~~~~~~~~⊰❂ unicode ❂⊱~~~~~~~~

VIP အတွက်စီစဉ်ပေးရသည့်အခန်းခနှင့် အာမခံစပေါ်ငွေ ပြန်လည်ရလိုမှုဖြင့် နမ္မဒါတည်းခိုဆောင်လုပ်ငန်းရှင်က ရွှေစက်တော်ဘုရားဂေါပက ဥက္ကဋ္ဌအား တရားစွဲဆို
*************
ရွှေစက်တော်ဘုရား ဂေါပကအဖွဲ့ဥက္ကဋ္ဌအား နမ္မဒါ(၁)တည်းခိုဆောင်လုပ်ငန်းရှင်တစ်ဦးက လုပ်ငန်းအာမခံ စပေါ်တင်သွင်းငွေ ကျပ်သိန်း(၁၀၀) နှင့် တည်းခိုခန်းခ ကျသင့်ငွေ ကျပ်(၉၆)သိန်းရလိုမှုဖြင့် မင်းဘူးမြို့နယ်တရား ရုံးတွင် တရားစွဲဆိုထားကြောင်းသိရသည်။

“ပြီးခဲ့တဲ့၂၀၁၈ ခုနှစ် ဘုရားပွဲတော်ရာသီမှာ နမ္မဒါ(၁)တည်းခိုဆောင်လုပ်ငန်းကို သတ်မှတ်စည်းကမ်းချက် တွေနဲ့အညီ သတ်မှတ်နှုန်းထားနဲ့ ရယူလုပ်ကိုင်ခဲ့တာပါ။ အဲဒီလိုရယူတဲ့နေရာမှာ စည်းကမ်းချက်ဖောက်ဖျက်ရင် ဒဏ်ငွေတပ်ရိုက်နိုင်ဖို့အတွက် အာမခံစပေါ်ငွေ ကျပ်သိန်း(၁၀၀) တင်ထားရပါတယ်။ ဘာစည်းကမ်း ဖောက်ဖျက်မှုမှ မရှိဘဲနဲ့ အာမခံစပေါ်ငွေကို ပြန်ထုတ်မပေးတာကြောင့်ရယ် ဘုရားပွဲတော်ရာသီအတွင်း ဂေါပကအဖွဲ့ဥက္ကဋ္ဌက ဖုန်းနဲ့တစ်မျိုး၊ စာနဲ့တစ်မျိုး လူကြီးတွေအတွက်ဆိုပြီး တည်းခိုခန်းစီစဉ်ပေးဖို့ တောင်းခံချက်အရ စီစဉ်ပေးခဲ့ရပါတယ်။ အဲဒီအခန်းတွေအတွက်အခန်းခကျသင့်ငွေ (၉၆)သိန်းကိုလည်း ပေးချေခြင်းမရှိခဲ့တဲ့အတွက် စက်တင်ဘာလ(၁၄) ရက်နေ့က တရားစွဲဆိုခဲ့ခြင်းဖြစ်ပါတယ်”ဟု နမ္မဒါတည်းခိုဆောင်လုပ်ငန်းရှင် ဦးကျော်နိုင်ဦးက တာချီလိတ်သတင်းအေဂျင်စီသို့ ပြောသည်။

ယခင်ကတည်းက ရွှေစက်တော်ဘုရားပွဲတော်တွင် နိုင်ငံတော်အဆင့်နှင့် တိုင်းဒေသကြီးအဆင့်မှ တာဝန်ရှိသူများနှင့် မိသားစုများ လာရောက်ပါက နမ္မဒါတည်းခိုဆောင်၌ VIP အနေဖြင့် စီစဉ်ပေးရလေ့ရှိခဲ့သည်ဟု ရွှေစက်တော်ဘုရာဂေါပကအဖွဲ့ ဥက္ကဋ္ဌ ဦးသိန်းလှိုင်ကဆိုသည်။

