ရှမ်းပြည်နယ်(အရှေ့ပိုင်း)အတွင်းမှ ၂၀၁၈ - ၂၀၁၉ ပညာသင်နှစ်က အောင်မြင်ခဲ့သည့် တက္ကသိုလ်ဝင်တန်းအောင်သူ အာခါတိုင်းရင်းသား ကျောင်းသား ကျောင်းသူ (၂၉၂)ဦးအား ဂုဏ်ပြုချီးမြှင့်ပွဲ အခမ်းအနားကို တာချီလိတ်မြို့ရှိ အောင်မြတ်ခန်းမတွင် ၂၀၁၉ခုနှစ် ဇူလိုင်လ(၁၅)ရက်နေ့ နေ့လည်ပိုင်းက ကျင်းပပြုလုပ်ခဲ့ကြသည်။

"အာခါတိုင်းရင်းများအနေဖြင့် ၁၉၈၀ မတိုင်မီက ပညာတတ်နည်းပါးခဲ့ပြီး ယခုအခါမှာတော့ Ph.D  ဒေါက်တာဘွဲ့ရ (၄) ဦး၊ ဆေးဘက်ဆိုင်ရာဒေါက်တာ(၁၆) ဦးနဲ့ ဆေးဘက်ဆိုင်ရာဝန်ထမ်းများ၊ အသိပညာရှင် အတတ် ပညာရှင်များ၊ ဌာနဆိုင်ရာဝန်ထမ်းများအဖြစ် တာဝန်ထမ်းဆောင်နေသည့်အတွက် များစွာဂုဏ်ယူ ၀မ်းမြောက်မိပါကြောင်း၊ တပ်မတော်တွင်လည်း အငြိမ်းစားဒုတိယဗိုလ်မှူးကြီး (၂) ဦး၊ ဗိုလ်ကြီးအဆင့်အငြိမ်းစား (၁) ဦး၊ လက်ရှိတပ်မတော်မှာ တာဝန်ထမ်းဆောင်စဲ တပ်ရင်းမှူးအဆင့် ဒုတိယဗိုလ်မှူးကြီး (၁) ဦး၊ ဗိုလ်ကြီးအဆင့် (၂) ဦးတာဝန်ထမ်းဆောင်နေပြီး ဗိုလ်ကြီးတစ်ဦးမှာ ရုရှားနိုင်ငံတွင် Ph.D သင်တန်းတက်ရောက်နေကြောင်း အသိပေးလိုပါတယ်"ဟု တြိဂံဒေသတိုင်းစစ်ဌာနချုပ်တိုင်းမှူး ဗိုလ်ချုပ်ခင်လှိုင်က အဖွင့်မိန့်ခွန်းတွင် ပြောကြားခဲ့သည်။

၂၀၁၉ တက္ကသိုလ်ဝင်တန်းအောင်မြင်သည့် အာခါတိုင်းရင်းသား ကျောင်းသား ကျောင်းသူ (၂၉၂)ဦးတွင် (၅)ဘာသာ ဂုဏ်ထူးရှင်(၁)ဦး၊ (၂)ဘာသာ ဂုဏ်ထူးရှင် (၃)ဦး နှင့် (၁)ဘာသာ ဂုဏ်ထူးရှင် (၃၀)ဦး ပါဝင်ကြောင်း၊ အဆိုပါ အာခါတိုင်းရင်းသား ကျောင်းသား ကျောင်းသူများတွင် ကျိုင်းတုံမှ (၁၄၄)ဦး၊ တာချီလိတ်မှ (၇၄)ဦး၊ မိုင်းဖြတ်မှ (၂၀)ဦး၊ တာလေမှ (၁၈)ဦး၊ မိုင်းဆတ်မှ(၁၄)ဦး၊ မိုင်းယောင်း နှင့် မိုင်းယုမြို့တို့မှ (၁၁)ဦး၊ တုံတာ မှ (၅)ဦး၊ မိုင်းပျဉ်းမှ (၂)ဦး၊ မိုင်းခတ် မှ (၂)ဦး နှင့် မိုင်းယန်းမှ (၂)ဦးတို့ဖြစ်ကြောင်း သိရသည်။

"မြန်မာနိုင်ငံမှာ တိုင်းရင်းသား (၁၃၅) မျိုးရှိပါတယ်။ ဒါပေမယ့်အာခါတိုင်းရင်းသားတွေဟာ ရှမ်းပြည်နယ်အရှေ့ပိုင်းမှာ အများစုနေထိုင်ကြပြီးမှ လူဦးရေအားဖြင့် (၂) သိန်းပတ်ဝန်းကျင်လောက်ရှိတယ်လို့ ခန့်မှန်းပါတယ်။ တကယ်တန်း နယ်စပ်ဒေသမှာ မှတ်ပုံတင်မလုပ်နိုင်သေးတဲ့ အိမ်ထောင်စုစာရင်းမလုပ်နိုင်သေးတဲ့ အာခါတိုင်းရင်းသား များစွာကျန်နေသေးတယ်ဆိုတာလည်း ကျွန်တော်တို့ လေ့လာသိရှိရပါတယ်။ ၁၉၈၀ ပြည့်နှစ်ကနေပြီးတော့မှ ဒီဘက်ပိုင်းမှာ ပညာရေးကို တစ်မျိုးသားလုံး မိဘရော လူကြီးသူမတွေရော ပညာတတ်မှ တခြားတိုင်းရင်းသားတွေနဲ့ ရင်ဘောင်တန်းနိုင်မယ်ဆိုတဲ့စိတ်ဓာတ်မျိုးနဲ့ ကြိုးစားလာခဲ့တာဖြစ်ပါတယ်"ဟု ရှမ်းပြည်နယ်အစိုးရအဖွဲ့ဝင် အာခါတိုင်းရင်းသားလူမျိုးရေးရာဝန်ကြီး ဦးအာဗေလက ဂုဏ်ပြုပွဲအခမ်းအနားတွင် ပြောကြားသည်။

