~~~~~~~~⊰❂ unicode ❂⊱~~~~~~~~

ကျောင်းအပ်နှံရေးသီတင်းပတ်  ပထမဆုံးနေ့အဖြစ် အခြေခံပညာကျောင်းများတွင် ကျောင်းအပ်နှံမှု စတင်လက်ခံ
****************
၂၀၁၈-၂၀၁၉ ပညာသင်နှစ် ကျောင်းအပ်နှံခြင်း ပထမရက်အဖြစ် အခြေခံပညာကျောင်းများတွင်၂၀၁၈ ခုနှစ် မေလ (၂၅)ရက်နေ့မှ စတင်အပ်နှံနေကြပြီး မူလတန်းကျောင်းသားများအတွက် ဗလာစာအုပ်၊ ကျောင်းသုံးစာအုပ်နှင့် ကျောင်းဝတ်စုံကို အခမဲ့ပံ့ပိုးပေးထားကြောင်း သိရသည်။

“ကျောင်းဝတ်စုံတွေကို မူလတန်းမှာ KG ကနေ စတုတ္ထတန်းအထိ ပေးပါတယ်။ KG ကတော့ ကလေးတွေ ကျောင်းပျော်လာအောင် သီချင်းဆိုတာ စာသင်ကြတာဆိုတော့ သူတို့ကိုတော့ စာအုပ်တွေနဲ့ စာရေးတာတွေ မသင်သေးဘူးရှင့်။ ပထမတန်းကနေ စတုတ္ထတန်းအထိတော့ ဗလာစာအုပ်(၆)အုပ်နှုန်း၊ ကျောင်းဝတ်စုံ (၁)စုံနှုန်းနဲ့ ပုံနှိပ်စာအုပ်တွေက အခမဲ့ပါ။ ပဉ္စမတန်းကနေ ဒဿမတန်းအထိကျတော့ ဗလာစာအုပ်နဲ့ ကျောင်းဝတ်စုံတော့မပါဘူး။ ဒါပေမဲ့ ပုံနှိပ်စာအုပ်တော့ အားလုံးက အခမဲ့ပါ”ဟု ရှမ်းပြည်နယ် (အရှေ့ပိုင်း) မိုင်းဖြတ်မြို့ အခြေခံပညာအထက်တန်းကျောင်းမှ ကျောင်းအုပ် ဆရာမကြီး ဒေါ်အမာကြည်က တာချီလိတ်သတင်းအေဂျင်စီသို့ ပြောသည်။

တစ်နိုင်ငံလုံးရှိ အခြေခံပညာကျောင်းများတွင် ကျောင်းနေအရွယ်ကလေးတိုင်း ကျောင်းအပ်နှံရေး သီတင်းပတ်အဖြစ် ၂၀၁၈ ခုနှစ် မေလ (၂၅)ရက်နေ့မှ မေလ (၃၁)ရက်နေ့အထိသတ်မှတ်ပြီး အခမဲ့ကျောင်းအပ်နှံမှုကို လက်ခံနေခြင်းဖြစ်သည်။

 ရှမ်းပြည်နယ်(အရှေ့ပိုင်း)  တာချီလိတ်ခရိုင်  မိုင်းဖြတ်မြို့နယ်အတွင်းရှိ အခြေခံပညာကျောင်းများတွင် ကျောင်းအပ်နှံရေးပထမနေ့၏ ကျောင်းအပ်နှံမှုအခြေအနေများကို မြို့နယ်စီမံခန့်ခွဲမှု ကော်မတီနှင့် ဌာနဆိုင်ရာအကြီးအကဲများက ကျောင်းများသို့ လိုက်လံကြည့်ရှုခဲ့ကြကြောင်း သိရသည်။

သတင်း၊ဓါတ်ပုံ #ကိုသာ