~~~~~~~~⊰❂ Unicode Version ❂⊱~~~~~~~~

ထိုင်းနိုင်ငံရှိ ရွှေ့ပြောင်းလုပ်သားများ အလုပ်လုပ်ကိုင်ခွင့်သက်တမ်း (၂)နှစ်ထပ်တိုးပေးနိုင်ရေး အလုပ်သမားဝန်ကြီးဌာန ကြိုးစားနေဆဲ
***********
ထိုင်းနိုင်ငံရှိ ရွှေ့ပြောင်းလုပ်သားများအား အလုပ်လုပ်ကိုင်ခွင့်သက်တမ်း (၂)နှစ် ထပ်တိုးပေးနိုင်ရန် ကတ်ဘိနက်အနေဖြင့် အတည်ပြုပေးနိုင်ရေးကို အလုပ်သမားဝန်ကြီးက ယခုလအတွင်း တင်ပြဆွေးနွေးသွားမည်ဖြစ်ကြောင်း သိရသည်။

ထိုင်းနိုင်ငံတွင် အလုပ်လုပ်ကိုင်နေသည့် မြန်မာ၊ လာအိုနှင့် ကမ္ဘောဒီးယားနိုင်ငံသား ရွှေ့ပြောင်းလုပ်သား (၂)သန်းခန့်အား အလုပ်လုပ်ကိုင်ခွင့်သက်တမ်းထပ်တိုးပေးနိုင်ရန် ဆောင်ရွက်နေခြင်းဖြစ်ကြောင်း သိရသည်။

ယင်းကဲ့သို့ သက်တမ်းတိုးပေးမည့်အစီအစဉ်သည် ရွှေ့ပြောင်းလုပ်သားများနှင့် အလုပ်ရှင်များကို ကုန်ကျစရိတ်သက်သာစေရန် လုပ်ဆောင်ပေးခြင်းဖြစ်ပြီး သက်တမ်းတိုးမည့် အလုပ်သမားများအနေဖြင့် နေရပ်ပြန်စရာမလိုဘဲ အလုပ်သမားဝန်ကြီးဌာန၏ one-stop service စင်တာများမှတစ်ဆင့် သက်တမ်းတိုးနိုင်ရန် စီစဉ်ထားခြင်းဖြစ်ကြောင်း သိရသည်။

ငါးဖမ်းလုပ်ငန်းများမှ လုပ်သားများအပါအဝင် ရွှေ့ပြောင်းလုပ်သားများ၏ အလုပ်လုပ်ကိုင်ခွင့် သက်တမ်းမှာ ၂၀၁၉ ခုနှစ်၊ စက်တင်ဘာနှင့် နိိုဝင်ဘာလများတွင် သက်တမ်းကုန်ကြတော့မည်ဖြစ်ရာ ကတ်ဘိနက်အနေဖြင့် အချိန်မီအတည်ပြုပေးနိုင်ရန် မျှော်လင့်ထားသည်ဟု အလုပ်သမားဝန်ကြီးက ဆိုသည်။

ယင်းအပြင် အလုပ်လုပ်ကိုင်ခွင့်သက်တမ်းတိုးခြင်းကို အွန်လိုင်းမှဆောင်ရွက်နိုင်ရန်ဆောင်ရွက်ထားပြီး ရွှေ့ပြောင်းလုပ်သားများအနေဖြင့် ဂဏန်း(၁၃)လုံးပါသည့် ID ဖြင့် အွန်လိုင်းမှ အလုပ်လုပ်ကိုင်ခွင့်လျှောက်ထားခြင်းကို ဆောင်ရွက်နိုင်မည်ဖြစ်ကြောင်း သိရသည်။

အွန်လိုင်းမှ ချိတ်ဆက်ဆောင်ရွက်စေခြင်းဖြင့် ရွှေ့ပြောင်းလုပ်သားများဆိုင်ရာ အချက်အလက်များကို ပိုမိုထိရောက်စွာ စီမံခန့်ခွဲနိုင်ရန်အပြင် ရွှေ့ပြောင်းလုပ်သားများအနေဖြင့် အေးဂျင့်များ၊ အလုပ်ရှင်များအား ပေးနေရသည့် အလုပ်လုပ်ကိုင်ခွင့်လျှောက်ထားခြင်းဆိုင်ရာ ကုန်ကျစရိတ်များကိုလည်း လျှော့ချသွားနိုင်ရန် ရည်ရွယ်ခြင်းဖြစ်ကြောင်း သိရသည်။

Tachileik News Agency
Ref: Bangkok Post