~~~~~~~~⊰❂ unicode ❂⊱~~~~~~~~

ကချင်ပြည်နယ် တိုက်ပွဲများအတွင်း ပိတ်မိနေသည့် ဒေသခံ တစ်ထောင်ကျော်အား ရွှေ့ပြောင်းပေးထားပြီး ဆက်လက်ကူညီနိုင်ရေး ခွင့်ပြုချက်စောင့်နေ
*****
ကချင်ပြည်နယ်တွင် တိုက်ပွဲများအတွင်း ပိတ်မိနေသည့် ဒေသခံများအနက် ဧပြီလ (၂၉)ရက်နေ့အထိ အင်ဂျန်းယန်မြို့နယ်အတွင်းမှ လူဦးရေတစ်ထောင်ကျော်ကို ကချင်ပြည်နယ်အစိုးရ၏ခွင့်ပြုချက်ဖြင့် ရွှေ့ပြောင်းပေးထားနိုင်ပြီး ကျန်ဒေသခံများအား ရွှေ့ပြောင်းပေးနိုင်ရေးကို နိုင်ငံတော်သမ္မတထံ တင်ပြထားကြောင်း စစ်ဘေးရှောင်များကို ကူညီရွှေ့ပြောင်းပေးနေသည့် အရပ်ဖက်အဖွဲ့များထံမှ သိရသည်။
“တခြားပိတ်မိနေတဲ့နေရာက လူတွေအကုန်လုံး ခေါ်ထုတ်ဖို့က ပြည်နယ်အစိုးရနဲ့ညှိဖို့က အခက်အခက်ရှိတယ်။ ဒီတော့ နိုင်ငံတော်သမ္မတဆီကို စာတင်ပြထားပါတယ်။ လွန်ခဲ့တဲ့သုံးရက်လောက်ကပါ။ အဲဒီစာအပေါ်မှာ အကြောင်းပြန်ကြားလာမှုအပေါ် စောင့်ဆိုင်းနေပါတယ်”ဟု ငြိမ်းချမ်းရေးဆွေးနွေးရေး အကျိုးဆောင်အဖွဲ့(PCG)မှ ဦးလမိုင်ဂွမ်ဂျာက တာချီလိတ်သတင်းအေဂျင်စီသို့ ပြောသည်။
တိုက်ပွဲများကြောင့် ပိတ်မိနေသည့် ဒေသခံများ ဘေးလွတ်ရာသို့ ရွှေ့ပြောင်းပေးရေးအတွက် ပြည်နယ်အစိုးရနှင့် ညှိနှိုင်းပြီးနောက် ဧပြီလအတွင်း အင်ဂျန်းယန်မြို့နယ်အတွင်းမှ လူအချို့အား ရွှေ့ပြောင်းပေးနိုင်ခဲ့ခြင်းဖြစ်ကြောင်း သိရသည်။
“ဒါက ဒုတိယအကြိမ်ပါ။ ပထမအကြိမ်က လူပေါင်း တစ်ထောင်လောက် ခေါ်ထုတ်လာနိုင်ပါတယ်။ ဧပြီလ (၂၆)နေ့လောက်ကပဲ ပြည်နယ်အစိုးရခွင့်ပြုချက်နဲ့ ခေါ်ထုတ်လာနိုင်တာ။ အဲဒီတုန်းက ပြည်နယ်အစိုးရကရော၊ မြို့နယ်အုပ်ချုပ်ရေးရော၊ လဝကရောပါတယ်”ဟု ဦးလမိုင်ဂွမ်ဂျာက ဆိုသည်။
အင်ဂျန်းယန်မြို့နယ်အတွင်းမှ ဒေသခံ (၁၄၀)ခန့်အား ဒုတိယအကြိမ်အဖြစ် ဧပြီလ (၂၉)ရက်နေ့တွင် မြစ်ကြီးနားခရစ်ယာန်ကောင်စီ (MCC)မှ ဆရာတော်ကြီးများ၊ ငြိမ်းချမ်းရေးဆွေးနွေးရေး အကျိုးဆောင်အဖွဲ့(PCG) ၊ ကချင်ပြည်နယ် Rescue အဖွဲ့နှင့် ရပ်မိရပ်ဖခေါင်းဆောင်များပါဝင်သည့်အဖွဲ့က ကချင်ပြည်နယ်အစိုးရနှင့် ညှိနှိုင်းသဘောတူညီချက်ရပြီးနောက် ရွှေ့ပြောင်းပေးနိုင်ခဲ့ခြင်းဖြစ်ကြောင်း သိရသည်။
