~~~~~~~~⊰❂ unicode ❂⊱~~~~~~~~

ရှမ်းပြည်နယ်(မြောက်ပိုင်း) မန္တလေး - မူဆယ် ပြည်ထောင်စုလမ်းမကြီး ဂုတ်တွင်းလမ်းပိုင်းရှိ နောင်ချိုဘက်အခြမ်းမှ နံပါတ် (၇) အကွေ့ ( ကုလားမကွေ့ )တွင် (၂၂) ဘီးယာဉ်တစ်စီး ၂၀၁၈ခုနှစ် စက်တင်ဘာ (၂၁) ရက် နေ့လယ်ပိုင်းက တိမ်းမှောက်နေသည့် အတွက် (၁၄) ပေနှင့် အောက်ယာဉ်ငယ်များသာ ဖြတ်သန်း သွားလာနိုင်ပြီး ယာဉ်ကြီးများ ဖြတ်သန်းမှု ယာယီပိတ်ထားကြောင်း အမှတ်(၁၂၂) ယာဉ်ထိန်းရဲတပ်ဖွဲ့စု (ကျောက်မဲ)ထံက သိရသည်။

“လမ်းကြောက အကုန်လုံး ပိတ်သွားတာ မဟုတ်ပါဘူး။ (၆)ဘီးယာဉ်နဲ့ ကားငယ်တွေသွားလို့ရတယ်။ လောလောဆယ်က (၁၂) ဘီး၊ (၂၂) ဘီး၊ Express ယာဉ်တွေကို ယာယီတားထားတယ်။ နေ့ခင်း (၁၁) နာရီ (၁၅)မိနစ်လောက်က နောင်ချိုဘက်အခြမ်း ကုလားမကွေ့မှာ တွဲတစ်စီးလဲသွားလို့ ပိတ်သွားတာ ” ဟု အမှတ် (၁၂၂) ယာဉ်ထိန်းရဲ တပ်ဖွဲ့စု ကျောက်မဲမှ တပ်ကြပ်ကြီး သန်းကြွယ်က တာချီလိတ်သတင်း အေဂျင်စီသို့ ပြောသည်။

နောင်ချိုဘက်မှ မူဆယ်ဘက်သို့ ကော်ဖြတ်စ အိတ်များ တင်ဆောင်လာသည့် (၂၂) ဘီးယာဉ်မှာ ဂုတ်တွင်းလမ်း အဆင်းရှိ နံပါတ်(၇)အကွေ့(ကုလားမကွေ့)တွင် ကွေ့ဆင်းစဉ် နောက်တွဲ လဲကျတိမ်းမှောက်ခဲ့သည့် အတွက် တင်ဆောင်လာသည့် ကုန်များလည်းပြုတ်ကျကာ ဖယ်ရှားနိုင်ရေး လုပ်ဆောင်နေဆဲဖြစ်ကြောင်း သိရသည်။

အဆိုပါ နံပါတ်(၇)အကွေ့တွင် ဆီတင်ဘောက်ဆာယာဉ်များနှင့် (၂၂) ဘီး နောက်တွဲယာဉ်များ မကြာခဏ တိမ်းမှောက်သည့်အတွက် လမ်းပိုင်းအား တာဝန်ယူဆောင်ရွက်နေသည့် Oriental Highway Co.ltd က သြဂုတ်လအတွင်း၎င်းအကွေ့အား ထပ်ပိုးလွှာခင်းကာ ပြန်လည်ပြင်ဆင်မှုပြုလုပ်ထားသော်လည်း ယာဉ်တိမ်းမှောက်မှုမှာ သိသာစွာလျော့ကျခြင်းမရှိသေးကြောင်း ယာဉ်မောင်းများထံမှ သိရသည်။

လက်တလောတွင် လမ်းပိတ်နေသည့် ယာဉ်နှင့် ကုန်ပစ္စည်းများအား ရွှေ့ပြောင်းရှင်းလင်းရန်နှင့် ယာဉ်ကြောထပ်မံပိတ်ဆို့မှု မဖြစ်စေရန်အတွက် ယာဉ်ထိန်း ရဲတပ်ဖွဲ့ဝင်များက ထိန်းသိမ်းရှင်းလင်းရေး လုပ်ဆောင်ပေးနေကြောင်း သိရသည်။

သတင်း - နဖြေိုးမြင့်
ဓာတ်ပုံ - ကိုနေ