~~~~~~~~⊰❂ Unicode Version ❂⊱~~~~~~~~

ကချင်ပြည်နယ်မှ သတင်းထောက်နှစ်ဦးကို ပုဂ္ဂလိကကုမ္ပဏီတစ်ခုက အနိုင်အထက်ပြုကျင့်မှုအား ထိရောက်စွာဖေါ်ထုတ်အရေးယူပေးရန် ပြည်ထဲရေးနှင့် ပြည်နယ်အစိုးရအား တိုက်တွန်း
**********
ကချင်ပြည်နယ် မြစ်ကြီးနားမြို့အခြေစိုက် မြစ်ကြီးနားဂျာနယ်မှ သတင်းထောက် အမျိုးသမီးတစ်ဦးနှင့် အမျိုးသားတစ်ဦးကို တစ်ရှုးငှက်ပျောစိုက်ပျိုးရေးလုပ်ကိုင်သည့် သခင်စစ်ကုမ္ပဏီက လှည့်ဖျားခေါ်ဆောင်ပြီး အနိုင်အထက်ပြုကျင့်မှုကို ပြည်ထဲရေးနှင့် ပြည်နယ်အစိုးရအနေဖြင့် ထိရောက်စွာ ဖေါ်ထုတ်အရေးယူပေးရန် မြန်မာနိုင်ငံသတင်းမီဒီယာကောင်စီက တိုက်တွန်းလိုက်သည်။

သတင်းမီဒီယာကောင်စီက ၂၀၁၉ ခုနှစ်၊ ဖေဖော်ဝါရီလ (၂၆) ရက်နေ့တွင် ထုတ်ပြန်လိုက်သည့် ထုတ်ပြန်ချက်တွင် ၎င်းဖြစ်ရပ်တွင် ကျူးလွန်ပါဝင်သူများကို တရားဥပဒေနှင့်အညီ ထိရောက်စွာ ဖော်ထုတ်အရေးယူပေးပါရန် တရားဥပဒေစိုးမိုးရေး တာဝန်ရှိအဖွဲ့အစည်းဖြစ်သည့် ပြည်ထဲရေးဝန်ကြီးဌာနနှင့် ကချင်ပြည်နယ်အစိုးရတို့ထံသို့ မြန်မာနိုင်ငံသတင်းမီဒီယာကောင်စီက တိုက်တွန်းပါသည်ဟု ဖေါ်ပြထားသည်။

မြစ်ကြီးနားသတင်းဂျာနယ်မှ သတင်းထောက်နှစ်ဦးဖြစ်သည့် မမွန်းမွန်းပန်နှင့် ကိုအိုက်ဂျယ်တို့ကို တစ်ရှူးငှက်ပျောစိုက်ပျိုးရေး လုပ်ကိုင်နေသည့် သခင်စစ်ကုမ္ပဏီက တစ်ရှုးငှက်ပျောစိုက်ပျိုးရေးသတင်းနှင့်ပတ်သက်၍ ဆွေးနွေးရန်ဟုဆိုကာ ဝိုင်းမော်မြို့ရှိ ၎င်းတို့ရုံးခန်းသို့ လှည့်ဖျားခေါ်ဆောင်ပြီး အမျိုးသမီး သတင်းထောက်အား ဂျာနယ်ဖြင့် ပါးရိုက်ခြင်း၊ အမျိုးသားသတင်းထောက်ကို ထိုင်ထအကြိမ်ရာနှင့်ချီ လုပ်ခိုင်းခြင်းများ ပြုလုပ်ခဲ့သဖြင့် ရဲတပ်ဖွဲ့အကူအညီနှင့် သတင်းထောက်များအား သွားရောက်ခေါ်ယူခဲ့ရပြီးနောက် သတင်းမီဒီယာကောင်စီအပါအဝင် သတင်းထောက်အဖွဲ့အစည်းများက သဘောထားကြေညာချက်များ ထုတ်ပြန်ခဲ့ကြသည်။

သတင်းထောက်များသည် သတင်းမီဒီယာဥပဒေ၊ ကျင့်ဝတ်များနှင့်အညီ နိုင်ငံသားတိုင်းသိခွင့်ရှိသော နိုင်ငံသားများ၏ အခွင့်အရေးဆုံးရှုံးမှုဆိုင်ရာ ကိစ္စရပ်များကို ဖော်ထုတ်ရေးသားခြင်းသာဖြစ်ရာ သတင်းဖေါ်ပြမှု နှင့် ပတ်သက်ပြီး ကျေနပ်မှုမရှိပါက အဆိုပါကုမ္ပဏီအနေဖြင့် မြန်မာနိုင်ငံသတင်းမီဒီယာကောင်စီသို့ တိုင်ကြားခြင်း သို့တည်းမဟုတ် တရားဥပဒေလမ်းကြောင်းအရ တရားစွဲဆိုခြင်းတို့ လုပ်ဆောင်ခွင့် ရှိသော်လည်း ယခုကဲ့သို့ သတင်းထောက်များအပေါ် ရာဇဝတ်မကင်းသော အနိုင်အထက်လုပ်ဆောင်ခြင်းကို မြန်မာနိုင်ငံသတင်းမီဒီယာကောင်စီအနေဖြင့် ပြင်းထန်စွာရှုတ်ချပါသည်ဟု သဘောထားကြေညာချက်တွင် ဖေါ်ပြထားသည်။

အဆိုပါဖြစ်ရပ်နှင့်ပတ်သက်၍ လိုအပ်သည့်ဆောင်ရွက်ချက်များကို မြန်မာနိုင်ငံသတင်းမီဒီယာကောင်စီအနေဖြင့် အစွမ်းကုန် လုပ်ဆောင်သွားမည်ဖြစ်ကြောင်း အသိပေးထားသည်။

သတင်းထောက်များကို လှည့်ဖျားခေါ်ဆောင်ပြီး ထိခိုက်နစ်နာစေခဲ့သည့် သခင်စစ်သတ္တုတူးဖေါ်ရေးကုမ္ပဏီပိုင်ရှင် ဒိန်ဆောင်၊ မန်နေဂျာ ဂွမ်လတ်၊ ယာဉ်မောင်းများဖြစ်သည့် ဇော်လ၊ဝင်းမြိုင်၊မျိုးမျိုးအောင်နှင့် မောင်ထွေးတို့အား ဝိုင်းမော်မြို့မရဲစခန်းတွင်  (ပ)၃၂/၂၀၁၉ ရာဇသတ်ကြီးပုဒ်မ ၃၅၃/၂၉၄/၃၄၁/၃၂၃/၁၁၄ တို့ဖြင့် အမှုဖွင့်လှစ်စစ်ဆေးနေကြောင်း သိရသည်။

Tachileik News Agency