“အဲဒီပိတ်ဆို့နေတဲ့အဖွဲ့တွေကို သွားရောက်ကူညီဖို့အတွက် ကချင်ပြည်နယ်အစိုးရအဖွဲ့နဲ့ ဘာသာရေးအသင်းအဖွဲ့ သင်းအုပ်ဆရာတော်ကြီးတွေနဲ့ဖွဲ့စည်းထားတဲ့ မြစ်ကြီးနားခရစ်ယာန်ကောင်စီ MCC အဖွဲ့နဲ့ ကျွန်တော်တို့ PCG အဖွဲ့တို့ သွားရောက်ကူညီကြတယ်။ မနေ့က (၂)နာရီမှာ သူတို့ပြည်နယ်အစိုးရရုံးမှာ အစည်းအဝေးလုပ်ကြတယ်။ အစည်းအဝေးလုပ်ပြီးမှ သွားခေါ်ဖို့ ခွင့်ပြုချက်ပေးတော့ ကျွန်တော်တို့တွေ ဟိုဘက်ကမ်းကို သွားခေါ်တာ (ည) ၈ နာရီလောက်မှ ဒီဘက်ကမ်းကို ကူးလာနိုင်တယ်ပေါ့။ ကျွန်တော်တို့ မနေ့ညက ၁၀ နာရီလောက်မှ ပြန်လာနိုင်တာပေါ့။ လူဦးရေကတော့ ၁၄၀ လောက်ရှိတယ်” ဟု ကချင်ငြိမ်းချမ်းရေးအကျိုးဆောင်အဖွဲ့ (PCG)မှ ဦးလမိုင်ဂွမ်ဂျာက တာချီလိတ်သတင်းအေဂျင်စီသို့ ပြောသည်။
အင်ဂျန်းယန်မြို့နယ်အတွင်း ပိတ်မိနေသည့် ဒေသခံများအား ရွှေ့ပြောင်းပေးနိုင်ရေးအတွက် ပြည်နယ်အစိုးရနှင့် ညှိနှိုင်းပြီးနောက် ဧပြီလ (၂၉) ရက်နေ့ ည (၇) နာရီအချိန်တွင် တပ်မတော်က ခွင့်ပြုပေးလိုက်ခြင်းဖြစ်ကြောင်း သိရသည်။
“အကုန်တော့မဟုတ်ဘူး။ ပထမတစ်ခေါက် ထွက်လာတဲ့ လူဦးရေက တစ်ထောင်လောက်ရှိတယ်။ အင်ဂျန်းယန်ထဲမှာက ရွာကတော်တော်များတယ်။ လက်ရှိက အင်ဂျန်းယန်ထဲမှာလည်းရှိတယ်။ ၁၆ မိုင်ဆိုတဲ့နေရာမှာလည်းရှိတယ်။ တခြားနေရာတွေမှာလည်းရှိတယ်။ တိုက်ပွဲတွေကရှိနေတော့ သူတို့က မနေရဲတော့ဘူးဆိုတော့ ဒီဘက် ဘာသာရေးအဖွဲ့တွေကိုရော ကျွန်တော်တို့ PCG ကိုရော စာလှမ်းပို့ကြတယ်။ သူတို့ကို လာခေါ်ပါဆိုပြီးတော့။ ကျွန်တော်တို့ကလည်း ဒီဘက်အစိုးရအဖွဲ့နဲ့ ညှိပြီးတော့ သူတို့ကို သွားခေါ်နိုင်ဖို့ ကူညီဖို့ ကြိုးစားရတယ်။ အကုန်လုံးတော့ မခေါ်နိုင်သေးဘူး။ တိုက်ပွဲဖြစ်နေတော့ သူတို့ ဒီဘက်ကိုလည်း မလာနိုင်ဘူးဖြစ်နေတယ်”ဟု ဦးလမိုင်ဂွမ်ဂျာက ဆိုသည်။
အဆိုပါ စစ်ဘေးရှောင်များအား တန်ဖရဲကျေးရွာရှိ ကတ်သလစ်ဘုရားကျောင်းတွင် ဖွင့်ထားသည့် ယာယီစခန်းနှင့် မြစ်ကြီးနားမြို့အနီး ပလနတွင်ရှိသည့် ဘုရားကျောင်းတွင် ဖွင့်လှစ်ထားသည့် ယာယီစခန်းများတွင် နေရာချထားပေးကြောင်း သိရသည်။
ကချင်ပြည်နယ်အတွင်း တပ်မတော်နှင့် KIA တို့၏ ဧပြီလ (၁၁)ရက်နေ့မှစ၍ ဧပြီလ (၂၈)ရက်နေ့အထိ တိုက်ပွဲများကြောင့် ကချင်ပြည်နယ် တနိုင်းမြို့နယ် အောင်လောဒ်ကျေးရွာ၊ ကာမိုင်းမြို့နယ် မန်ဝိုင်း/လိုင်နောင်ခူးကျေးရွာ၊ နမ္မတီးမြို့နယ် ကဆုန့်ကျေးရွာ၊ အင်ဂျန်းယန်မြို့နယ်၊ ချီဖွေမြို့နယ်၊ ဇန်နောင်ယန်ကျေးရွာများတွင် ဒေသခံများ ပိတ်မိနေသဖြင့် အဆိုပါ စစ်ဘေးရှောင်များအား လုံခြုံသည့်နေရာများသို့ ဘေးကင်းစွာရွှေ့ပြောင်းပေးရန် မြစ်ကြီးနားမြို့တွင် ဧပြီလ (၃၀)ရက်နေ့က ဆန္ဒထုတ်ဖေါ် တောင်းဆိုမှုများလည်း လုပ်ဆောင်နေကြခြင်းဖြစ်သည်။
သတင်း #အင်မိုင်ခ
ဓါတ်ပုံ #ZRH