~~~~~~~~⊰❂ Unicode Version ❂⊱~~~~~~~~

နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်သည် ၂၀၁၉ခုနှစ် ဖေဖော်ဝါရီလ(၅)ရက်နေ့ နံနက်ပိုင်းက တာချီလိတ်မြို့ရှိ အောင်မြတ်ခန်းမတွင် ကျင်းပပြုလုပ်သည့် လူထုတွေ့ဆုံပွဲအပြီး မိုင်းယောင်းမြို့သို့ ရဟတ်ယာဉ်ဖြင့် ဆက်လက်ထွက်ခွာကာ နေ့လည်(၁း၅၀)နာရီအချိန်က မိုင်းယောင်း ဒေသခံများနှင့် လူထုတွေ့ဆုံပွဲ ပြုလုပ်ပြီးနောက် ညနေ(၃)နာရီကျော်တွင် ကျိုင်းတုံသို့ ဆက်လက် ထွက်ခွာ သွားကြောင်း သိရသည်။

မိုင်းယောင်းမြို့တွင် ပြုလုပ်သည့် လူထုတွေ့ဆုံပွဲသို့ တက်ရောက်လာသူအချို့က မိုင်းယုမြို့တွင် လမ်းပြုပြင်ပေးရေး ကိစ္စ၊ ကုန်သွယ်ရေးကိစ္စ၊ လူငယ်ရေးရာနှင့် ပတ်သက်၍ လူငယ်စင်တာကိစ္စ၊ ရာဘာစိုက်ပျိုးရေးနှင့်ရောင်းဝယ်ရေးတို့တွင် သယ်ယူ ပို့ဆောင်ရာ၌ ဂိတ်ကြေးများ ပေးနေရသည့် ကိစ္စ အပါအဝင် မိုင်းယောင်းမြို့တွင် လိုအပ်နေသည့် ဝန်ထမ်းအိမ်ရာ ဆောက်လုပ်ပေးရေးကိစ္စ နှင့် ပညာရေး၊ ကျန်းမာရေး၊ လူငယ်ရေးရာကိစ္စများကို ဆွေးနွေး တင်ပြခဲ့ကြကြောင်း သိရသည်။

နိုင်ငံတော်၏ အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်နှင့် ပြည်ထောင်စုဝန်ကြီးများပါဝင်သည့် အဖွဲ့သည် နံနက် (၈)နာရီခွဲဝန်းကျင်တွင် နပြေည်တော်မှ Myanmar National Airlines လေကြောင်းလိုင်းဖြင့် ရှမ်းပြည်နယ် အရှေ့ပိုင်း တာချီလိတ်မြို့သို့ ၂၀၁၉ ခုနှစ်၊ ဖေဖော်ဝါရီလ (၅)ရက်နေ့ နံနက် ( ၉း၃၅ )နာရီက ရောက်ရှိလာခြင်း ဖြစ်ပြီး ပြည်ထဲရေးဝန်ကြီးဌာန ပြည်ထောင်စုဝန်ကြီး ဒုတိယဗိုလ်ချုပ်ကြီး ကျော်ဆွေ၊ နယ်စပ်ရေးရာဝန်ကြီး ဒုဗိုလ်ချုပ်ကြီး ရဲအောင်၊ ပြည်ထောင်စုအစိုးရအဖွဲ့ရုံးဝန်ကြီး ဦးမင်းသူနှင့် ရဲချုပ် ဒုရဲဗိုလ်ချုပ်ကြီး အောင်ဝင်းဦးတို့ အပါအဝင် စုစုပေါင်း (၂၇)ဦး လိုက်ပါလာခြင်းဖြစ်ပြီး တာချီလိတ်မှ တဆင့် မိုင်းယောင်းသို့ ဆက်လက်ထွက်ခွာသွားခြင်း ဖြစ်သည်။

မိုင်းယောင်းမြို့တွင် လူထုတွေ့ဆုံပွဲအား ညနေ(၃)နာရီဝန်းကျင်တွင် ပြီးဆုံးကာ ညနေ(၃)နာရီကျော်က မိုင်းယောင်းမှ တဆင့် ကျိုင်းတုံမြို့သို့ ဆက်လက်၍ ရဟတ်ယာဉ်ဖြင့် ထွက်ခွာသွားကြောင်း သိရှိရသည်။

Tachileik News Agency
ဓာတ်ပုံ - SSSL