~~~~~~~~⊰❂ unicode ❂⊱~~~~~~~~

လားရှိုးမြို့တွင် တိုက်ပွဲရှောင်နေသည့် အီနိုင်းကျေးရွာနှင့် နမ္မတူမြို့နယ်မှ ဒေသခံ (၁၀၀၀)ကျော် နေရပ်ပြန်
**************
ရှမ်းပြည်နယ်(မြောက်ပိုင်း) လားရှိုးမြို့တွင် တိုက်ပွဲရှောင်နေသည့် အီနိုင်းကျေးရွာနှင့် နမ္မတူမြို့နယ်တို့မှ ဒေသခံများသည် ၂၀၁၈ ခုနှစ်၊ နိုဝင်ဘာလ(၂)ရက်နေ့တွင် နေရပ်ပြန်ကြပြီဖြစ်ကြောင်း သိရသည်။

လားရှိုးမြို့ မန်ဆူရှမ်းကျောင်းတွင် တိုက်ပွဲရှောင်နေသူများသည် ဒေသအခြေအနေတည်ငြိမ်လာသဖြင့် နိုဝင်ဘာလ (၁)ရက်နေ့မှစ၍ နေရပ်ပြန်နေရာ နိုဝင်ဘာလ(၂)ရက်နေ့တွင် နောက်ဆုံးကျန်ခဲ့သည့် ဒေသခံ (၃၀၀)ကျော် ပြန်သွားကြခြင်းဖြစ်ကြောင်း သိရသည်။

အဆိုပါနေရပ်ပြန် စစ်ဘေးရှောင်များအတွက် စားနပ်ရိက္ခာများကို ဘေးအန္တရာယ်စီမံခန့်ခွဲမှုဦးစီးဌာန၊ အရှေ့မြောက်တိုင်း စစ်ဌာနချုပ်နှင့် လားရှိုးမြို့ရှိ ပရဟိတအဖွဲ့များက ကူညီထောက်ပံ့ပေးထားပြီး နေရပ်ပြန်ရန်အတွက် နိုဝင်ဘာလ(၁) ရက်နေ့ နှင့် (၂) ရက်နေ့တို့တွင် လူမှုကူညီရေး အသင်းအဖွဲ့များ စုပေါင်းကာ မော်တော်ယာဉ် (၂၇)စီးဖြင့် လိုက်လံပို့ဆောင်ပေးနေခြင်းဖြစ်ကြောင်း သိရသည်။

နမ္မတူမြို့နယ် နားဆိုင်းကျေးရွာအုပ်စုနှင့် လားရှိုးမြို့နယ်အီနိုင်းကျေးရွာအုပ်စုအတွင်း ၂၀၁၈ ခုနှစ်၊ အောက်တိုဘာလ (၂၃) ရက်နေ့မှစ၍ တိုင်းရင်းသားလက်နက်ကိုင်အဖွဲ့များဖြစ်သည့် TNLA ၊ SSPP/SSA နှင့် RCSS/SSA တို့ကြားတိုက်ပွဲများကြောင့် ဒေသခံ (၁၀၀၀)ကျော်မှာ  အောက်တိုဘာလ (၂၉)ရက်နေ့တွင် လားရှိုးမြို့မန်ဆူရှမ်းကျောင်းသို့ တိမ်းရှောင်လာခြင်းဖြစ်ကြောင်း သိရသည်။

သတင်း #နေဖြိုးမြင့်
ဓါတ်ပုံ - ပေးသောလက်လူမှုကူညီရေးအသင်း