~~~~~~~~⊰❂ unicode ❂⊱~~~~~~~~

မိုင်းဆတ်မြို့၌ ဖွင့်လှစ်လိုက်သည့် ရှမ်းစာပေနှင့်ယဉ်ကျေးမှုပြခန်းတွင် ကွန်ပျူတာသင်တန်း အခမဲ့ပို့ချပေးမည်
***********
ရှမ်းပြည်နယ်(အရှေ့ပိုင်း) မိုင်းဆတ်မြို့နယ် ရှမ်းစာပေနှင့်ယဉ်ကျေးမှုအသင်းက ရှမ်းစာပေနှင့် ယဉ်ကျေးမှုပြခန်းကို မိုင်းဆတ်မြို့တွင် ၂၀၁၈ ခုနှစ်၊ သြဂုတ်လ(၈) ရက်နေ့က ဖွင့်လှစ်လိုက်ပြီး သြဂုတ်လ(၁၁)ရက်နေ့တွင် အဆိုပါ ပြခန်း၏ ဒုတိယထပ်၌ ကွန်ပျူတာသင်တန်းဖွင့်လှစ်မည်ဖြစ်၍ လူမျိုးဘာသာမရွေး အခမဲ့ တက်ရောက်နိုင်ကြောင်း သိရသည်။

အဆိုပါကွန်ပျူတာသင်တန်းတွင် သင်တန်းဆရာ(၆)ဦးက သင်တန်းသား(၅၆)ဦးအား အခမဲ့သင်ကြားပေးမည်ဖြစ်သည့်အပြင် ပြခန်းကိုလည်း အခမဲ့လေ့လာနိုင်မည်ဖြစ်ကြောင်း သိရသည်။

"ကျွန်တော်တို့ ပထမထပ်ပြခန်းမှာ ရှမ်းစာပေနဲ့ ရေးထားတဲ့စာအုပ်စာစောင်တွေ၊ ရှေးဟောင်းငွေစက္ကူတွေ၊ ရိုးရာယဉ်ကျေးမှုအမွေအနှစ်ဖြစ်တဲ့ ကိန္နရီကိန္နရာဝတ်စုံနဲ့ တူရိယာပစ္စည်းတွေ၊ ရိုးရာအသုံးအဆောင်ပစ္စည်းတွေနဲ့ လယ်ယာသုံးပစ္စည်းတွေ၊ သမိုင်းမှတ်တမ်းဓာတ်ပုံတွေနဲ့ ရိုးရာအစားအသောက်မှတ်တမ်းဓာတ်ပုံတွေ ပြသထားပါ တယ်။ မျိုးဆက်သစ်လူငယ်တွေ ရိုးရာယဉ်ကျေးမှုအမွေအနှစ်ပစ္စည်းတွေကိုသိရှိပြီး လက်ဆင့်ကမ်းတန်ဖိုးထား ထိန်းသိမ်းတတ်အောင်လို့ ရည်ရွယ်ပြသထားတာပါ"ဟု ရှမ်းစာပေနှင့်ယဉ်ကျေးမှုအသင်းဥက္ကဌ ဦးစိုင်းဝဏ္ဏက ပြောသည်။

ပြခန်းဖွင့်ပွဲနှင့် ရှမ်းစာပေနှင့်ယဉ်ကျေးမှုအသင်းဆိုင်းဘုတ်တင်ခြင်း အခမ်းအနားကျင်းပရာ မဟာမြတ်မုနိကျောင်းတိုက်ဆရာတော် ဘဒ္ဒန္တတေဇောဘာသနှင့် မြို့မကျောင်း တိုက်ဆရာတော် ဘဒ္ဒန္တအာဒိစ္စတို့က အမွှေးနံ့သာများ ပက်ဖြန်း ဖွင့်လှစ် ပေးခဲ့ကြောင်းသိရသည်။

သတင်း၊ဓါတ်ပုံ #သန်းဇော်