~~~~~~~~⊰❂Unicode Version ❂⊱~~~~~~~~

ကျောင်းပြင်ပရောက်သူများအတွက် အခမဲ့စရိတ်ငြိမ်း သက်မွေးသင်တန်းကျောင်းများကို ကျားမ မရွေးလျှောက်ထားနိုင်
**************
ကျောင်းပြင်ပရောက်သူများအတွက် အသက်မွေးဝမ်းကျောင်းပညာရပ်များကို အခမဲ့စရိတ်ငြိမ်း နိုင်ငံတကာအဆင့်မီသင်ကြားပေးမည့်သင်တန်းများကို အစိုးရနည်းပညာ အထက်တန်းကျောင်း (၅)ကျောင်းတွင် ၂၀၁၉ ခုနှစ်၊ ဇန်နဝါရီလ(၇)ရက်နေ့မှစတင်ဖွင့်လှစ်မည်ဖြစ်ရာ ကျား၊မ မရွေး အသက်(၁၈)နှစ်မှ အသက်(၄၀)ထက် မကျော်လွန်သူများ လျှောက်ထားနိုင်ကြောင်း သိရသည်။

အဆိုပါသင်တန်းများကို ပညာရေးဝန်ကြီးဌာန၊ နည်းပညာ၊ သက်မွေးပညာနှင့် လေ့ကျင့်ရေးဦးစီးဌာန၊ စက်မှုဝန်ကြီးဌာနနှင့် အာရှဖွံ့ဖြိုးရေးဘဏ်တို့ ပူးပေါင်းပြီး လူငယ်များအလုပ်အကိုင်ရရှိရေး လေ့ကျင့်ပြုစုမွေးထုတ်ရေးစီမံကိန်းမှ ကျွမ်းကျင်မှုအခြေပြုကာလတိုသင်တန်းများ ဖွင့်လှစ်ခြင်းဖြစ်ပြီး ပြည်တွင်း၊ ပြည်ပမှ ကျွမ်းကျင်နည်းပညာရှင်များက ကြီးကြပ်၍ စာတွေ့၊လက်တွေ့သင်ကြားမည်ဖြစ်ကြောင်း သိရသည်။

လျှောက်ထားလိုသူများအနေဖြင့် သင်တန်းလျှောက်လွှာကို ပြည့်စုံစွာဖြည့်စွက်ပြီး နိုင်ငံသားစိစစ်ရေးကတ် မိတ္တူ(၁)စောင်၊ လိုင်စင်ဓါတ်ပုံ (၃)ပုံနှင့် အကျင့်စာရိတ္တကောင်းမွန်ကောင်း ကျေးရွာ/ရပ်ကွက်/မြို့နယ်/ရဲစခန်း ထောက်ခံစာတို့ဖြင့် သင်တန်းဖွင့်လှစ်မည့် သက်ဆိုင်ရာကျောင်းများတွင်လည်းကောင်း [email protected] သို့လည်းကောင်း ပေးပို့လျှောက်ထားနိုင်မည်ဖြစ်ကာ အသေးစိတ်သိရှိလိုပါက သင်တန်းကျောင်းများ၏ ဖုန်းနံပါတ်များသို့ဆက်သွယ်နိုင်ကြောင်း သိရသည်။

အစိုးရနည်းပညာအထက်တန်းကျောင်း(၅)ကျောင်းတွင် အုတ်စီသင်တန်း၊ သံချည်သံကွေးသင်တန်း၊ ဓာတ်ငွေ့သုံး ဂဟေဆက် ကျွမ်းကျင်သင်တန်း၊ လျှပ်စစ်ဂဟေဆက် ကျွမ်းကျင်သင်တန်းနှင့် စိုက်ပျိုးရေးသုံး စက်ပစ္စည်းပြုပြင်ထိန်းသိမ်းရေးသင်တန်းများကို ရက်(၉၀) ကြာဖွင့်လှစ်သွားမည်ဖြစ်ရာ သင်တန်းကြေးအခမဲ့၊ သင်တန်းကာလအတွင်း နေထိုင်စားသောက်စရိတ်အခမဲ့၊  ယူနီဖောင်း ထောက်ပံ့မှုနှင့် သင်ထောက်ကူပစ္စည်း အပြည့်အစုံဖြင့် သင်ကြားပေးမည့်အပြင် လစဉ်ထောက်ပံ့ကြေးလည်း လျှောက်ထားနိုင်မည်ဖြစ်ကြောင်း သိရသည်။

