~~~~~~~~⊰❂ unicode ❂⊱~~~~~~~~

သွေးလွန်တုပ်ကွေးရောဂါကာကွယ်ရေးအတွက် ဆေးမှုတ်ခြင်းလုပ်ငန်းများကို ခြင်များဆေးယဉ်ပါးမှု မဖြစ်စေရန်အတွက် အမှန်တကယ်လိုအပ်သည့် အချိန်မှသာ ဆောင်ရွက်မည်ဖြစ်ကြောင်း သိရသည်။

“ဆေးမှုတ်တာနဲ့ ပတ်သက်ပြီးတော့ ကျွန်တော်တို့ရဲ့ ဝန်ထမ်းတွေကို တိတိကျကျ ညွှန်ကြားထားပါတယ်။ အဓိက ကတော့ သွေးလွန်တုပ်ကွေးရောဂါနဲ့ ပတ်သက်ပြီး လူနာထွက်တယ်ဆိုတော့မှ လူနာအိမ်ရဲ့ ကိုက် (၁၀၀) ပတ်ချာလည်ကို ဆေးမှုတ်စက် (၂)လုံး (၃)လုံးနဲ့ မှုတ်ဖို့ အဆင့်ဆင့် ညွှန်ကြားထားပြီးသားပါ။ ဘာလို့လဲ ဆိုတော့ ဆေးမှုတ်တယ်ဆိုတာက ရောဂါဖြစ်ပွားမှပဲ မှုတ်လို့ရတယ်။ ရောဂါဖြစ်ပွားလို့ မှုတ်ရင်တောင် တော်တော်လေးကို သတိထားရပါတယ်။ အရင်နှစ်တွေက ကျွန်တော်တို့မှာက မငြင်းနိုင်တဲ့ အနေအထားတွေရှိခဲ့တယ်။ ဒီအိမ်မှာ လာမှုတ်ပေးပါအုံး။ ဟိုအိမ်မှာ လာမှုတ်ပေးပါအုံးဆိုပြီး လာခေါ်တဲ့ အနေအထားရှိတယ်။ အဲဒီလိုအနေအထားမှာက ကျွန်တော်တို့က ဆေးကို လျှော့ထည့်တယ်။ ဒီလိုမှမဟုတ်ရင် ဆေးကို ယဉ်ပါးသွားမှာစိုးရတယ်။ ဒါကြောင့် ဒီနှစ်မှာတော့ ကျွန်တော့်ဝန်ထမ်းတွေကို ဆေးမှုတ်တာနဲ့ ပတ်သက်ပြီး အတည်ပြုလူနာတွေ့မှာသာ မှုတ်ဖို့ ညွှန်ကြားထားပါတယ်”ဟု Vector Borne Disease Control Unit Eastern Shan State မှ လက်ထောက်ညွှန်ကြားရေးမှူး ဒေါက်တာ ဘစိုးသက်က တာချီလိတ်သတင်းအေဂျင်စီသို့ ပြောသည်။

လူမှုရေးအဖွဲ့အစည်းများက ခြင်ဆေးမှုတ်သည့် စက်ပစ္စည်းများကို ဝယ်ယူကာ ခြင်ပြေးစေရန် မြောင်းများ၊ ခြံများတွင် ခြင်ဆေးမှုတ်မှုများ လုပ်ဆောင်နခြေင်းသည် ခြင်များဆေးယဉ်ပါးမှု ဖြစ်နိုင်သည့်အပြင် ခြင်ဆေးမှုတ်သည့် နည်းစနစ် မှားယွင်းပါက ရောဂါသယ်ဆောင်သည့်ခြင်များအား အခြားနေရာသို့ ပြောင်းရွှေ့စေသဖြင့် ရောဂါပျံ့ပွားမှု ပိုဖြစ်စေကြောင်း သိရသည်။

“ပြည်သူလူထုတွေဆီမှာက ခြင်ဆေးမှုတ်တာနဲ့ ပတ်သက်ပြီး အသိလွဲမှားနေတာတွေလည်း ရှိတယ်။ ဆေးမှုတ်တာက အလွန်ဆုံးခံရင် (၄၅)မိနစ်ပဲ။ ပြီးရင် ဆေးမှုန်လေးတွေက မြကြေီးပေါ်ကျသွားပြီဆိုရင် ဘာအာနိသင်မှ မရှိတော့ဘူး။ အဲဒီတော့ တချို့တွေက ဒါကို သူတို့အနေနဲ့ ကာကွယ်လိုက်ပြီလို့ ခံယူပြီးတော့ ကျွန်တော်တို့က ဒါကို False Security (လုံခြုံပြီလို့ လွဲမှားစွာ ယုံမှတ်ခြင်း) လို့ခေါ်တယ်။ ငါတို့အိမ်ကတော့ ဆေးမှုတ်ပြီးသွားပြီ။ သွေးလွန်တုပ်ကွေး မဖြစ်တော့ဘူးဆိုတဲ့ စိတ်ဝင်သွားတယ်။ ဒီစိတ်ကြောင့် ပေါ့ပေါ့ဆဆ နေလိုက်တော့ ရောဂါပိုဆိုးသွားတဲ့ အနေအထားတွေရှိတယ်။ ဆေးမှုတ်ထားပေမဲ့လည်း ဖုံး၊သွန်၊လဲ၊စစ်ဆိုတဲ့ လုပ်ငန်းကိုတော့ ပြည်သူတိုင်းက ဆောင်ရွက်ရမယ့် ကိစ္စဖြစ်ပါတယ်”ဟု Vector Borne Disease Control Unit Eastern Shan State ဟု လက်ထောက်ညွှန်ကြားရေးမှူး ဒေါက်တာဘစိုးသက်က ပြောသည်။

သွေးလွန်တုပ်ကွေးရောဂါဖြစ်ပွား၍ ခြင်ဆေးဖျန်းရန် လိုအပ်ပါက ကျန်းမာရေးဦးစီးဌာနအနဖြေင့် ခြင်ဆေးဖျန်းပေးရန် စက်နှင့် ဆေးပစ္စည်းများ ဖြည့်တင်းပေးထားပြီးဖြစ်ကြောင်း သိရသည်။

သတင်း - #ဇွဲမြတ်