~~~~~~~~⊰❂ unicode ❂⊱~~~~~~~~

နမ့်ဆန်မြို့နယ်အတွင်း မိုင်းအန္တရာယ်လျော့ကျရေးအတွက် တပ်မတော်နှင့် လက်နက်ကိုင်အဖွဲ့များထံ ကျေးရွာများစုပေါင်းတောင်းဆိုမည်
************
ရှမ်းပြည်နယ်(မြောက်ပိုင်း) ပလောင်ကိုယ်ပိုင်အုပ်ချုပ်ခွင့်ရဒေသ နမ့်ဆန်မြို့နယ်တွင် မိုင်းအန္တရာယ် လျော့ကျစေရေးအတွက် တပ်မတော်နှင့့် TNLA တို့ထံ ကျေးရွာပေါင်း (၂၀)မှ ပထမဆုံးအကြိမ် စာတင်ပြ၍ စုပေါင်းတောင်းဆိုသွားကြရန် ဒေသခံများ ဆွေးနွေးနေကြောင်း သိရသည်။

“ဒီဘက်မှာ ရွာပေါင်း(၂၀)လောက်ပါဝင်ဖွဲ့ထားတဲ့ လူမှုကူညီရေးအသင်း (ရှော်လဲတိုက်နယ် လူမှုကူညီရေးအသင်း) ရှိတယ်။ အသင်းအနေနဲ့ကတော့ အရင်က မေတ္တာရပ်ခံဖူးတယ်။ မိုင်းထောင်တာက ဘယ်အဖွဲ့က လုပ်တာလဲဆိုတာတော့ ဦးဇင်းတို့က မသိဘူးပေါ့။ အခုက လူသွားလမ်းမှာကို မိုင်းထောင်တာ။ အောက်တိုဘာ(၂၀)က အသက်(၂၀) အရွယ် မိန်းကလေးမိုင်းနင်းမိတဲ့နေရာဆိုရင် လူသွားလမ်း အလယ်ခေါင်တည့်တည့်မှာပဲ။ ဒီလိုအချိန်မှာ မျှစ်ချိုတွေလည်း ထွက်တာဖြစ်တဲ့အတွက် မသိနားမလည်တဲ့ ဒေသခံတွေက မျှစ်ရှာထွက်ရင် ဒီလိုပဲမိုင်းနင်းမိတာတွေ ထပ်ဖြစ်လာမှာပဲ။ အခုလို စာတင်ပြတာမျိုး မလုပ်ဘူးဆိုရင် နောက်နေ့တွေလည်း နောက်ထပ်မိုင်းနင်းမိတာတွေ ကြားရဦးမှာပဲ။ အခုက လက်နက်ကိုင်တပ်ဖွဲ့တွေ တိုက်ခိုက်ကြတဲ့ကြားမှာ လူထုကမြေစာပင် ဖြစ်နေရတယ်”ဟု မန်လွယ် (အထက်) ကျေးရွာ ရန်ကင်းတောင်တွင် သီတင်းသုံးနေသည့် ဆရာတော် ဦးသောဘိတက တာချီလိတ်သတင်းအေဂျင်စီ သို့ မိန့်သည်။

နမ့်ဆန်မြို့နယ်အတွင်း ဒေသခံများ၊ ကျွဲနွားတိရစ္ဆာန်များမှာ မကြာခဏ မိုင်းနင်းမိ၍ ထိခိုက်ဒဏ်ရာရခြင်း၊ သေဆုံးခြင်းများ ဖြစ်နေသဖြင့် အောက်တိုဘာလ (၂၀)ရက်နေ့တွင် ရှော်လယ်တိုက်နယ်အတွင်းရှိ ကျေးရွာများမှ ဘုန်းကြီးကျောင်း(၁၉)ကျောင်းမှ ဆရာတော်များ၊ ကျေးရွာများစုဖွဲ့ထားသည့် လူမှုကူညီရေးအသင်း၏ နာယကများဖြစ်ကြသည့်အတွက် ကျေးရွာသူ/သားများ၊ ကျေးရွာဥက္ကဌများက ဒေသတွင်း လက်နက်ကိုင်အဖွဲ့များထံ တောင်းဆိုရန် ဆွေးနွေးနေကြခြင်းဖြစ်ကြောင်း သိရသည်။

“ဒီဖက်မှာက မြန်မာ့တပ်မတော်နဲ့ TNLA တို့ပဲ ရှိမယ်ခင်ဗျ။ တစ်ခြားလက်နက်ကိုင်အဖွဲ့တွေတော့ ဝင်ရောက်တာ မရှိပါဘူး။ အောက်တိုဘာလ(၂၀)ရက်နေ့မှာ ဒီအနီးနားကျေးရွာ(၂၀)က ကျေးရွာလူကြီးတွေ၊ သံဃာတော်တွေ နဲ့ စုပေါင်းထားတဲ့ ရှော်လဲတိုက်နယ် လူမှုကူညီရေးအဖွဲ့မှာ ပါတဲ့သူတွေစုဝေးပြီး အစည်းအဝေးလုပ်ပါတယ်။ အစည်းအဝေးအရတော့ ဘယ်အဖွဲ့အစည်းမဆို ကျေးရွာတွေအနီးမှာ လက်လုပ်မိုင်း၊ တိုက်မိုင်း၊ ကြိုးဆွဲမိုင်း စတာတွေကို လာမထားဖို့ မရှိအောင်လို့ ကြိုတင်ကာကွယ်တဲ့အနေနဲ့ တောင်းဆိုတဲ့အနေနဲ့ နှစ်ဖက်စလုံးကို စာတင်ဖို့ လုပ်ဆောင်မှာပါ” ဟု မန်လွယ်(အထက်)ကျေးရွာမှ ကျေးရွာအုပ်ချုပ်ရေးမှူး ဦးသိန်းထိုက်ဇော်က တာချီလိတ်သတင်းအေဂျင်စီသို့ ပြောသည်။

ဒေသတွင်း ကျေးရွာများမှ ရပ်/ကျေးအုပ်ချုပ်ရေးများ၊ ဒေသခံများနှင့် ဆရာတော်များ ပါဝင်ဖွဲ့စည်းထားသည့် ရှော်လဲတိုက်နယ်လူမှုကူညီရေးအသင်းအနေဖြင့် ဒေသအတွင်း မိုင်းအန္တရာယ်အသိပညာပေးလုပ်ငန်းများ၊ နိုင်ငံသားအခွင့်အရေး၊ လူ့အခွင့်အရေးဆိုင်ရာ အသိပညာပေးများကိုလည်း ဆောင်ရွက်ပေးနေကြောင်း သိရသည်။

သတင်း #နေဖြိုးမြင့်