~~~~~~~~⊰❂ Unicode Version ❂⊱~~~~~~~~

ဘင်္ဂလားဒေ့ရှ်အွန်လိုင်းသတင်းမီဒီယာတစ်ခုဖြစ်သည့် Banglanews24 က  မြန်မာနိုင်ငံတွင် နေရပ်စွန့်ခွာ ရိုဟင်ဂျာဆိုသူများအတွက် Safe Zone တည်ထောင်ပေးရန် တရုတ်နိုင်ငံက သဘောတူသည်ဟု မတ်လ (၃)ရက်နေ့က သတင်းဆောင်းပါး ရေးသားထားမှုမှာ အခြေအနေမှန်နှင့်ကင်းကွာနေပြီး ပကတိအခြေအနေမှာ Safe Zone တည်ဆောက်ရန် ဘင်္ဂလားဒေ့ရှ်၏ အဆိုပြုလာချက်ကို မြန်မာနိုင်ငံအနေဖြင့် အစဉ်တစိုက်လုံးဝပယ်ချခဲ့ပြီး တရုတ်အပါအဝင် အာဆီယံနိုင်ငံများအနေဖြင့်လည်း မည်သည့်သဘောတူညီချက် တစ်စုံတစ်ရာမှ ပေးခြင်းမရှိကြောင်း မြန်မာသံရုံးက သတင်းထုတ်ပြန်သည်။

အဆိုပါသတင်းဆောင်းပါးရေးသားဖေါ်ပြချက်နှင့်ပတ်သက်၍ ရန်ကုန်အခြေစိုက် တရုတ်သံရုံးကလည်း တရုတ်နိုင်ငံအနေဖြင့် မြန်မာနိုင်ငံတွင် Safe Zone တည်ထောင်သည်ကို မထောက်ခံပါကြောင်းနှင့် ရခိုင်အရေးနှင့်ပတ်သက်၍ တရုတ်နိုင်ငံ၏ ရပ်တည်ချက်သည် အမြဲတစေ တိတိကျကျဖြစ်ပါသည်ဟု သတင်းထုတ်ပြန်ထားသည်။

မြန်မာနိုင်ငံနှင့်ပတ်သက်၍ ဘင်္ဂလားဒေ့ရှ် အခြေစိုက် The Daily Star သတင်းစာကလည်း ၂၀၁၉ ခုနှစ် ဖေဖေါ်ဝါရီလ (၂၃)ရက်နေ့က ဘင်္ဂလားဒေ့ရှ် နိုင်ငံတွင် အပြန်အလှန် ပစ်ခတ်မှုအတွင်း ARSA အကြမ်းဖက် ခေါင်းဆောင် သေဆုံးမှုသတင်းဖေါ်ပြရာ၌ အဆိုပါ သေဆုံးသူအား မြန်မာနိုင်ငံသား ဒုစရိုက်မှုကျူးလွန်သူဟု ဖေါ်ပြမှုနှင့်ပတ်သက်၍ ဒါကာအခြေစိုက် မြန်မာသံရုံးက အခြားသတင်းဌာနများတွင် ARSA အကြမ်းဖက်ခေါင်းဆောင်ဟု ရေးသားဖေါ်ပြချက်များနှင့် နှိုင်းယှဉ်ပြပြီး သတင်းထုတ်ပြန်ခဲ့သည်။

၂၀၁၉ ခုနှစ်အတွင်း ဇန်နဝါရီလ (၂၀)ရက်နေ့ကလည်း ဘင်္ဂလားဒေ့ရှ်နိုင်ငံမှ သတင်းမီဒီယာ (၂)ခုဖြစ်သည့် Daily Observer နှင့် Weeklybangladeshny တို့က မြန်မာနိုင်ငံဘက်ခြမ်းတွင် တံတားဆောက်နေခြင်းမဟုတ်ဘဲ နယ်နမိတ်တွင် သံဆူးကြိုးခြံစည်းရိုးခတ်ရန် ပြင်ဆင်နေသည်ဟု သတင်းဖေါ်ပြချက်၏ မြေပြင်အခြေအနေနှင့် ကွဲလွဲနေမှု၊ ဘင်္ဂလားဒေ့ရှ် နိုင်ငံခြားရေးဝန်ကြီးဌာနက မြန်မာသံအမတ်ကြီးထံ ပေးပို့သည့် မေတ္တာရပ်ခံစာတွင် ဖေါ်ပြထားသည့် နိုင်ငံတကာနယ်စပ်မျဉ်းမှ ပေ (၁၅၀) ဇုန်အတွင်း မြန်မာဘက်မှ ကွန်ကရစ်တိုင်များ ဆောက်လုပ်နေခြင်းကို ရပ်တန့်ပေးပါရန်ဟု ဖေါ်ပြချက်တို့မှာ မြေပြင်အခြေအနေနှင့် ကွဲလွဲနေကြောင်း ဒါကာအခြေစိုက် မြန်မာသံရုံးမှ သံအမတ်ကြီး ဦးလွင်ဦးက ရှင်းလင်းပြောကြားပြီး သတင်းထုတ်ပြန်ချက်တစ်စောင်ကို ထုတ်ပြန်ခဲ့သည်ကို တွေ့ရသည်။

Tachileik News Agency