ကျောက်မဲမီးလောင်မှု လူလေးဦးဒဏ်ရာရပြီး မီးဘေးသင့်လူဦးရေ ၆၁ ဦး နီးစပ်ရာတွင် ယာယီခိုလှုံနေ
http://www.tachileik.net/2017/06/kmefirejune.html
*************
ရှမ်းပြည်နယ်မြောက်ပိုင်း ကျောက်မဲမြို့ အမှတ်(၃)ရပ်ကွက်၊ နယ်မြေ(၅) ရှိ ရေခဲစက်လူနေအိမ်ခန်းတွဲတစ်ခု ဇွန်လ (၆) ရက် နံနက်အစောပိုင်းတွင် မီးလောင်ကျွွမ်းမှုဖြစ်ပွားသဖြင့် လူ(၄)ဦးဒဏ်ရာရပြီး မီးဘေးသင့်လူဦးရေ (၆၁)ဦးအတွက် ယာယီတဲများ ဆောက်လုပ်နေစဉ်အတွင်း နီးစပ်ရာတွင် ယာယီခိုလှုံနေကြကြောင်း သိရသည်။
ီမီးလောင်မှုကြောင့် အိမ်ခန်းတွဲရှိ အခန်း(၁၁)ခန်း၊ အနီးရှိ နေအိမ် (၁)လုံး၊ သုံးဘီးယာဉ်(၂)စီးနှင့် ဆိုင်ကယ်(၇)စီး ဆုံးရှုံးပြီး မီးငြိမ်းသတ်ရင်း လေးဦးဒဏ်ရာရသွားကြောင်း သိရသည်။
“အဲဒီနားမှာနေတဲ့ အမျိုးသားကြီးတစ်ယောက်က မီးလောင်တဲ့နေရာမှာ ဝိုင်းပြီးငြိမ်းသတ်ရင်း မီးလောင်တဲ့နေရာ က ပေါက်ကွဲမှုတစ်ခုက လာမှန်လို့ ဒဏ်ရာ အနည်းငယ်ရတယ်။ နောက်အမျိုးသမီးတစ်ဦးလည်း ရေခပ်နေတုန်း မီးစလာမှန်လို့ ဒဏ်ရာအနည်းငယ်ရထားတယ်။ နှစ်ဦးစလုံးက မစိုးရိမ်ရပါဘူး။ ကျောက်မဲဆေးရုံမှာတင်ထား တယ်လို့ သိရပါတယ်”ဟု ကျောက်မဲမြို့ မြို့နယ်မီးသတ်တပ်ဖွဲ့မှ တပ်ဖွဲ့ဝင်တစ်ဦးက တာချီလိတ်သတင်းအေဂျင်စီ သို့ ပြောသည်။
မီးလောင်ကျွမ်းမှုကြောင့် မီးဘေးသင့်အိမ်ထောင်စု (၁၈)စုမှ အမျိုးသား (၃၀)ဦး၊ အမျိုးသမီး (၃၁)ဦး စုစုပေါင်း (၆၁) ဦးမှာ လက်ရှိတွင် နီးစပ်ရာဆွေမျိုးအိမ်များတွင် ခိုလှုံနေပြီး ၎င်းတို့အတွက် ယာယီတဲအိမ်များကို ကျောက်မဲမြို့ အမှတ်(၁) စစ်ဆင်ရေး ကွပ်ကဲမှုဌာနချုပ်မှ တပ်မတော်သားများ၊ ကျောက်မဲမြို့၊ မြို့နယ်မီးသတ်တပ်ဖွဲ့ဝင်များ၊ ကြက်ခြေနီအသင်းဝင်များက ဆောက်လုပ်ပေးလျှက်ရှိကြောင်း သိရသည်။
မီးလောင်ကျွမ်းမှုဖြစ်ပွားစဉ် ဝိုင်းဝန်းငြိမ်းသတ်ခဲ့သည့် အသက်(၄၆)နှစ်အရွယ် အမျိုးသားတစ်ဦးနှင့် အသက် (၂၁) နှစ်အရွယ် အမျိုးသမီးတစ်ဦးတို့အပြင် မြို့နယ်မီးသတ်တပ်ဖွဲ့ဝင်တစ်ဦးနှင့် အဆိုပါ အိမ်ခန်းတွဲတွင်နေထိုင်သူ အမျိုးသမီးကြီးတစ်ဦးလည်း ဒဏ်ရာအနည်းငယ်စီ ရသွားကြောင်း သိရသည်။
အိမ်ခန်းတွဲမှ အခန်း(၁၁)ခုရှိသည့်အနက် (၅)ခန်းမြောက်အခန်း၌ ဇွန်လ(၆)ရက်နေ့ နံနက် (၂)နာရီ(၅)ခန့်အချိန်တွင် မီးအားမြှင့်စက် အပူလွန်ကဲရာမှ မီးလောင်ကျွမ်းမှု စတင်ဖြစ်ပွားခဲ့ခြင်းဖြစ်ပြီး (၂)နာရီ(၃၀)မိနစ်ခန့်မှစ၍ ကျောက်မဲမြို့နယ်မီးသတ်တပ်ဖွဲ့မှ သန္ဓေမီးသတ်အင်အား(၄၀)၊ မီးသတ်ယာဉ်(၃)စီး၊ ရေသယ်ယာဉ်(၂)စီးနှင့် ရပ်ကွက်နေ ပြည်သူလူထု ဝိုင်းဝန်းငြိမ်းသတ်ခဲ့ရာ နံနက်(၄)နာရီ(၃၀)မိနစ်အချိန်တွင် လုံးဝငြိမ်းသတ်နိုင်ခဲ့ခြင်းဖြစ်သည်။
 “စစချင်းလောင်တဲ့အိမ်က မီးလောင်တာကို သူ့ဘာသာအရင်ငြိမ်းနေတာ။ မနိုင်တော့မှ ဘေးခန်းတွေကိုကူးပြီး အကုန်ပါသွားတာ။ ကျွန်တော်တို့လည်း လူပဲလွတ်တာ။ ဘာပစ္စည်းမှ မယူနိုင်လိုက်ဘူး။ ဆိုင်ကယ်တွေတောင် မရွှေ့နိုင်လို့ မီးထဲပါသွားတယ်။ မီးအားက တော်တော်ကောင်းတယ်။ ခဏလေးမှာ အကုန်လုံးကိုမီးကူးသွားတာ။ ရှိသမျှပစ္စည်း အကုန်မီးထဲပါသွားတယ်”ဟု မီးလောင်ကျွမ်းသွားသည့် အိမ်ခန်းတွဲတစ်ခုတွင် နေထိုင်သူအမျိုးသား တစ်ဦးက ပြောသည်။

