~~~~~~~~⊰❂ unicode ❂⊱~~~~~~~~

ကြားဖြတ်ရွေးကောက်ပွဲအတွက် ကိုယ်စားလှယ်လောင်းအမည်စာရင်းများကို ဇူလိုင်လ ၂ ရက်နေ့တွင် စတင် တင်သွင်းရမည်
***************
မဲဆန္ဒနယ် (၁၃)နေရာအတွက် ၂၀၁၈ ခုနှစ် နိုဝင်ဘာလ (၃)ရက်နေ့တွင်ကျင်းပမည့် ကြားဖြတ်ရွေးကောက်ပွဲ အတွက် ကိုယ်စားလှယ်လောင်းအမည်စာရင်းများကို ဇူလိုင်လ(၂)ရက်နေ့မှ ဇူလိုင်လ (၁၁)ရက်နေ့အထိ တင်သွင်းနိုင်ပြီဖြစ်ကြောင်း ပြည်ထောင်စုရွေးကောက်ပွဲကော်မရှင်လ မေလ (၂၅)ရက်နေ့တွင် ကြေညာလိုက်သည်။

သက်ဆိုင်ရာလွှတ်တော်အသီးသီး၏ မဲဆန္ဒနယ်များအတွက် လွှတ်တော်ကိုယ်စားလှယ်လောင်း အမည်စာရင်းတင်သွင်းခြင်းကို ၂၀၁၈ ခုနှစ် ဇူလိုင်လ (၂)ရက်နေ့မှ ဇူလိုင်လ(၁၁)ရက်နေ့အထိ အမည်စာရင်း တင်သွင်းနိုင်ပြီး အမည်စာရင်း တင်သွင်းလွှာများ ရုပ်သိမ်းလိုပါက ရုပ်သိမ်းခြင်းကို ဇူလိုင်လ (၁၃)ရက်နေ့ နောက်ဆုံးထား၍ ရုပ်သိမ်းနိုင်ကာ ကိုယ်စားလှယ်လောင်းအမည်စာရင်း တင်သွင်းလွှာများ စိစစ်ခြင်းကို ဇူလိုင်လ (၁၆)ရက်နေ့မှ (၂၂)ရက်နေ့အထိ ဆောင်ရွက်သွားမည်ဖြစ်ကြောင်း ကော်မရှင်က ကြေညာချက်အမှတ် (၇၃/၂၀၁၈) ဖြင့် မေလ (၂၅)ရက်နေ့တွင် ထုတ်ပြန်ကြေညာလိုက်ခြင်းဖြစ်သည်။

လွှတ်တော်အသီးသီးတွင် လွှတ်တော်ကိုယ်စားလှယ်လစ်လပ်နေသော မဲဆန္ဒနယ် (၁၃)နေရာအတွက် ၂၀၁၈ ခုနှစ် နိုဝင်ဘာလ (၃)ရက်နေ့တွင် ကြားဖြတ်ရွေးကောက်ပွဲများ ကျင်းပမည်ဖြစ်ကြောင်း မေလ (၈)ရက်နေ့တွင် ပြည်ထောင်စုရွေးကောက်ပွဲကော်မရှင်က ထုတ်ပြန်ထားခြင်းဖြစ်သည်။

လွှတ်တော်ကိုယ်စားလှယ်လစ်လပ်နေသည့် မဲဆန္ဒနယ်များဖြစ်သည့် ပြည်သူ့လွှတ်တော်အတွက် ကန်ပက်လက်၊ လဲချား၊ တာမွေ နှင့် မြင်းခြံတို့တွင် လည်းကောင်း၊ အမျိုးသားလွှတ်တော်အတွက် ကချင်ပြည်နယ်၊ အမျိုးသားလွှတ်တော် မဲဆန္ဒနယ်အမှတ်(၂) မြစ်ကြီးနားမြို့တွင် လည်းကောင်း၊ တိုင်းဒေသကြီးနှင့် ပြည်နယ်အတွက် မတူပီ၊ တမူး၊ အုတ်တွင်း၊ သပိတ်ကျင်း၊ ရသေ့တောင်၊ မင်းဘူး၊ ဆိပ်ကမ်းနှင့် မန္တလေးတိုင်းဒေသကြီးလွှတ်တော် ရှမ်းတိုင်းရင်းသားလူမျိုးမဲဆန္ဒနယ်အတွက် မန္တလေးတိုင်းဒေသကြီး (ပြည်ထောင်စုနယ်မြေမှအပ)တို့တွင် ကျင်းပသွားမည်ဖြစ်ကြောင်း သိရသည်။

သတင်း #အင်မိုင်ခ