photo: LA 

~~~~~~~~⊰❂ unicode ❂⊱~~~~~~~~

ထိုင်းနိုင်ငံရောက် မြန်မာလုပ်သားများအတွက် Date Collecting စင်တာတစ်ခုကို စမုစခွန်ခရိုင်တွင် ဖွင့်လှစ်မည်
************
ထိုင်းနိုင်ငံရောက် မြန်မာလုပ်သားများ ယာယီနိုင်ငံကူးလက်မှတ်သက်တမ်းတိုးခြင်းကို ထိုင်းနိုင်ငံဆိုင်ရာ မြန်မာသံရုံးတွင် မြန်မာနိုင်ငံကူးလက်မှတ်ထုတ်ပေးရေးဌာနစိတ်(မနလ)ဖွင့်လှစ်၍ အထူးကိစ္စရပ်အနေဖြင့် ဆောင်ရွက်ပေးနေပြီး မြန်မာလုပ်သားအများစုရှိသည့် စမုစခွန်ခရိုင်တွင်လည်း နိုင်ငံကူးလက်မှတ် ထုတ်ယူနိုင်မည့် Data Collection Center ဖွင့်လှစ်သွားမည်ဖြစ်ကြောင်း သိရသည်။

ထိုင်းနိုင်ငံရောက် မြန်မာလုပ်သားများအား ၂၀၁၄ ခုနှစ်ကထုတ်ပေးထားသည့် ယာယီနိုင်ငံကူးလက်မှတ် (Temporary Passport) များမှာ မကြာမီသက်တမ်းကုန်ဆုံးတော့မည်ဖြစ်ရာ သက်တမ်းတိုးခြင်းကို မြန်မာသံရုံးတွင် လုပ်ပေးမည်ဖြစ်သော်လည်း လဲလှယ်ရမည့် အလုပ်သမားအရေအတွက်များပြားပြီး အလုပ်သမားများ နိုင်ငံကူးလက်မှတ် ပိုမိုအဆင်ပြေစွာထုတ်ယူရန်အတွက် Data Collection Center ကို ထိုင်းနိုင်ငံ၊ စမုစခွန်ခရိုင်တွင် ဖွင့်လှစ်နိုင်ရေး မြန်မာ၊ ထိုင်း နှစ်နိုင်ငံတာဝန်ရှိသူများက စီစဉ်ခြင်းဖြစ်ကြောင်း သိရသည်။

အဆိုပါစင်တာဖွင့်လှစ်မည့်ရက်ကို သက်ဆိုင်ရာတာဝန်ရှိသူများက အတိအကျပြောကြားထားခြင်း မရှိသေးသော်လည်း အဆိုပါစင်တာတွင် ယာယီနိုင်ငံကူးလက်မှတ် (ခရမ်းရောင်)များ သက်တမ်းတိုးခြင်း၊ MOU ဖြင့်လာရောက်ပြီး (၄) နှစ်ပြည့်ပြီးနောက် နိုင်ငံကူးလက်မှတ်သက်တမ်းတိုးခြင်းများကို လုပ်ဆောင်ပေးသွားမည်ဖြစ်ကြောင်း သိရသည်။

ထိုင်းနိုင်ငံ ရနောင်းမြို့တွင်လည်း ၂၀၁၈ ခုနှစ်၊ သြဂုတ်လ(၂၃)ရက်နေ့က မြန်မာ - ထိုင်းနှစ်နိုင်ငံညှိနှိုင်းမှုဖြင့် ဆိုက်ရောက်ခြင်းနှင့် ပြန်လည်ပေါင်းစည်းရေးစင်တာအား ဖွင့်လှစ်ထားပြီး အဆိုပါစင်တာတွင် ထိုင်းနိုင်ငံတောင်ပိုင်းသို့လာရောက် အလုပ်လုပ်ကိုင်ကြမည့် မြန်မာလုပ်သားများနှင့် မြန်မာနိုင်ငံသို့ ပြန်လည်ထွက်ခွာကြမည့် မြန်မာလုပ်သားများ ဗီဇာတုံးထုခြင်း၊ workpermit ဆောင်ရွက်ပေးခြင်း၊ အထောက်အထားမပြည့်စုံ၍ တရားမဝင်လုပ်သားဖြစ်နေသူများ နေရပ်ပြန်နိုင်ရေး ဆောင်ရွက်ပေးခြင်း၊ ထိုင်းနိုင်ငံတွင်း ရေလုပ်ငန်းခွင်မှ မြန်မာလုပ်သားများ နေထိုင်ခွင့်သက်တမ်း မကုန်မီ ပြန်လည်ထွက်ခွာခြင်း၊ passport နှင့် စာရွက်စာတမ်းများ ဆောင်ရွက်ခြင်း နှင့် MOU စနစ်ဖြင့်ပြန်လည် ဝင်ရောက် ခြင်းများအား  ဆောင်ရွက်ပေးနေကြေင်း သိရသည်။

ယင်းအပြင် ရွှေ့ပြောင်းမြန်မာလုပ်သားများ အကူအညီတောင်းခံနိုင်ရန်နှင့် သက်ဆိုင်ရာ နိုင်ငံ၏ဥပဒေအတိုင်း ဆွေးနွေးတိုင်ပင်နိုင်ရန် အလုပ်သမားသံအရာရှိ( ရနောင်း ) ၏ ရုံးခန်းခွဲကိုလည်း အဆိုပါစခန်းအတွင်း ဖွင့်လှစ်သွားရန် ဆောင်ရွက်နေကြောင်း သိရသည်။
photo: LA