~~~~~~~~⊰❂ Unicode Version ❂⊱~~~~~~~~

 “ပြင်ပအကူသူနာပြုသင်တန်းများကို ကျန်းမာရေးနဲ့ အားကစားဝန်ကြီးဌာနအနေနဲ့ လုံးဝခွင့်ပြုထားခြင်း လုံးဝမရှိပါဘူး။ သို့သော်လည်း ဒီကိစ္စက အလွန်အရေးကြီးတဲ့ကိစ္စဖြစ်တဲ့အတွက် ကျွန်တော်တို့ နှစ်ပတ်အတွင်းမှာတော့ Workshop, Seminar နှစ်ရက်လုပ်ပါမယ်။ အကူသူနာပြုသည် တကယ်တော့ ကျန်းမာရေးထက်ကို အလုပ်သမားရေးရာဝန်ကြီးဌာနနဲ့ ပိုပြီးတော့ဆိုင်ပါတယ်။ သို့သော်လည်း ကျွန်တော်တို့ကကျတော့ သူတို့ရဲ့ အရည်အသွေး၊ အရည်အချင်းစစ်တာကို လုပ်ပေးရတဲ့အတွက် ကျွန်တော်တို့က ပုဂ္ဂလိကဆေးရုံများအသင်း၊ ပုဂ္ဂလိကကျန်းမာရေးကြီးကြပ်မှုဗဟိုကော်မတီက ကျွန်တော်ဥက္ကဌပါ အဲဒါပါမယ်။ နောက်တစ်ခါ မြန်မာနိုင်ငံ သားဖွားနှင့်သူနာပြုကောင်စီ၊ သားဖွားနှင့်သူနာပြုအသင်း၊ အလုပ်သမား ဝန်ကြီး ဌာန Represent၊ ယခု ဖွင့်နေတဲ့ သက်ဆိုင်ရာကျောင်းတွေရဲ့ တာဝန်ရှိပုဂ္ဂိုလ်တွေလည်းခေါ်ပါမယ်။ သူနာပြုတက္ကသိုလ်များ၏ ပါမောက္ခချုပ်တွေ၊ သူနာပြုသားဖွားကျောင်း (၅၀) မှ အချို့သော ကျောင်းအုပ်များပါခေါ်ပြီး ဆွေးနွေးပါမယ်”ဟု ကျန်းမာရေးနှင့် အားကစား ပြည်ထောင်စုဝန်ကြီး ဒေါက်တာမြင့်ထွေးက ပြည်သူ့လွှတ်တော်တွင် ပြောကြားသည်။

ဒုတိယအကြိမ် ပြည်သူ့လွှတ်တော် (၁၁)ကြိမ်မြောက် ပုံမှန်အစည်းအဝေး (၁၉)ရက်မြောက်နေ့ဖြစ်သည့် ၂၀၁၉ ခုနှစ်၊ မတ်လ (၁)ရက်နေ့တွင် ကျင်းပသည့် ပြည်သူ့လွှတ်တော်အစည်းအဝေးတွင် မင်းလှ မဲဆန္ဒနယ်မှ ဒေါက်တာဦးသန်းအောင်စိုးက ပြင်ပ အကူသူနာပြုသင်တန်းများကို တရားဝင်ဖွင့်လှစ်ခွင့်ပြုထားခြင်း ရှိ၊ မရှိ နှင့် အဆိုပါသင်တန်းများ၏ အရည်အချင်းများကို မည်သည့် ဌာနက မည်ကဲ့သို့ စနစ်တကျ ကြီးကြပ်ဆောင်ရွက်နေသည်ကို သိလိုခြင်း နှင့်စပ်လျဉ်း၍ မေးမြန်းခဲ့ခြင်းဖြစ်သည်။

အဆိုပါမေးခွန်းမေးမြန်းခဲ့သည့်အတွက် ကျန်းမာရေးနှင့် အားကစားဝန်ကြီးဌာနက သက်ဆိုင်ရာအဖွဲ့အစည်းအသီးသီး ပါဝင်သည့် အလုပ်ရုံဆွေးနွေးပွဲကို မတ်လ ပထမနှစ်ပတ်အတွင်း လုပ်ဆောင်ရန် စီစဉ်ထားခြင်းဖြစ်ကြောင်း သိရသည်။

“အရည်အသွေးရှိအောင် ဘယ်လိုလုပ်မလဲ။ တာဝန်ယူမှု၊ တာဝန်ခံမှုရှိတဲ့ ကျင့်ဝတ်နဲ့ညီတဲ့ အကူသူနာပြုတွေကို ဘယ်လိုမွေးထုတ်မလဲဆိုတာ အမြန်ဆုံးလုပ်မယ်။ နှစ်ပတ်အတွင်းမှာ လုပ်ဖို့ပြောထားပြီးပါပြီ” ဟု ကျန်းမာရေးနှင့် အားကစား ပြည်ထောင်စုဝန်ကြီး ဒေါက်တာမြင့်ထွေးက ပြောကြားသည်။

ကျန်းမာရေးနှင့် အားကစားဝန်ကြီးဌာနက (၉)လတာသင်ကြားပေးသည့် သူနာပြုအကူသင်တန်းများကို ၂၀၁၄ ခုနှစ်နှင့် ၂၀၁၅ ခုနှစ်များက (၂)ကြိမ်ခေါ်ယူခဲ့ပြီးနောက် ဆက်လက်ခေါ်ယူတော့ခြင်းမရှိသဖြင့် အဆိုပါသင်တန်းများ ပြန်လည်ဖွင့်လှစ်ရန်နှင့် ပြင်ပသင်တန်းများအား ဖွင့်ခွင့်ပြုပါက အရည်အသွေးမြင့်သင်တန်းများဖြစ်စေရန်  လုပ်ဆောင်ရမည့် အချက်အလက်များကို နှစ်ရက်တာဆွေးနွေးပွဲတွင် ဆွေးနွေးမည်ဖြစ်ကြောင်း သိရသည်။

Tachileik News Agency