~~~~~~~~⊰❂ unicode ❂⊱~~~~~~~~

 မလေးရှားသို့ဖြတ်ကျော်ဝင်ရန်ကြိုးစားစဉ် ထိုင်းနိုင်ငံ၌ ထိန်းသိမ်းခံထားရသည့် မြန်မာနိုင်ငံသား (၁၄၅)ဦးကို စုံစမ်းမှုများပြီးပါက နေရပ်ပြန်ပို့မည်
****************
ထိုင်းနိုင်ငံမှတစ်ဆင့် မလေးရှားနိုင်ငံသို့ ဖြတ်ကျော်ဝင်ရောက်ရန်ကြိုးစားစဉ် ဖမ်းဆီးခံရပြီး ထိုင်းနိုင်ငံ၊ ရနောင်းမြို့ရှိ လူဝင်မှုကြီးကြပ်ရေးအချုပ်တွင် ယာယီထိန်းသိမ်းခံနေရသည့် မြန်မာနိုင်ငံသား (၁၄၅)ဦးကို ထိုင်းနိုင်ငံရှိ မြန်မာ အလုပ်သမားသံအရာရှိရုံးမှ တာဝန်ရှိသူများက ၂၀၁၈ ခုနှစ်၊ နိုဝင်ဘာလ (၁၆) ရက်နေ့တွင် သွားရောက်တွေ့ဆုံကြောင်း သိရသည်။

ရနောင်းမြို့မှ အလုပ်သမားသံအရာရှိ ဦးဇော်မင်းအောင်သည် အဖမ်းဆီးခံရသည့် မြန်မာနိုင်ငံသားများနှင့် သွားရောက်တွေ့ဆုံကာ လိုအပ်သည့်အကူညီများပေးအပ်ခဲ့ပြီး ၎င်းတို့ကို အမြန်ဆုံးနေရပ်ပြန်ပို့နိုင်ရန် ထိုင်းလဝကများနှင့်တွေ့ဆုံဆွေးနွေးခဲ့ကြောင်း အလုပ်သမားသံအရာရှိရုံးက သတင်းထုတ်ပြန်ချက်အရ သိရသည်။

မလေးရှာနိုင်ငံသို့ သွားရောက်အလုပ်လုပ်ကိုင်မည့် မြန်မာနိုင်ငံသား (၁၄၅)ဦးကို ထိုင်းနိုင်ငံ၊ ရနောင်းခရိုင်၊ ကလပ်ဘူလီမြို့နယ်တွင် ၂၀၁၈ ခုနှစ်၊ အောက်တိုဘာလ (၁၄) ရက်နေ့ နံနက်(၁)နာရီအချိန်ခန့်တွင် ထိုင်းနိုင်ငံ တာဝန်ရှိသူများက ဖမ်းဆီးမိခဲ့ခြင်းဖြစ်ကြောင်း သိရသည်။

အဆိုပါ မြန်မာနိုင်ငံသားများသည် မြန်မာ - ထိုင်းနယ်စပ် ကော့သောင်းမြို့မှတစ်ဆင့် စက်လှေဖြင့် ခိုးဝင်လာကြခြင်းဖြစ်ပြီး ရခိုင်ပြည်နယ်၊ ပဲခူးတိုင်းဒေသကြီး၊ ချင်းပြည်နယ်နှင့် ဧရာဝတီတိုင်းဒေသကြီးတို့မှ ဖြစ်ကြောင်း သိရသည်။

ထိန်းသိမ်းခံရသူများတွင် လူကုန်ကူးသူများပါဝင်ခြင်း စစ်ဆေးလျှက်ရှိပြီး စုံစမ်းမှုများပြီးပါက မြန်မာနိုင်ငံသို့ ပြန်လည်ပို့ဆောင်မည်ဖြစ်ကြောင်း သိရသည်။

Tachileik News Agency
ဓါတ်ပုံ - LA