“နိုင်ငံတော်အဆင့်၊ တိုင်းဒေသကြီးအဆင့်ကအစိုးရအဖွဲ့ အကြီးအကဲတွေ၊ ဝန်ကြီးအဆင့်နဲ့မိသားစုတွေလာရင် တည်းဖို့ခိုဖို့ ရှေးအစဉ်အဆက်ကအတိုင်း စီစဉ်ပေးကြရပါတယ်။ အခု၂၀၁၈ဘုရားပွဲတော်ရာသီမှာလည်း VIP အတွက် နမ္မဒါ(၁)က တည်းခိုဆောင်(၄)လုံး၊ နမ္မဒါ(၂)က (၄)လုံး ပေးဖို့ နှုတ်ကတိနဲ့ သဘောတူထားခဲ့ကြတာပါ။ အဲဒီ VIP တည်းခိုခန်းပေးရတာနဲ့ပတ်သက်ပြီး နမ္မဒါ(၂)က ဘာပြဿနာမှမလုပ်ခဲ့ဘဲ ဘုရားပွဲတော်မပြီးခင် ဧပြီလ (၆) ရက်နေ့မှာ နမ္မဒါ(၁)တည်းခိုဆောင်လုပ်ငန်းရှင် ဦးကျော်နိုင်ဦးက ဘုမသိဘမသိနဲ့ လူကြီးတွေတည်းခိုတဲ့ ကျသင့်ခ (၉၆)သိန်းပေးဖို့ လူမှုရေးဝန်ကြီးဒေါက်တာခင်မောင်အေးဆီကို တောင်းခံခဲ့ပြီး အာမခံစပေါ်တင်ထားငွေ ကျပ်သိန်း (၁၀၀)ကိုလည်း ပြန်ပေးဖို့ သြဂုတ်လ(၂၀)ရက်နေ့မှာ ဂေါပကဥက္ကဋ္ဌကိုလိပ်မူပြီး အဲဒီငွေကိုဥက္ကဋ္ဌက ပေးချေရမယ်ဆိုပြီး စာနဲ့ တောင်းခံခဲ့တာပါ။ အဲဒါမပေးလို့ဆိုပြီး တရားစွဲတာပါပဲ” ဟု ရွှေစက်တော်ဘုရာဂေါပကအဖွဲ့ ဥက္ကဋ္ဌ ဦးသိန်းလှိုင်က ပြောသည်။

အာမခံစပေါ်ငွေ ပြန်မရခြင်းမှာ နမ္မဒါ(၁)ကို လုပ်ကိုင်ခဲ့သည့် တင်ထားငွေနှင့်ပတ်သက်၍ ဦးကျော်နိုင်ဦးက သတ်မှတ်ထားသည်ထက် အခန်းပိုဆောက်ထားသဖြင့် ဒဏ်ငွေ ကျပ်သိန်း(၁၅၀) ပေးဆောင်ရမည်ဖြစ်ရာ အာမခံစပေါ်ငွေအပြင် ကျပ်သိန်း(၅၀) ထပ်မံပေးသွင်းရန် ကျန်ရှိနေသေးကြောင်း ဂေါပကအဖွဲ့ထံမှ သိရသည်။

ဦးကျော်နိုင်ဦးက အခန်းခငွေ ကျပ်(၉၆)သိန်းရလိုမှု၊ အာမခံစပေါ်ငွေ ကျပ်သိန်း(၁၀၀) ပြန်လည်ရလိုမှုတို့ဖြင့် မင်းဘူးမြို့နယ်တရားရုံးသို့ တရားမကြီးအမှုအမှတ် ၉၀/၂၀၁၈ ဖြင့်လည်းကောင်း၊ ၉၁/၂၀၁၈ ဖြင့်လည်းကောင်း တရားစွဲဆိုထားသည့်အပေါ် ဂေါပကအဖွဲ့ဥက္ကဌ ဦးသိန်းလှိုင်က အောက်တိုဘာ(၈)ရက်နေ့ရုံးချိန်း၌ ရှေ့နေဖြင့် ချေပလွှာ ပြန်တင်သွားမည်ဖြစ်ကြောင်း သိရသည်။
သတင်း#ဖီးနစ်