~~~~~~~~⊰❂ unicode ❂⊱~~~~~~~~

ကျောက်မဲမြို့ အမြောက်တပ်အနီး ပန်းခြံရှေ့တွင် မပေါက်ကွဲသေးသည့် လက်လုပ်မိုင်းတစ်လုံး ထပ်မံတွေ့ရှိ
********
ရှမ်းပြည်နယ်(မြောက်ပိုင်း) ကျောက်မဲမြို့အဝင်ရှိ အမှတ်(၃၅၂)အမြောက်တပ်ရှေ့ မျက်နှာချင်းဆိုင်ရှိ နန္ဒမာလာပန်းခြံရှေ့တွင် မပေါက်ကွဲသေးသည့် လက်လုပ်မိုင်း တစ်လုံးအား နိုဝင်ဘာလ (၂၈)ရက်နေ့ နံနက်က စစ်ဆေးတွေ့ရှိရသဖြင့် သက်ဆိုင်ရာက ရှင်းလင်းပြီးဖြစ်ကြောင်း သိရသည်။

ကျောက်မဲမြို့ ရပ်ကွက် (၁)ရှိ နန္ဒမာလာပန်းခြံရှေ့တွင် အဝါရောင်ပလတ်စတစ်ပုံးတစ်လုံးအား တွေ့ရှိရသဖြင့် ရဲတပ်ဖွဲ့နှင့် တပ်မတော်မှသက်ဆိုင်ရာအဖွဲ့တို့ပါဝင်သည့် ပူးပေါင်းအဖွဲ့ဖြင့် စစ်ဆေးရာ သံတိုသံစများ၊ ယမ်းများထည့်ထားပြီး ဓါတ်ခဲ၊ ဝါယာကြိုးများဖြင့် ချိတ်ဆက်လျှက် ပြုလုပ်ထားသည့် မပေါက်ကွဲသေးသော လက်လုပ်မိုင်းတစ်လုံးဖြစ်သည်ကို စစ်ဆေးတွေ့ရှိရခြင်း ဖြစ်ကြောင်း သိရသည်။

အမှတ် (၃၅၂) အမြောက်တပ်ရှေ့ခြံစည်းရိုးနှင့် ပလောက်ဖောင်းကြားတွင် နိုဝင်ဘာလ (၂၇)ရက်နေ့ ည(၈)နာရီ (၄၅)မိနစ်ခန့်ကလည်း ပေါက်ကွဲမှုတစ်ခုဖြစ်ပွားခဲ့သဖြင့် ရဲတပ်ဖွဲ့နှင့် တပ်မတော်သက်ဆိုင်ရာအဖွဲ့တို့က ရှာဖွေရှင်းလင်းမှုများ လုပ်ဆောင်ခဲ့ခြင်းဖြစ်သည်။

"မိုင်းကွဲတာ လူထိခိုက်မှုမရှိဘူး။ အုတ်တံတိုင်းတော့ တစ်ခန်းလောက် ပြိုကျသွားတယ်။ ရှာဖွေရှင်းလင်းမှုတွေတော့ လုပ်နေပါတယ်" ဟု ကျောက်မဲမြို့မစခန်းမှ တာဝန်ရှိသူတစ်ဦးက တာချီလိတ်သတင်းအေဂျင်စီသို့ အတည်ပြုပြောကြားသည်။

အဆိိုပါ ညပိုင်းပေါက်ကွဲမှုဖြစ်ပွားရာအနီးရှိ တပ်ခြံစည်းရိုးအုတ်တံတိုင်းပြိုကျမှုဖြစ်ပွားခဲ့ပြီး အနီးဝန်းကျင်တွင် သံတိုသံစများတွေ့ရသဖြင့် လက်လုပ်မိုင်းပေါက်ကွဲခြင်းဖြစ်သည်ဟု ယူဆရကြောင်း ရဲတပ်ဖွဲ့ထံမှ သိရသည်။

အဆိုပါ ပေါက်ကွဲမှုနှင့်ပတ်သက်၍ စုံစမ်းရှာဖွေမှုများ ဆက်လက်လုပ်ဆောင်သွားမည်ဖြစ်ကြောင်း သိရသည်။

သတင်း #နေဖြိုးမြင့်