~~~~~~~~⊰❂ unicode ❂⊱~~~~~~~~

ကယားပြည်နယ်၏ ဌာနေတိုင်းရင်းသားများ ရိုးရာလက်မှုပညာပြပွဲနှင့် ဈေးရောင်းပွဲတော် လွိုင်ကော်တွင် ကျင်းပမည်
*************
ကယားပြည်နယ်တွင်းရှိ ဌာနေတိုင်းရင်းသားများ၏ ရိုးရာလက်မှုပညာပြပွဲနှင့် ဈေးရောင်းပွဲတော်အား လွိုင်ကော်မြို့ရှိ ယဉ်ကျေးမှုပြတိုက်တွင် ၂၀၁၈ ခုနှစ်၊ ဒီဇင်ဘာလ (၁၄)ရက်နေ့မှ (၁၆) ရက်နေ့အထိ ကျင်းပသွားမည်ဖြစ်ရာ ရိုးရာလက်မှုပစ္စည်း၊ ရိုးရာအစားအစာများ ပါဝင်ရောင်းချလိုပါက ဒီဇင်ဘာလ (၁၃)ရက်နေ့ နောက်ဆုံးထား၍ ဆက်သွယ်နိုင်ကြောင်း သိရသည်။

“ ကျွန်မတို့ အခုလုပ်နေတဲ့ ကဏ္ဍစုံအားလုံးပါဝင်တဲ့ ခရီးသွားလုပ်ငန်းစီမံကိန်းပေါ့။ အဲဒီထဲမှာကတော့  ခရီးသွားလုပ်ငန်းလို့ပြောတဲ့အထဲမှာ ဒီလက်မှုလုပ်ငန်းမြှင့်တင်ရေးလည်းပါတယ်။ ဒါကိုအခြေခံပြီး ကယားဒေသထွက် လက်မှုပစ္စည်းပြပွဲနဲ့ ဈေးရောင်းပွဲဆိုတာ လုပ်ဖြစ်တာပါ “ ဟု အဆိုပါပြပွဲဖြစ်မြောက်ရေး ပါဝင်လုပ်ဆောင်နေသည့် International Trade Centerမှ စီမံကိန်းညှိနှိုင်းရေးမှူး ဒေါ်ဝင်နီက တာချီလိတ်သတင်းအေဂျင်စီသို့ ပြောသည်။

အဆိုပါပြပွဲကို စီးပွားရေးနှင့်ကူးသန်းရောင်းဝယ်ရေးဝန်ကြီးဌာနနှင့် International Trade Center(ITC)တို့ လွိုင်ကော်မြို့တွင် ဒုတိယအကြိမ် ပူးပေါင်းကျင်းပခြင်းဖြစ်ပြီး ၂၀၁၇ ခုနှစ်ကလည်း ဒေသထွက် လက်မှုကုန်ထုတ်ပစ္စည်း ပြိုင်ပွဲကို ကျင်းပခဲ့ခြင်းဖြစ်သည်။

“ ကယားဒေသရဲ့ ဒေသထွက်ပစ္စည်းတွေက ရှိတော့ရှိတယ်။ အရည်အသွေး နည်းနည်းလိုအပ်တာရှိတယ်။ ဈေးကွက်မရှိဘူး။ အဲဒါကြောင့် ကျွန်မတို့က ဈေးကွက်လိုအပ်ချက်ရယ် လိုအပ်တဲ့အရည်အသွေးတွေ မြှင့်တင်တဲ့ သင်တန်းလေးတွေ လုပ်ပေးမယ်။ နောက်ပြီး ခင်းကျင်းပြသတာပေါ့။ တစ်ချို့က ဒီအတိုင်းပဲ စိတ်ဝင်စားအောင် မထားတတ်ဘူး။ ဒါတွေကို ကျွန်မတို့ ကူညီပေးမယ်။ တစ်ဖက်လည်း ဒီပစ္စည်းတွေကို လူတွေသိအောင်၊ ဈေးကွက်ထဲ ရောက်လာအောင် မိတ်ဆက်ပေးတာပေါ့။ ဒီမှာ တိုင်းရင်းသားတွေက ရွာတွေ အလိုက် လက်မှုပညာတွေ လုပ်တာရှိတယ်။ တစ်ယောက်နဲ့တစ်ယောက် မချိတ်မိတာပေါ့။ အဲဒါ ချိတ်ဆက်မိသွားအောင် ယဉ်ကျေးမှုတွေ ပိုပေါ်လွင်လာအောင် အဲဒီကနေ ဒီခရီးသွားလုပ်ငန်းကို မြှင့်တင်မယ်ပေါ့။ အဲဒါမျိုးလေး ရည်ရွယ်တာပါ “ ဟု International Trade Centerမှ စီမံကိန်းညှိနှိုင်းရေးမှူး ဒေါ်ဝင်နီက  ပြောသည်။

ကယားပြည်နယ်တွင်းရှိ မြို့နယ်၊ ကျေးရွာများမှ တိုင်းရင်းသားမျိုးနွယ်စုများ၊ စာပေယဉ်ကျေးမှုအဖွဲ့များ ၊ တိုင်းရင်းသားအဖွဲ့အစည်းများ၊ အရပ်ဖက်လူမှုအဖွဲ့အစည်းများ ၊ လက်မှုပညာရှင်များအပြင် ဈေးကွက်ချိတ်ဆက်မိစေရန် ဟိုတယ်လုပ်ငန်းရှင်များ၊ စားသောက်ဆိုင်များ၊ ဧည့်လမ်းညွှန်များ၊ ရန်ကုန်မှ ခရီးသွာ ကုမ္ပဏီများကိုလည်း ဖိတ်ခေါ်ထားကြောင်း သိရသည်။

ပြပွဲနှင့်ပတ်သက်၍ ဆက်သွယ်မေးမြန်းလိုပါက ဖုန်း 09960107733 နှင့် 09780536139 တို့သို့ ဆက်သွယ်နိုင်ကြောင်း သိရသည်။

International Trade Center သည် SME များကိုထောက်ပံ့နေသည့် နိုင်ငံတကာအဖွဲ့အစည်းတစ်ခုဖြစ်သည်။

သတင်း ဋဆန်းဖြိုးထွန်း