~~~~~~~~⊰❂ unicode ❂⊱~~~~~~~~

အလှူခံဌာနမှ ဆောင်းဘောက် နှင့် လော်စပီကာယူနစ်တို့ ခိုးယူခံရ

အလှူခံဌာနတစ်ခုမှ ဆောင်းဘောက် နှင့် လော်စပီကာယူနစ်တို့အား ဧပြီလ (၃၀) ရက်နေ့ ညပိုင်းက ဖောက်ထွင်းခိုးယူခံရမှု ရှမ်းပြည်နယ်(မြောက်ပိုင်း) ကျောက်မဲမြို့ ခိုမုန်းကျေးရွာတွင်ဖြစ်ပွားခဲ့ကြောင်း သိရသည်။

“ဘုရားတည်ဆောက်ရေးအတွက် အလှူခံဌာန ဖွင့်ထားတာပါ။ ညအစောင့်တွေ ဘာတွေလည်း မထားဖြစ်ဘူး။ ဘုရားတည်မယ့် တောင်ပေါ်မှာ ဓမ္မစကြာရွတ်တဲ့ အခါသုံးဖို့ ဝယ်ထားတဲ့ ဆောင်းဘောက်အသစ် နှစ်လုံးနဲ့ စပီကာ ယူနစ်တစ်ခု ပျောက်သွားတယ်။ အလှူခံဌာန တာဝန်ခံကတော့ ရဲစခန်းကို အကြောင်းကြားမယ်လို့ ပြောပါတယ်”ဟု အလှူခံဌာနကိစ္စများ ဆောင်ရွက်ပေးနေသူ ဦးကျော်အောင်က တာချီလိတ်သတင်းအေဂျင်စီသို့ ပြောသည်။

ဘုရားဆင်းတုတော်များအားထားရှိသည့် ယာယီမဏ္ဍပ်နံဘေးမှ သံဇကာများကိုချိုးလှန်၍ အတွင်းဖက် တွင် သိမ်းဆည်းထားသည့် ကျပ်(၄၀၀၀၀)ခန့်တန်ဖိုးရှိ ဆောင်းဘောက်(၂)လုံးနှင့် အလှူခံဌာနအနီးရှိ သစ်ပင် ပေါ်တွင် ချည်နှောင်တပ်ဆင်ထားသည့် စပီကာယူနစ်(လော်စပီကာတွင် တပ်ဆင်ရသည့်ပစ္စည်း) တစ်ခုလည်း ခိုးယူခံခဲ့ရခြင်းဖြစ်ကြောင်း၎င်းထံမှ သိရသည်။

“ရဲစခန်းမှာတော့ လာတိုင်ထားတာ မရှိသေးဘူး။ အဲဒီလိုကိစ္စမျိုးဆိုတာ ဘယ်လိုပဲဖြစ်ဖြစ် ရဲတပ်ဖွဲ့ကိုတော့ အကြောင်း ကြားထားသင့်တယ်လေ။ ဒါမှကျွန်တော်တို့ အနေနဲ့ နယ်မြေအပိုင်အရာရှိတွေနဲ့တိုင်ပင်ပြီး စောင့်ကြည့်တာ စောင့်ဖမ်းတာတွေလုပ်လို့ရမှာဖြစ်ပါတယ်။ ဖုန်းလေးပဲဖြစ်ဖြစ်ဆက်ပြီးအသိပေးထားလို့ ရပါတယ် “ဟု ကျောက်မဲမြို့နယ်ရဲတပ်ဖွဲ့မှ ရဲအရာရှိတစ်ဦးကပြောသည်။

ပြည်ထောင်စုလမ်းမကြီးနံဘေး ကျောက်မဲမြို့နယ် ခိုမုန်းကျေးရွာအဝင်တွင်ရှိသည့် အဆိုပါ အလှူခံဌာနအား ဖောက်ထွင်းခိုးယူခံရမှု(၅)ကြိမ်ထက်မနည်းရှိခဲ့ပြီး လွန်ခဲ့သည့် (၃)လခန့်ကလည်း အလှူခံဌာနတွင် တရားခွေဖွင့်လှစ်သည့် ဒီဗီဒီစက်တစ်လုံးနှင့် ထမင်းပေါင်းအိုးများ ခိုးယူခံခဲ့ရကြောင်း အလှူခံဌာနတွင် ကူညီ လုပ်ဆောင်နေသူ ဦးကျော်အောင်ထံမှ သိရသည်။

သတင်း/ဓာတ်ပုံ - နဖြေိုးမြင့်