Ref: The Nation

~~~~~~~~⊰❂ Unicode Version ❂⊱~~~~~~~~

ထိုင်းနိုင်ငံတွင် အခြေခံပညာကျောင်းသားများအတွက် နေ့လယ်စာအသုံးစရိတ်များကို အလွဲသုံးစားပြုသည့် ကျောင်းများစစ်ဆေးတွေ့ရှိ
********************
ထိုင်းနိုင်ငံအတွင်း အခြေခံပညာကျောင်းများတွင် နေ့လယ်စာအသုံးစရိတ်များကို အလွဲသုံးစားပြုသည်ကို စစ်ဆေးတွေ့ရှိရပြီးနောက် ကျောင်းနေ့လယ်စာများအတွက် အစားအသောက်ကန်ထရိုက်ရယူသူများအား ပိုမိုတင်းကြပ်သည့် စည်းမျဉ်းစည်းကမ်းများဖြင့် စာချုပ်များပြန်လည်ချုပ်ဆိုရန် ပြည်ထဲရေးဝန်ကြီးဌာနက တိုက်တွန်းလိုက်သည်။

ကျောင်းတာဝန်ရှိသူများအနေဖြင့် ကျောင်းသားများ၏ နေ့လယ်စာ ပမာဏကိုသာမက အရည်အသွေးကိုပါ တာဝန်ယူမည့် အစားအသောက်ကန်ထရိုက်များကိုသာ ခွင့်ပြုရန် အကြံပြုထားခြင်းဖြစ်သည်။

ယင်းအပြင် ကျောင်းနေ့လယ်စာများကို အလျဉ်းသင့်သလို စစ်ဆေးခြင်းများပြုလုပ်နိုင်သည့် ဒေသဆိုင်ရာအဆင့် ကော်မတီတစ်ရပ်ဖွဲ့စည်းပြီး ကြီးကြပ်ရန်နှင့် အစားအသောက်တင်သွင်းသူများအနေဖြင့်လည်း ကျောင်းသားများအတွက် နေ့စဉ်အစားအသောက်စာရင်းကို ကြိုတင်အသိပေးထားခြင်းများ ပြုလုပ်ကြရန်လိုအပ်သည်ဟု ဆိုသည်။

ကျောငး်နေ့လယ်စာအသုံးစရိတ်များကို အလွဲသုံးစားပြုသူများအနေဖြင့် ပြင်းထန်သည့်အရေးယူမှုများနှင့် ရင်ဆိုင်ရမည်ဖြစ်ကာ ထိုင်းနိုင်ငံတွင်းမှ အခြေခံပညာကျောင်းသားများအတွက် အခမဲ့နေ့လယ်စာအစီအစဉ်၏ အခြေအနေနှင့်ပတ်သက်၍ အစီရင်ခံစာများကို သက်ဆိုင်ရာကျောင်းများအလိုက် ၂၀၁၉ ခုနှစ်၊ ဇူလိုင်လ (၂၂)ရက်နေ့ နောက်ဆုံးထား၍ သက်ဆိုင်ရာသို့ တင်ပြကြရမည်ဖြစ်ကြောင်း သိရသည်။

လက်ရှိတွင် အကျင့်ပျက်ခြစားမှုတိုက်ဖျက်ရေးကော်မရှင်၏ စစ်ဆေးပေါ်ပေါက်ချက်များအရ အချို့ကျောင်းများက ကျောင်းသားများအတွက် နေ့လယ်စာအစီအစဉ်မှ ဘတ်ဂျက်တစ်ဝက်ကိုသာ သုံးစွဲပြီး ကျန်ဘတ်ဂျက်များကို အခြားနေရာတွင် သုံးစွဲခြင်း၊ အချို့မှာ မည်သည့်နေရာတွင် သုံးစွဲသည်ကို ပြသနိုင်မှုမရှိခြင်း၊ အချို့ကျောင်းများက နေ့လယ်စာအစီအစဉ်အတွက် မပါဝင်သည့် အတန်းများနှင့် ဆရာ၊ဆရာမများအတွက်ပါ ခွဲဝေသုံးစွဲခြင်းများကို တွေ့ရှိထားရကြောင်း သိရသည်။

Tachileik News Agency
Ref: The Nation