~~~~~~~~⊰❂ unicode ❂⊱~~~~~~~~

ရဲတပ်ဖွဲ့နေ့တွင် အမှုထမ်းကောင်းဆုများချီးမြှင့်လိုက်ပြီး ဥပဒေနှင့်မညီသည့် ရဲတပ်ဖွဲ့ဝင်များ ပြုပြင်ကြရန် ရဲချုပ်တိုက်တွန်း
*************
ရဲတပ်ဖွဲ့ဝင်များအနေဖြင့် ဥပဒေနှင့်မညီသည့် လုပ်ရပ်များကြောင့် တပ်ဖွဲ့ဂုဏ်သိက္ခာညှိးနွမ်းကျဆင်းစေသဖြင့် အပြစ်ပေးအရေးယူရသည့် ဖြစ်စဉ်များရှိနေသေး၍ ပြန်လည်ဆင်ခြင်သုံးသပ်ပြီး ကိုယ်စီပြုပြင် ထိန်းသိမ်း သွားကြရန် မြန်မာနိုင်ငံရဲတပ်ဖွဲ့ ရဲချုပ်၊ ဒုတိယရဲဗိုလ်ချုပ်ကြီး အောင်ဝင်းဦးက တိုက်တွန်းလိုက်သည်။

“ရဲတပ်ဖွဲ့ဝင်အဆင့်တိုင်းဟာ မိမိရရှိထားတဲ့ ရာထူးလုပ်ပိုင်ခွင့်ကိုအသုံးချ၍ အဂတိပြုလုပ်ခြင်းကိုရှောင်ကျဉ်ပြီး လုပ်ထုံးလုပ်နည်းများနဲ့အညီ ဆောင်ရွက်နိုင်တဲ့ တပ်ဖွဲ့ဝင်ကောင်းတွေဖြစ်အောင် ကိုယ်တိုင်ခံယူချက်ရှိကြဖို့၊ အဆင့်ဆင့်သော ကွပ်ကဲသူများက ကြပ်မတ်ကြဖို့ မှာကြားလိုပါတယ်”ဟု ရဲချုပ်၏သဝဏ်လွှာတွင် တိုက်တွန်းလိုက်သည်။

၂၀၁၈ ခုနှစ်၊ အောက်တိုဘာလ(၁)ရက်နေ့တွင် ကျရောက်သည့် (၅၄)နှစ်မြောက် မြန်မာနိုင်ငံရဲတပ်ဖွဲ့ နှစ်ပတ်လည်နေ့အခမ်းအနားကို ရှမ်းပြည်နယ်(အရှေ့ပိုင်း) တာချီလိတ်မြို့၌ ကျင်းပရာ တာချီလိတ်ခရိုင် ရဲတပ်ဖွဲ့မှူး ဒုတိယရဲမှူးကြီးပေါ်ထွန်းက ရဲချုပ်၏သဝဏ်လွှာဖတ်ကြားခဲ့ခြင်းဖြစ်သည်။

“ဝန်ဆောင်မှုကိုရှေးရှုတဲ့ ရဲလုပ်ငန်းစနစ်ကိုဖေါ်ဆောင်ရာမှာ ရဲတပ်ဖွဲ့ဟာ ပြည်သူများကို ဝန်ဆောင်မှုပေးနေခြင်းဖြစ်တယ်ဆိုတဲ့အသိနဲ့ နိုင်ငံသားပြည်သူများကို အလေးထားဆက်ဆံပြီး အကူအညီပေးကြရမှာဖြစ်တယ်။ ဒီလိုဆောင်ရွက်မှုတွေကြောင့် ရဲတပ်ဖွဲ့အပေါ် ပြည်သူက အမြင်ကြည်လင်ပြီး စစ်မှန်ကောင်းမွန်တဲ့ တုန့်ပြန်မှုတွေ ရရှိနိုင်မယ်ဆိုတာကိုလည်း ရဲတပ်ဖွဲ့ဝင်တွေ သိရှိထားဖို့လိုတယ်”ဟု တာချီလိတ်ခရိုင် ရဲတပ်ဖွဲ့မှူး ဒုတိယရဲမှူးကြီးပေါ်ထွန်းက အခမ်းအနားသဝဏ်လွှာဖတ်ကြားခဲ့သည်။

တာချီလိတ်တွင် ကျင်းပသည့် မြန်မာနိုင်ငံရဲတပ်ဖွဲ့ နှစ်ပတ်လည်နေ့အခမ်းအနားတွင် ရဲချုပ်က ချီးမြှင့်သည့် အမှုထမ်းကောင်းလက်မှတ်များကို တာချီလိတ်မြို့တွင်း သေနတ်ပစ်ခတ်မှုများကို အချိန်တိုအတွင်း ဖေါ်ထုတ်ဖမ်းဆီးမှုနှစ်ခုမှ ရဲတပ်ဖွဲ့ဝင်များအား ချီးမြှင့်ခဲ့သည်။