မူလတန်းအဆင့်မှ ကျောင်းဆက်တက်နိုင်ခြင်းမရှိခဲ့သည့် လူငယ်များ၊ ပညာရေးနှင့် အလုပ်အကိုင် အခက်အခဲရှိသည့် ဝေးလံခေါင်ဖျားဒေသများမှ လူငယ်များ၊ အမျိုးသမီးများအတွက် ဆောက်လုပ်ရေး၊ စက်မှု၊ ကုန်ထုတ်လုပ်မှုဆိုင်ရာ ကျွမ်းကျင်မှုများနှင့် အလုပ်အကိုင်အခွင့်အလမ်းရရှိစေရန် အလားတူ ကာလတိုသင်တန်းများကို တိုးချဲ့ဖွင့်လှစ်သွားမည်ဖြစ်ကြောင်း သိရသည်။

သင်တန်းတစ်ခုလျှင် သင်တန်းကာလတစ်ခုအတွက် သင်တန်းသား၊သင်တန်းသူ (၁၂)ဦးစီသာ လက်ခံသင်ကြားပေးမည်ဖြစ်ပြီး Level (1) အောင်မြင်ပါက Level (2) ဆက်လက်တက်ရောက်ခွင့်နှင့် သက်ဆိုင်ရာလုပ်ငန်းခွင်များတွင် အလုပ်အကိုင်ရရှိစေရန် ဆက်သွယ်ဆောင်ရွက်ပေးသွားမည်ဖြစ်ကြောင်း သိရသည်။
အုတ်စီကျွမ်းကျင်သင်တန်းနှင့် သံချည်သံကွေးကျွမ်းကျင်သင်တန်းများကို အစိုးရနည်းပညာအထက်တန်းကျောင်း (နေပြည်တော်)၊ အစိုးရနည်းပညာအထက်တန်းကျောင်း (ရွာမ)၊ အစိုးရနည်းပညာအထက်တန်းကျောင်း (မန္တလေး)တို့တွင် လည်းကောင်း၊ ဓါတ်ငွေ့သုံးလျှပ်စစ် ဂဟေဆက်ကျွမ်းကျင်သင်တန်းနှင့် လျှပ်စစ်ဂဟေဆက်ကျွမ်းကျင်သင်တန်းများကို အမှတ်(၂)စက်မှုသင်တန်းကျောင်း (မန္တလေး)တွင်လည်းကောင်း၊ လျှပ်စစ်ဂဟေဆက်ကျွမ်းကျင်သင်တန်းနှင့် စိုက်ပျိုးရေးသုံး စက်ပစ္စည်းများ ပြုပြင်ထိန်းသိမ်းခြင်းကျွမ်းကျင်သင်တန်းကို အမှတ်(၄)စက်မှုသင်တန်းကျောင်း (ပခုက္ကူ)တွင်လည်းကောင်း ဖွင့်လှစ်မည်ဖြစ်ကြောင်း သိရသည်။

ဘားအံ၊ ကလေး၊ လားရှိုး၊ မော်လမြိုင်၊ မိတ္ထီလာ၊ မုံရွာ၊ ပုသိမ်၊ တောင်ငူမြို့များရှိ အစိုးရနည်းပညာအထက်တန်းကျောင်းများနှင့် မကွေးနှင့် သာဂရ ITC တို့တွင်လည်း အလားတူသင်တန်းများကို ဆက်လက်ဖွင့်လှစ်သွားရန်ရှိကြောင်း သိရသည်။

Tachileik News Agency