~~~~~~~~⊰❂ unicode ❂⊱~~~~~~~~

နိုင်ငံရေးဆွေးနွေးမှုပုံစံ ပိုမိုရှင်းလင်းလွယ်ကူစေရန်နှင့် NCA လက်မှတ်မထိုးသေးသည့်အဖွဲ့များ ပါဝင်လာရန် နေပြည်တော်အစည်းအဝေးတွင် နှစ်ဖက်ထိပ်သီးခေါင်းဆောင်များ သဘောတူ
**************
နိုင်ငံရေးဆွေးနွေးမှုပုံစံ ပိုမိုရှင်းလင်းလွယ်ကူစေရန်နှင့် ဆွေးနွေးပွဲတွင် NCA လက်မှတ်မထိုးရသေးသည့် တိုင်းရင်းသားလက်နက်ကိုင်အဖွဲ့အစည်းများအားလုံး ပါဝင်လာရေးအပါအဝင် အစိုးရနှင့် NCA –SEAO ခေါင်းဆောင်များသီးသန့်အစည်းအဝေးက အချက်(၃)ချက်ပါသည့် ထုတ်ပြန်ချက်ကို ထုတ်ပြန်လိုက်သည်။

တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေး သဘောတူစာချုပ် (Nationwide Ceasefire Agreement - NCA) သုံးနှစ်ပြည့်ဖြစ်သည့် ၂၀၁၈ ခုနှစ် အောက်တိုဘာလ (၁၅)ရက်နေ့မှစ၍ (၂)ရက်တာ နေပြည်တော်၌ ကျင်းပသည့် အစိုးရနှင့် NCA လက်မှတ်ရေးထိုးထားသည့် တိုင်းရင်းသားလက်နက်ကိုင်ခေါင်းဆောင်များ၏ သီးသန့်အစည်းအဝေးအပြီးတွင် ပူးတွဲထုတ်ပြန်လိုက်ခြင်းဖြစ်သည်။

အဆိုပါကြေညာချက်တွင် ၂၀၂၀ ပြည့်နှစ်မတိုင်မီ ကျင်းပရန် ရည်မှန်းထားသည့် ညီလာခံ(၃)ကြိမ်တွင် အရေးကြီးသည့် ဒီမိုကရေစီနှင့် ဖက်ဒရယ်ဆိုင်ရာ အခြေခံမူများ ချမှတ်နိုင်ရေးအတွက် လိုအပ်သည့် အချိန်ဇယားနှင့် ဦးစားပေးလုပ်ငန်းစဉ်များလုပ်ဆောင်ရန်၊ နိုင်ငံရေးဆွေးနွေးပွဲများတွင် သဘောတူညီမှုရရှိရန် လိုအပ်နေသည့် ကိစ္စရပ်များနှင့်  လက်ရှိ နိုင်ငံရေးဆွေးနွေးမှုပုံစံကို ပိုမိုရှင်းလင်းလွယ်ကူအောင် လုပ်ဆောင်ရန်၊ ခေါင်းဆောင်များအကြား သဘောတူညီချက်များရယူပြီး အကောင်ထည်ဖော်ရန်၊ NCA စာချုပ် အခန်း (၅) တွင်ပါဝင်သည့် နိုင်ငံရေးလမ်းပြမြေပုံ ချမှတ်ခြင်း၊ အပိုဒ် ၂ဝ (ဂ) ပါ လုံခြုံရေးဆိုင်ရာ ပြန်လည်ပေါင်းစည်းခြင်းကိစ္စများစတင်ရန် လုပ်ငန်းစဉ် ညှိနှိုင်းဆွေးနွေးခြင်းများ ပြုလုပ်ရန်၊ NCA လက်မှတ် မထိုးရသေးသည့် တိုင်းရင်းသားလက်နက်ကိုင်အဖွဲ့အစည်းများ အားလုံးပါဝင်ရေး ဆက်လက် ဆောင်ရွက်သွားရန်တို့ကို ပြုလုပ်ရန် နှစ်ဖက်ထိပ်သီးခေါင်းဆောင်များက သဘောတူညီခဲ့ကြောင်း သိရသည်။

