~~~~~~~~⊰❂ unicode ❂⊱~~~~~~~~

လားရှိုးတွင် သစ်သားပန်းပုလက်ရာပြသရောင်းချပွဲနှင့် ဒေသတွင်း လက်မှုထုတ်ကုန်ပြပွဲ ကျင်းပမည်
**************
သစ်သားပန်းပုလက်ရာပြသရောင်းချပွဲနှင့် ဒေသတွင်း လက်မှုထုတ်ကုန်ပြသပွဲကို ရှမ်းပြည်နယ်(မြောက်ပိုင်း) လားရှိုးမြို့ရှိ လားရှိုးမိုတယ်တွင် ၂၀၁၈ ခုနှစ်၊ ဇူလိုင်လ (၂၈) ရက်နေ့၌ ကျင်းပမည်ဖြစ်ကြောင်း သိရသည်။

ပြပွဲတွင် သစ်သားပန်းပုများ၊ လားရှိုးမြို့ အိမ်တွင်းမှုသက်မွေးပညာသင်တန်းကျောင်းမှ အိမ်တွင်းမှု လက်လုပ်ပစ္စည်းများ၊ ရှမ်းရိုးရာလက်မှုပစ္စည်းအရောင်းဆိုင်မှ ရှမ်းရိုးရာအသုံးအဆောင်လက်မှုပစ္စည်းများ အပြင် မိုးကုတ်ကျောက်စီပန်းချီကားများကိုလည်း ထည့်သွင်းပြသွားမည်ဖြစ်ပြီး နံနက် (၉)နာရီမှ ညနေ (၄) နာရီအထိ မည်သူမဆို လွတ်လပ်စွာ လာရောက်ကြည့်ရှုနိုင်မည်ဖြစ်ကြောင်း သိရသည်။

 “အဓိကကတော့ မြန်မာမှုသစ်သားပန်းပုလက်ရာတွေ မတိမ်ကော၊ မပျောက်ကွယ်သွားအောင်၊ သစ်သား ပန်းပုလက်ရာတွေ အဆင့်မြင့်မြင့်တက်လှမ်းနိုင်စေဖို့ရယ် ဒေသတွင်း က လက်မှုထုတ်ကုန်ပစ္စည်းတွေကို ထုတ်ဖေါ်ပြသချင်တာကိုရည်ရွယ်ပြီးတော့ ပြုလုပ်တာဖြစ်ပါတယ်” ဟု အမှတ်တရပစ္စည်းထုတ်လုပ်၊ ဖြန့်ဖြူး၊ ရောင်းချရေးအသင်း (ရှမ်း/မြောက်)မှ အသင်းဥက္ကဌ ဦးသိန်းမင်းထွန်းက တာချီလိတ်သတင်းအေဂျင်စီ သို့ ပြောသည်။

အဆိုပါပြပွဲကို မြန်မာနိုင်ငံ ဟိုတယ်နှင့်ခရီးသွားလာရေးဝန်ကြီးဌာန၊ ဟိုတယ်နှင့်ခရီးသွားညွှန်ကြားမှု ဦးစီးဌာန လက်အောက်ရှိ အမှတ်တရပစ္စည်းထုတ်လုပ်၊ ဖြန့်ဖြူး၊ ရောင်းချရေးအသင်း( MSEA )နှင့် မြန်မာနိုင်ငံ ဟိုတယ်ဆိုင်ရာလုပ်ငန်း ရှင်များအသင်း (ရှမ်း/မြောက်) MHA (NSS) တို့ ပူးပေါင်းကျင်းပခြင်းဖြစ်ကြောင်း သိရသည်။

သတင်း #နေဖြိုးမြင့်