~~~~~~~~⊰❂ unicode ❂⊱~~~~~~~~

သင်တန်းကာလ(၇)ရက်ကြာမြင့်မည့် လူသုံးကုန်နှင့် အလှကုန်ထုတ်လုပ်မှု နည်းပညာသင်တန်းကို၂၀၁၈ ခုနှစ်၊ စက်တင်ဘာလ (၁၃)ရက်နေ့တွင် ဟဲဟိုးမြို့၌ လည်းကောင်း၊ သင်တန်းကာလ (၁၀)ရက်ကြာမြင့်မည့် တန်ဖိုးမြှင့် စားသောက်ကုန် ထုတ်လုပ်မှုနည်းပညာသင်တန်းကို စက်တင်ဘာလ (၁၉)ရက်နေ့တွင် လဲချားမြို့၌လည်းကောင်း ရှမ်းပြည်နယ်အသေးစား စက်မှုလက်မှု လုပ်ငန်းဦးစီးဌာနက ဖွင့်လှစ်သင်ကြားသွားမည်ဖြစ်ကြောင်း သိရသည်။

“သင်တန်း တက်မယ်ဆိုရင် အမည်စာရင်းပေးထားပြီး သင်တန်းတက်ရင်တော့ ကျွန်တော်တို့ဆီက လျှောက်လွှာ ဖြည့်ရုံပါပဲ။ လိုင်စင်ဓာတ်ပုံ (၂)တော့လိုပါတယ်။ သင်တန်းဆင်းရင် သင်တန်းဆင်းလက်မှတ် ချီးမြှင့်ပေးဖို့အတွက်ပါ။ သင်တန်းလျှောက်ထားခွင့်ကိုလည်း ဒေသကန့်သတ်မထားပါဘူး။ သင်တန်းကြေးက ဘာမှမကောက်ပါဘူး။ အားလုံး အခမဲ့ပါ”ဟု ရှမ်းပြည်နယ် အသေးစား စက်မှုလက်မှုလုပ်ငန်းဦးစီးဌာန ဒုတိယညွှန်ကြားရေးမှူး ဦးသက်နိုင်ဦးက တာချီလိတ်သတင်းအေဂျင်စီသို့ ပြောသည်။

အဆိုပါ သင်တန်းများမှ စီးပွားဖြစ်ထုတ်လုပ်ရောင်းချနိုင်သည် အထိ သင်ကြားပေးမည်ဖြစ်သည့်အပြင် လုပ်ငန်းထူထောင်ရန် လိုအပ်သည့် ကြံဉာဏ်နှင့် ကူညီပံ့ပိုးမှုများပေးမည်ဖြစ်ကြောင်းသိရပြီး အသက် (၁၆)နှစ်အထက် အလယ်တန်းအဆင့်ရှိသူ ကျားမ မရွေးတက်ရောက်နိုင်ကြောင်း သိရသည်။

လူသုံးကုန်နှင့် အလှကုန်ထုတ်လုပ်မှု နည်းပညာသင်တန်းတွင် ဆပ်ပြာရည်၊ ဆပ်ပြာဆီ၊ lotion၊ ပေါင်ဒါ၊ ဆပ်ပြာခဲ၊ ခေါင်းလျှော်ရည်။ အဝတ်လျှော်ဆပ်ပြာ၊ ပန်းကန်ဆေးဆပ်ပြာစသည့် လူသုံးကုန်နှင့် အလှကုန်ပစ္စည်း ထုတ်လုပ်မှုနည်းပညာများကိုလည်းကောင်း တန်ဖိုးမြှင့်စားသောက်ကုန် ထုတ်လုပ်မှု နည်းပညာ သင်တန်းတွင် ဂျုံ၊ဆန်ဖြင့်ပြုလုပ်သော ကိတ်မျိုးစုံ၊ ကွတ်ကီးအမျိုးမျိုး၊ နန်ကထိုင်၊ လျှာပေါ်ဝဲ၊ ငါးမုန့်ခြောက်၊ ကြက်သွန်ပေါင်းကြော်၊ တို့ဟူးပေါင်းကြော်များ ထုတ်လုပ်ခြင်းနှင့် သစ်သီးဖျော်ရည်မျိုးစုံ၊ သစ်သီးယိုမျိုးစုံနှင့် သစ်သီးဝိုင်၊ သစ်သီးဆော့(စ်)ပြုလုပ်နည်းများကို ရှမ်းပြည်နယ်အသေးစား စက်မှုလက်မှု လုပ်ငန်းဦးစီးဌာနမှ ကျွမ်းကျင်နည်းပြများကိုယ်တိုင် သင်ကြားပို့ချပေးမည်ဖြစ်ကြောင်း သိရပြီး သင်တန်းဆင်း လက်မှတ်လည်း ပေးအပ်သွားမည်ဖြစ်ကြောင်း သိရသည်။

သင်တန်းလျှောက်ထားလိုသူများအနဖြေင့် 081206829၊ 09420730130၊ 094207201599၊ 0812121614 တို့သို့ ဆက်သွယ်၍ မေးမြန်း ေလျှာက်ထားနိုင်ကြောင်း သိရသည်။

Tachileik News Agency