ယခုကျင်းပသည့် အစည်းအဝေးမှာ ယခင်ကျင်းပနေကျပုံစံအတိုင်းမဟုတ်ဘဲ ငြိမ်းချမ်းရေးအတွက် အနှစ်သာရ အကျိုးရလဒ်ရရှိထွက်ပေါ်နိုင်မည့် ခေါင်းဆောင်များ တွေ့ဆုံဆွေးနွေးနိုင်ရန်၊ ပြည်ထောင်စုငြိမ်းချမ်းရေး ညီလာခံ (၂၁)ရာစု ပင်လုံတတိယအစည်းအဝေးတွင် ဘဘောမတူညီနိုင်သေးသည့် ကိစ္စရပ်များအား ခေါင်ဆောင်များ၏ နိုင်ငံရေး သဘောတူညီချက်များဖြင့်ဖြေရှင်းရန်၊  (NCA) အကောင်အထည်ဖော်မှုအဖြစ် ဒီမိုကရေစီနှင့် ဖက်ဒရယ်စနစ်တို့ကို အခြေခံသော ပြည်ထောင်စု တည်ဆောက်ရေး အတွက် အရေးကြီးသည့် အခြေခံမူများ ချမှတ်နိုင်ရန် ရည်ရွယ်ချက်များဖြင့် ကျင်းပခဲ့ခြင်းဖြစ်ကြောင်း ထုတ်ပြန်ချက်တွင် ဖော်ပြထားသည်။

နိုင်ငံတော်အစိုးရနှင့် NCA လက်မှတ်ရေးထိုးထားသည့် တိုင်းရင်းသားလက်နက်ကိုင်ခေါင်းဆောင်များ၏ သီးသန့်အစည်းအဝေး ပထမနေ့တွင် နှစ်ဖက် ထိပ်သီးခေါင်းဆောင်များဖြစ်သည့် နိုင်ငံတော်အတိုင်ပင်ခံပုဂ္ဂ္ဂိုလ် ဒေါ်အောင်ဆန်းစုကြည်၊ တပ်မတော် ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်နှင့် NCA လက်မှတ်ရေးထိုးထားသည့်  တိုင်းရင်းသားလက်နက်ကိုင်များအဖွဲ့မှ KNU ဥက္ကဋ္ဌ မူတူးဆေးဖိုးနှင့် RCSS/SSA ခေါင်းဆောင် ဗိုလ်ချုပ်ကြီး ယွက်ဆစ်တို့ တက်ရောက်ခဲ့သော်လည်း အစည်းဝေး ပထမနေ့ နေ့လယ်ပိုင်းတွင် တပ်မတော်ကာကွယ်ရေး ဦးစီးချုပ်နှင့် ဒုတိယကာကွယ်ရေးဦးစီးချုပ်၊ RCSS/SSA ခေါင်းဆောင် ဗိုလ်ချုပ်ကြီး ယွက်ဆစ်ကလည်း အစည်းအဝေးတက်ရောက်ခဲ့ခြင်းမရှိဘဲ ဒေါ်အောင်ဆန်းစုကြည်နှင့် တိုင်းရင်းသား လက်နက်ကိုင်များအဖွဲ့မှ ခေါင်ဆောင်များသာ နှစ်ရက်တာတွေ့ဆုံဆွေးနွေးခဲ့ကြကြောင်း သိရသည်။

တစ်နိုင်ငံလုံး ပစ်ခတ်တိုက်ခိုက်မှုရပ်စဲရေးသဘောတူစာချုပ် (Nationwide Ceasefire Agreement - NCA) ကို တိုင်းရင်းသားလက်နက်ကိုင်အဖွဲ့များဖြစ်သည့် KNU၊ RCSS၊ PNO၊ ABSDF၊ CNF၊ NMSP၊ LDU၊  ALP၊  DKBA နှင့် KNU/KNLA Peace Council တို့က လက်မှတ်ရေးထိုးထားခြင်းဖြစ်သည်။
သတင်း #ဆန်းဖြိုးထွန်း
ဓါတ်ပုံ - Myanmar State Counsellor Office