများသို့ ပို့ဆောင် ကုသပေးမှုများရှိပြီး မူးယစ်ဆေးဖြတ်လိုသူကို အာဟာရထောက်ပံ့ကြေးအား လူမှုကူညီရေးအသင်းမှ ပံ့ပိုးပြီး လူမှုဝန်ထမ်းကယ်ဆယ်ရေးဦးစီးဌာနမှ ပို့ဆောင်ပေးခြင်းဖြစ်ကြောင်း သိရသည်။

မြန်မာနိုင်ငံ အမေရိကန်သံရုံး ပထမအတွင်းဝန် Joshua Morris နှင့် တာချီလိတ်ခရိုင်အဆင့် ဌာနဆိုင်ရာ အကြီးအကဲများ သြဂုတ်လ (၃၀)ရက်နေ့က ခရိုင်အထွေထွေအုပ်ချုပ်ရေးရုံးတွင် မူးယစ်ဆေးဝါးကိစ္စများ၊ လူကုန်ကူးမှုကိစ္စများ၊ ထိုင်းနိုင်ငံနှင့် ပူးပေါင်းဆောင်ရွက်အခြေအနေများကို အပြန်အလှန်ဆွေးနွေးခဲ့ကြကြောင်း သိရသည်။

သတင်း - ဇောင်းညီ