တာချီလိတ်မြို့တွင်း သေနတ်ဖြင့် ဝင်ရောက်ပစ်ခတ်မှုကြောင့် တစ်ဦးသေပြီး တစ်ဦးဒဏ်ရာရသည့်အမှုမှ တရားခံများကို (၃)နာရီအတွင်း ဖေါ်ထုတ်နိုင်ခဲ့သည့် တာချီလိတ်ခရိုင် လုံခြုံရေးတပ်ခွဲမှူး ဒုရဲမှူးစံသိန်း၊ ရဲအုပ် အေးထွန်းသိန်း၊ ရဲအုပ်သောင်းရွှေ၊ ရဲအုပ်ချမ်းမြေ့အောင်၊ ရဲတပ်ကြပ်ကြီး ကျော်စွာအောင်၊ ရဲတပ်ကြပ် ထွန်းဝင်းဇော်၊ ရဲတပ်ကြပ် ဇော်နိုင်ထွန်းနှင့် ရဲတပ်သားထွန်းလင်းတို့အားလည်းကောင်း တာချီလိတ်မြို့တွင်း ရွှေဆိုင်အတွင်း သေနတ်ဖြင့် ပစ်ခတ်လုယက်မှုကို ဖေါ်ထုတ်ဖမ်းဆီးသည့် တာချီလိတ်မြို့မရဲစခန်းမှူး ဒုရဲမှူးမျိုးခိုင်၊ ရဲအုပ်အေးလွင်၊ ဒုရဲအုပ်ကျော်သူရိန်ထွန်း၊ ရဲတပ်ကြပ်ကြီး အောင်သန်းဝင်း၊ ရဲတပ်ကြပ်ထွန်းဝင်းဇော်၊ ရဲတပ်ကြပ်မျိုးကျော်၊ ရဲတပ်ကြပ်မောင်ဌေး၊ ရဲတပ်သားငြိမ်းမြင့်သူနှင့် ရဲတပ်သား ယာဆူတို့အားလည်းကောင်း ရဲချုပ်၏ အမှုထမ်းကောင်းလက်မှတ်များကို ချီးမြှင့်ခြင်းဖြစ်သည်။

ပြည်နယ်ရဲတပ်ဖွဲ့မှူးချီးမြှင့်သည့် အမှုထမ်းကောင်းလက်မှတ်ကို တာချီလိတ်မြို့တွင်း သေနတ်ပစ်ခတ်မှုအား (၃)နာရီအတွင်း ဖေါ်ထုတ်ရာတွင် ပူးပေါင်းဆောင်ရွက်ခဲ့သည့် တာချီလိတ်မြို့မစခန်းမှူး ဒုရဲမှူး မျိုးခိုင်၊ ရဲအုပ်အေးလွင်၊ ရဲအုပ်အောင်ဆန်းဦး၊ ဒုရဲအုပ်ဇော်ဇော်၊ ရဲတပ်ကြပ်ကြီးသိန်းဇော်၊ ရဲတပ်ကြပ်ကြီး အောင်သန်းဝင်း၊ ရဲတပ်ကြပ်ထိန်လင်းအောင်၊ ရဲတပ်ကြပ်မောင်ဌေးနှင့် ရဲတပ်သား ငြိမ်းမြင်သူတို့အဖွဲ့၊ အိုက်စ်ကီလို(၂၀၀)ကျော်ကို ဖမ်းဆီးရမိခဲ့သည့် မူးယစ်တပ်ဖွဲ့စု(၃၀)မှ ရဲတပ်ကြပ်ဝဏ္ဏတို့အား ချီးမြှင့်ခဲ့သည်။
ရဲတပ်ဖွဲ့ဝင် (၃၈)ဦးအား ခရိုင်ရဲတပ်ဖွဲ့မှူးက ဆုချီးမြှင့်ခဲ့ပြီး မိသားစုစည်းရုံးရေးနှင့် စည်းကမ်းထိန်းသိမ်းရေးဆုများကို ရဲတပ်ဖွဲ့ဝင်များ၏ မိသားစုဝင် (၅)ဦးနှင့် စိုက်ပျိုးမွေးမြူရေးဆုကို ရဲတပ်ဖွဲ့ဝင်များ၏ မိသားစုဝင် (၅)ဦးတို့အား အသီးသီး ဆုများချီးမြှင့်ပေးသည်ကို တွေ့ရသည်။

ဂုဏ်ပြုဆုများကို တာချီလိတ်စစ်ဗျူဟာ(အခြေချ) စစ်ဗျူဟာမှူး ဗိုလ်မှူးကြီး အေးမင်းဦး၊ တာချီလိတ်ခရိုင်အုပ်ချုပ်ရေးမှူး ဦးမြင့်နိုင်၊ တာချီလိတ်ခရိုင်ရဲတပ်ဖွဲ့မှူး ဒုတိယရဲမှူးကြီး ပေါ်ထွန်း၊ တာချီလိတ်ခရိုင် မိသားစုစည်းရုံးရေးနှင့် စည်းကမ်းထိန်းသိမ်းရေးကော်မတီ ဥက္ကဌ ဒေါ်ခင်ရွှေရည်ဝင်း၊ တာချီလိတ်ခရိုင် ဒုခရိုင်ရဲတပ်ဖွဲ့မှူး ရဲမှူးအုန်းလွင်၏ ဇနီး ဒေါ်ငြိမ်းငြိမ်းတို့က ချီးမြှင့်ပေးခြင်းဖြစ်သည်။

Tachileik News Agency
ဓါတ်ပုံ -အောင်ကျော်ဝင်းစိန်၊ Tachileik News Agency