အာခါတိုင်းရင်းသားများအနေဖြင့် ပညာတတ်များမွေးထုတ်နိုင်ရေးအတွက် နှစ်စဉ်တက္ကသိုလ်ဝင်တန်းအောင်ကျောင်းသား၊ ကျောင်းသူ (၂၀၀) ဦးမွေးထုတ်နိုင်ရန် စီစဉ်ခဲ့ပြီး ၂၀၁၅-၂၀၁၆ ပညာသင်နှစ်တွင် အောင်မြင်သူ (၂၀၀) ဦးခန့်၊ ၂၀၁၆-၂၀၁၇ ပညာသင်နှစ်တွင် (၃၀၀) ဦးခန့်၊ ၂၀၁၇-၂၀၁၈ ပညာသင်နှစ်တွင် (၂၅၆) ဦး၊ ၂၀၁၈-၂၀၁၉ ပညာသင်နှစ်တွင် (၂၉၂) ဦး အောင်မြင်ခဲ့ကြောင်း သိရသည်။     

"လူမျိုးတစ်မျိုး တိုးတက်လာတယ်၊ လူမျိုးတစ်မျိုးက ဘယ်အခြေအနေ ဘယ်အဆင့်အတန်းထိရှိတယ်ဆိုတာ ပထမဆုံးတိုင်းတာတာက ပညာရေးပဲဖြစ်ပါတယ်။ ကျွဲ၊ နွား ဘယ်လောက်မွေးနိုင်လဲ၊ စပါးဘယ်လောက်စိုက်နိုင်လဲ သတ်မှတ်ခြင်း မရှိပါဘူး။ ရွာတစ်ရွာဝင်လိုက်ရင် ပညာတတ်ဘယ်လောက်ရှိလဲ လေ့လာလိုက်ရင် ဒီလူမျိုးရဲ့အဆင့်အတန်းကို သိရှိနိုင်မှာ ဖြစ်ပါတယ်"ဟု ရှမ်းပြည်နယ်အစိုးရအဖွဲ့ဝင် လီဆူတိုင်းရင်းသားလူမျိုးရေးရာဝန်ကြီး ဦးဂူဆာက ဂုဏ်ပြုပွဲအခမ်းအနားတွင် ပြောကြားသည်။

အဆိုပါ ဂုဏ်ပြုပွဲ အခမ်းအနားသို့  တြိဂံဒေသတိုင်းစစ်ဌာနချုပ်တိုင်းမှူးဗိုလ်ချုပ်ခင်လှိုင် ၊ ရှမ်းပြည်နယ်အစိုးရအဖွဲ့ဝင် အာခါတိုင်းရင်းသားလူမျိုးရေးရာဝန်ကြီး ဦးအာဗေလ ၊ လီဆူတိုင်းရင်းသားလူမျိုးရေးရာဝန်ကြီး ဦးဂူဆာ ၊ ရှမ်းပြည်နယ်(အရှေ့ပိုင်း)ဒုတိယအုပ်ချုပ်ရေးမှူး ဦးရဲနိုင် နှင့် ဌာနဆိုင်ရာများ၊ လူမှုရေးအသင်းဖွဲ့များ ကျောင်းသား ကျောင်းသူများနှင့် ဖိတ်ကြားထားသူများ တက်ရောက်ခဲ့ကြောင်း သိရသည်။

ဂုဏ်ပြုပွဲ အခမ်းအနားကို ရှမ်းပြည်နယ်အစိုးရအဖွဲ့ဝင်၊ အာခါတိုင်းရင်းသားရေးရာဝန်ကြီး၏ ဦးဆောင်မှုဖြင့် အာခါမျိုးသားဖွံ့ဖြိုးတိုးတက်ရေးပါတီနှင့် အာခါအမျိုးသားစာပေနှင့်ယဉ်ကျေးမှုအသင်းတို့က ပူးပေါင်းကျင်းပခြင်းဖြစ်ပြီး ရှမ်းပြည်နယ်(အရှေ့ပိုင်း)အတွင်းဖြစ်သည့် တာချီလိတ်ခရိုင်၊ မိုင်းဆတ် ခရိုင် နှင့် ကျိုင်းတုံခရိုင်တို့မှ ၂၀၁၉ခုနှစ်အတွင်း တက္ကသိုလ်ဝင်တန်းအောင်  အာခါတိုင်းရင်းသားများကို သီးသန့်ဂုဏ်ပြုခြင်းဖြစ်ကြောင်း နှင့် ယခုလို နှစ်စဉ် ဂုဏ်ပြုပွဲကျင်းပပြုလုပ်ပေးလေ့ရှိကြောင်း သိရှိရသည်။

Tachileik News Agency
သတင်း - ဟန်စိုးထိုက်
ဓါတ်ပုံ - ကျော်ဇင်ဟိန်း

 

~~~~~~~~⊰❂ Unicode Version ❂⊱~~~~~~~~