မီးလောင်မှုအား နံနက်(၄)နာရီ(၃၀)ခန့်အချိန်တွင် လုံးဝငြိမ်းသတ်နိုင်ခဲ့ပြီး မီးလောင်ကျွမ်းမှုကြောင့် ပျက်စီးဆုံးရှုံးမှု တန်ဖိုး ကျပ် ( ၉၅၀၇၅၀၀ )ရှိကြောင်း မြို့နယ်မီးသတ်တပ်ဖွဲ့မှ ခန့်မှန်းတွက်ချက်ထားသည်။

မီးလောင်ကျွမ်းမှုစတင်ဖြစ်ပွားရာ မီးပေါ့ဆမှုအပြင် မီးလောင်ကျွမ်းမှုမှ ဒဏ်ရာရစေခဲ့သည့်အတွက် နေအိမ်ပိုင်ရှင်အမျိုးသမီးအား ကျောက်မဲမြို့မရဲစခန်းတွင် (ပ) ၉၃၊ ပုဒ်မ ၂၈၅၊ ပုဒ်မ ၃၃၇ တို့ဖြင့် အမှုဖွင့်အရေးယူထားကြောင်း သိရသည်။

သတင်း #နေဖြိုးမြင့်
ဓါတ်ပုံ #နေဖြိုးမြင့်၊သိန်းထွန်းအောင်၊ကျောက်မဲမီးသတ်ဦးစီးဌာန