~~~~~~~~⊰❂ Unicode Version ❂⊱~~~~~~~~

မိုင်းပျဉ်းတွင် ကျင်းပနေသည့် ဆေးလိပ်ငွေ့ကင်းစင်အထိမ်းအမှတ်အားကစားပြိုင်ပွဲများ၌ လူဦးရေ (၅၀၀)ကျော် ပါဝင်ယှဉ်ပြိုင်နေ
***********
ရှမ်းပြည်နယ်အရှေ့ပိုင်း၊ ကျိုင်းတုံခရိုင်၊ မိုင်းပျဉ်းမြို့တွင် ဆေးလိပ်ငွေ့ကင်းစင်ရှမ်းပြည်တခွင်အထိမ်းအမှတ် Township Sport Development Program အရ အားကစားပြိုင်ပွဲများကို ၂၀၁၉ ခုနှစ် ဇွန်လ (၃၀)ရက်နေ့တွင် ဒုတိယမြောက်နေ့အဖြစ် ဆက်လက်ကျင်းပနေသည်။

မိုင်းပျဉ်းမြို့တွင် ဘောလုံး၊ ဘော်လီဘော၊ ပိုက်ကျော်ခြင်းနှင့် မီနီမာရသွန် အားကစား ပြိုင်ပွဲများကျင်းပနေရာ ရပ်ကွက်/ကျေးရွာများမှ အားကစားသမားများနှင့် ့ ကျောင်းသားကျောင်းသူ စုစုပေါင်း (၅၃၀) ဦး ပါဝင်ယှဉ်ပြိုင်နေကြခြင်းဖြစ်ကြောင်း သိရသည်။

ဆေးလိပ်ငွေ့ကင်းစင်ရှမ်းပြည်တခွင်အထိမ်းအမှတ် Township Sport Development Program အရ အားကစားပြိုင်ပွဲများကို ရှမ်းပြည်နယ်အတွင်း မြို့နယ်အလိုက်ကျင်းပပေးနေပြီး ဆေးလိပ်မသောက်ဘဲ ဆေးလိပ်ငွေ့ရှုရှိုက်နေရသည့် အမျိုးသမီးများနှင့် ကလေးငယ်များအပါအဝင် တစ်ဆင့်ခံ ဆေးလိပ်ငွေ့ဒဏ်ခံနေရသူများကို ကာကွယ်နိုင်ရန်၊ မူးယစ်ဆေးဝါးတိုက်ဖျက်ရေးလုပ်ငန်းတွင် အထောက်အကူဖြစ်စေရန်၊ အများပြည်သူဆိုင်ရာနေရာများတွင် ဆေးလိပ်မသောက်ခြင်းဖြင့် အများပြည်သူအား လေးစားတတ်သည့် အမူအကျင့်ကောင်းများရရှိစေရန်၊ ဆေးလိပ်ငွေ့ကင်းစင်ဝန်းကျင်ဖြစ်စေရန်နှင့် ကျန်းမာကြံ့ခိုင်သည့်နိုင်ငံသားများဖြစ်စေရန် ရည်ရွယ်ချက်ဖြင့် ကျင်းပနေခြင်းဖြစ်ကြောင်း ရှမ်းပြည်နယ်အစိုးရအဖွဲ့ဝင် လူမှုရေးဝန်ကြီး ဒေါက်တာမျိုးထွန်းက တာချီလိတ်သတင်းအေဂျင်စီသို့ ပြောကြားသည်။

Tachileik News Agency
Photo: MT