~~~~~~~~⊰❂ unicode ❂⊱~~~~~~~~

ကျိုင်းတုံမြို့နယ်၌ တရားမဝင် ဝင်ရောက်လာသည့် တရုတ်နိုင်ငံသားနှစ်ဦးနှင့် ခေါ်ဆောင်လာသူနှစ်ဦးအား ဖမ်းဆီးရမိ
**************
ကျိုင်းတုံမြို့နယ်၊ ပါယုတ်ကျေးရွာမှ အမျိုးသမီးတစ်ဦးနှင့် လက်ထပ်ရန်ရောက်ရှိနေသည့် တရုတ်နိုင်ငံသား အပါအဝင် တရားမဝင် ဝင်ရောက်လာသည့် တရုတ်နိုင်ငံသားနှစ်ဦးအား မတ်လ (၁)ရက်နေ့တွင် လူကုန်ကူးမှုတားဆီးနှိမ်နင်းရေးရဲတပ်ဖွဲ့စု(၁၈) ကျိုင်းတုံမှ ရဲတပ်ဖွဲ့ဝင်များက ဖမ်းဆီးရမိကြောင်း သိရသည်။

ပါယုတ်ကျေးရွာတွင် တရုတ်နိုင်ငံသားနှစ်ဦး ရောက်ရှိနေကြောင်းသတင်းအရ ၂၀၁၈ ခုနှစ် မတ်လ (၁)ရက်နေ့ ညနေ (၄)နာရီဝန်းကျင်တွင် လူကုန်ကူးမှုတားဆီးနှိမ်နင်းရေးရဲတပ်ဖွဲ့စု(၁၈) ကျိုင်းတုံမှ ရဲတပ်ဖွဲ့ဝင်များက သွားရောက်ရှာဖွေရာ အဆိုပါရွာမှ မနာတဲ၏နေအိမ်၌ မနာတဲနှင့်အတူ တရုတ်နိုင်ငံသားနှစ်ဦး၊ စောလမွန်ဆိုသူတို့အား တွေ့ရသခြင်းဖြစ်ကြောင်း သိရသည်။

ကျိုင်းတုံမြို့ လူဝင်မှုကြီးကြပ်ရေးဦးစီးဌာနက အဆိုပါလေးဦးအား စစ်ဆေးရာ မနာတဲသည် ၂၀၁၇ ခုနှစ် ဇန်နဝါရီလအတွင်းက ကျိုင်းတုံမြို့နယ် ပါယုတ်ကျေးရွာမှ ကျိုင်းတုံ-မိုင်းခတ်-မိုင်းဖျန်လမ်းအတိုင်း တရုတ်နိုင်ငံ ကျူးကော်မြို့ ဟူနန်းကျေးရွာသို့ တရားမဝင်သွားရောက် အလုပ်လုပ်ခဲ့ပြီး တရုတ်နိုင်ငံသား Kya Lar နှင့် လက်ထပ်ပေါင်းသင်းရန်အတွက် စောလမွန်နှင့်အတူ တရုတ်နိုင်ငံသား Kya Lar ပါနှစ်ဦးအား မနာတဲ၏ မိဘများရှိသည့် ပါယုတ်ကျေးရွာသို့ ဆိုင်ကယ်ဖြင့် ခေါ်ဆောင်လာခဲ့ခြင်းဖြစ်ကြောင်း ထွက်ဆိုခဲ့သည်ဟု သိရသည်။

တရားမဝင် ဝင်ရောက်လာသည့် တရုတ်နိုင်ငံသားနှစ်ဦးနှင့် ၎င်းတို့အား ခေါ်ဆောင်လာသည့် မြန်မာနိုင်ငံသား နှစ်ဦးတို့အား ကျိုင်းတုံမြို့မရဲစခန်းတွင် (ပ)၅၆/၂၀၁၈ လဝကအက် ၁၃(၁)/၁၃(၅)ဖြင့် အမှုဖွင့်စစ်ဆေးလျက်ရှိကြောင်း သတင်းရရှိသည်။

သတင်း #နန်းဟွမ်ခမ်း
ဓါတ်ပုံ #ပြည်ထဲရေး