~~~~~~~~⊰❂ unicode ❂⊱~~~~~~~~

ချင်းပြည်နယ်ရှိ မြန်မာ-အိန္ဒိယနယ်စပ်တံတားတွင် ယာဉ်များဖြတ်သန်းသွားလာမှုကို အိန္ဒိယနိုင်ငံ အာသံရိုင်ဖယ်တပ်က ခေတ္တပိတ်ပင်ထား
************
ချင်းပြည်နယ်ရှိ နယ်စပ်ကုန်သွယ်ရေးဝင်ထွက်ပေါက်တစ်ခုဖြစ်သည့် ဖလမ်းမြို့နယ် ရိခေါဒါရ်မြို့ရှိ မြန်မာ-အိန္ဒိယနှစ်နိုင်ငံနယ်စပ် ချစ်ကြည်ရေးတံတားပေါ် ယာဉ်များဖြတ်သန်းဝင်ထွက်သွားလာခြင်းကို အိန္ဒိယနိုင်ငံဖက်မှ အာသံရိုင်ဖယ်တပ်(Assam Riffle) က မေ ၂၂ ရက်နေ့အထိ ပိတ်ထားဆဲဖြစ်ပြီး အချိန်ကာလ ကန့်သတ်ချက်နှင့် အကြောင်းရင်းကို မသိရသေးကြောင်း သိရသည်။

အဆိုပါတံတားမှ မော်တော်ယာဉ်များ ဖြတ်သန်းဝင်ထွက်မှုကို ၂၀၁၈ ခုနှစ် မေလ (၂၁)ရက်နေ့မှစ၍ ရုတ်တရက် ပိတ်ပင်လိုက်သော်လည်း လူများဖြတ်သန်းမှုနှင့် ဒေသသုံးတွန်းလှည်း(ချင်းကား)ဖြင့် ပစ္စည်းသယ်ဆောင်ခြင်းကို ခွင့်ပြုပေးထားကြောင်း သိရသည်။

“အရင်ကတော့ ပိတ်တာမရှိဖူးဘူး။ ဘာဖြစ်လို့လဲ ပိတ်တာလဲဆိုတာ မသိရသေးဘူး။ ပိတ်တာက အာသံစစ်တပ်က ပိတ်တာပေါ့နော်။ လူတွေနဲ့ တွန်းလှည်းနဲ့ပစ္စည်းသယ်တာတွေတော့ ခွင့်ပြုထားပါတယ်”ဟု ရိခေါဒါရ်မြို့တွင် နေထိုင်သူတစ်ဦးဖြစ်သည့် ရိခေါဒါရ်ပြန်ကြားရေးနှင့် ပြည်သူ့ဆက်ဆံရေးဦးစီးဌာန ဒုတိယဦးစီးမှူး ဦးလာလ်ပက်လောမ်က တာချီလိတ်သတင်းအေဂျင်စီသို့ပြောသည်။

ယင်းကဲ့သို့ ပိတ်လိုက်ခြင်းကြောင့် မြန်မာနိုင်ငံဖက်မှ အဓိကပို့ကုန်ဖြစ်သည့် ကွမ်းသီးတင်ပို့မှုအား ရပ်နားခဲ့ရပြီး နှစ်နိုင်ငံ ကုန်စည်တင်ပို့မှုများမှာ လတ်တလောတွင် လူအင်အားကို အသုံးပြုတင်ပို့နေကြကြောင်း သိရသည်။

မော်တော်ယာဉ်များ တံတားဖြတ်သန်းခွင့်မရသဖြင့် အဆိုပါတံတားမှ နှစ်မိုင်ခန့်အကွာရှိ ချင်းပြည်နယ်မှ ရိဒ်ရေကန်သို့ အလည်အပတ်လာနေသည့် အိန္ဒိယနိုင်ငံ၊ မီဇိုရမ်ပြည်နယ်မှ ဧည့်သည်ဝင်ရောက်မှုလည်း နည်းပါးသွားကြောင်း သိရသည်။

သတင်း #Sui Thian
ဓါတ်ပုံ #ချယ်ရီထိုက်