မြန်မာနိုင်ငံလူ့အခွင့်အရေးကော်မရှင််က ရှမ်းပြည်နယ်အရှေ့ပိုင်းမြို့များတွင် လူ့အခွင့်အရေးအကြောင်း ရှင်းလင်းဆွေးနွေး
***********
ရှမ်းပြည်နယ်(အရှေ့ပိုင်း)ဒေသတွင် မြန်မာနိုင်ငံလူ့အခွင့်အရေးကော်မရှင််က လူ့အခွင့်အရေးအကြောင်း သိကောင်းစရာများ ရှင်းလင်းဆွေးနွေးခြင်းလုပ်ဆောင်နေရာ စက်တင်ဘာလ (၁၁)ရက်နေ့က တာချီလိတ်ခရိုင်၊ မိုင်းယောင်းမြို့တွင် ရှင်းလင်းဆွေးနွေးကြောင်း သိရသည်။

မိုင်းယောင်းမြို့ အထွေထွေအုပ်ချုပ်ရေးဦးစီးဌာနတွင် ကျင်းပသည့် အဆိုပါအခမ်းအနားတွင် လူ့အခွင့်အရေးဆိုင်ရာ အခြေခံအယူအဆများ၊ မြန်မာနိုင်ငံအမျိုးသား လူ့အခွင့်အရေး ကော်မရှင်ဖွဲ့စည်းခြင်းနှင့် လုပ်ငန်းဆောင်ရွက်ချက်များအကြောင်းကို မြန်မာနိုင်ငံအမျိုးသား လူ့အခွင့်အရေး ကော်မရှင် ဒုတိယဥက္ကဋ္ဌ ဦးစစ်မြိုင်က ရှင်းလင်းပြီး ကော်မရှင်အဖွဲ့ဝင် ဦးခင်မောင်လေးက ကမ္ဘာ့လူ့အခွင့်အရေး ကြေညာစာတမ်းအကြောင်း ဆွေးနွေးခဲ့ကြောင်း သိရှိရသည်။

အခမ်းအနားသို့ ပြည်သူ့လွှတ်တော်ကိုယ်စားလှယ် ဦးစိုင်းထွန်းအောင်၊ ပြည်နယ်လွှတ်တော် ကိုယ်စားလှယ် ဦးအိုက်ခမ်းလှိုင်၊ မြို့နယ်အုပ်ချုပ်ရေးမှူး ဦးမင်းနိုင်အောင်၊ မိုင်းယောင်း၊ မိုင်းယုမြို့များမှ ဌာနဆိုင်ရာအကြီးအကဲများ၊ နိုင်ငံရေးပါတီများ၊ မြို့မိမြို့ဖများ၊ ရပ်ကွက်နှင့် ကျေးရွာအုပ်စု အုပ်ချုပ်ရေးမှူးများ၊ လူမှုရေးအဖွဲ့အစည်းများ၊ ဒေသခံပြည်သူများ တက်ရောက်ကြကြောင်း သိရသည်။

မြန်မာနိုင်ငံအမျိုးသားလူ့အခွင့်အရေးကော်မရှင် ဒုတိယဥက္ကဋ္ဌ ဦးစစ်မြိုင်နှင့် အဖွဲ့ဝင်ဦးခင်မောင်လေးတို့ ပါဝင်သည့်အဖွဲ့သည် တာချီလိတ်ခရိုင်အတွင်း အခြားမြို့များတွင်လည်း လူ့အခွင့်အရေးအကြောင်း သိကောင်းစရာများ ရှင်းလင်းဆွေးနွေးခြင်းများဆက်လက် ပြုလုပ်သွားမည်ဖြစ်ကြောင်းသိရသည်။