~~~~~~~~⊰❂ Unicode Version ❂⊱~~~~~~~~

ထိုင်းနိုင်ငံတွင် ယာဉ်မှတ်ပုံတင်လိမ်လည်ရယူထားသည့် ဘတ်သန်း (၁၂၀)ကျော်တန်ဖိုးရှိ ဇိမ်ခံကား (၁၀)စီး ဖမ်းဆီးရမိ
*************
ထိုင်းနိုင်ငံတွင် မော်တော်ယာဉ်နံပါတ်တူကို အသုုံးပြုထားသည်ကိုတွေ့ရကြောင်း ယာဉ်ပိုင်ရှင်များက ရဲတပ်ဖွဲ့ထံအကြောင်းကြားခဲ့ရာမှ ယာဉ်မှတ်ပုံတင်လိမ်လည်ရယူထားသည့် ဘတ်သန်းပေါင်း (၁၂၀)ကျော်တန်ဖိုးရှိသည့် ဇိမ်ခံကား (၁၀)စီးကို ဖေါ်ထုတ်ဖမ်းဆီးနိုင်လိုက်ကြောင်း သိရသည်။

ဖမ်းဆီးလိုက်သည့်မော်တော်ယာဉ်များအနက် အချို့မှာ ယာဉ်တိုက်မှုများကြောင့် ပျက်စီးသွားသည့် မော်တော်ယာဉ်များ၏ နံပါတ်များကို အသုံးပြုထားပြီး အကောက်ခွန်တွင် လိမ်လည်တင်သွင်းလာသည့် မော်တော်ယာဉ်များဖြစ်ကြောင်း ရဲတပ်ဖွဲ့က ၂၀၁၉ ခုနှစ်၊ မေလ (၃၀)ရက်နေ့တွင် သတင်းမီဒီယာများကို ပြောကြားလိုက်ကြောင်း ဘန်ကောက်ပို့စ်သတင်းအရ သိရသည်။

မှောင်ခိုတင်သွင်းလာသည့် အဆိုပါဇိမ်ခံကားများကို ယာဉ်မှတ်ပုံတင်ရာတွင် လိမ်လည်မှတ်ပုံတင်ခဲ့ပြီး အချို့မော်တော်ယာဉ်များမှာ ဘတ် (၂၃)သန်းတန်အထိ ပါဝင်ကြောင်း သိရသည်။

မော်တော်ယာဉ်ပိုင်ရှင်အချို့က ၎င်းတို့၏ ပျက်စီးမော်တော်ယာဉ်နံပါတ်ပြားများကို အသုံးပြုထားသည့် ဇိမ်ခံကားအချို့ကို တွေ့ရကြောင်း ရဲတပ်ဖွဲ့ထံ သတင်းပေးပို့မှုနှင့် ဇိမ်ခံကားများကို စျေးနှုန်းလျှော့ရောင်းချသည့် ကြော်ငြာများကို စုံစမ်းဖေါ်ထုတ်ရာမှ ယင်းကဲ့သို့ ဖမ်းဆီးရမိခြင်းဖြစ်ကြောင်း သိရသည်။

Tachileik News Agency
Ref: Bangkok Post