~~~~~~~~⊰❂ Unicode Version ❂⊱~~~~~~~~

တာချီလိတ်တွင် ကျေးရွာအတွင်း ဓါးကိုင်သောင်းကျန်းနေသူကို သွားရောက် ထိန်းသိမ်းရာမှ တူမီးသေနတ်နှင့်အတူ ဖမ်းဆီးရမိ
********
တာချီလိတ်မြို့နယ်၊ မိုင်းဟဲကျေးရွာအုပ်စု၊ ပန်နယ်ကျေးရွာအတွင်း အမျိုးသားတစ်ဦး ဓါးကိုင်သောင်းကျန်းပြီး မိသားစုဝင်များအား အန္တရာယ်ပြုနိုင်ကြောင်း ရဲတပ်ဖွဲ့သို့ သတင်းပေးတိုင်တန်းချက်အရ သွားရောက်စစ်ဆေးရာက တူမီးသေနတ်နှင့်အတူ ခဲယမ်းများဖြင့် ဖမ်းဆီးရမိကြောင်း သိရသည်။

အဆိုပါ ဖြစ်စဉ်နှင့် ပတ်သက်၍ ၂၀၁၉ခုနှစ် သြဂုတ်လ(၁၁)ရက်နေ့ နံနက် (၁၀)နာရီခွဲဝန်းကျင်အချိန်က ဟောင်လိတ်ရဲကင်းစခန်းမှ ဒုရဲအုပ်ဇော်မင်းထိုက် နှင့် အဖွဲ့မှ  မိုင်းဟဲကျေးရွာအုပ်စု၊ ပန်နယ်ကျေးရွာသို့ သွားရောက် စစ်ဆေးရာ အသက်(၃၀)၀န်းကျင်ရှိ ကျမူဆိုသူသည် အရှည် (၂၀)လက်မခန့်ရှိသည့် ဓါးရှည်တစ်ချောင်း ကိုင်ဆောင်ပြီး နေအိမ်ခြံဝန်းအတွင်း သောင်းကျန်းနေသည့်အတွက် ၀ိုင်းဝန်းဖမ်းဆီး ထိန်းသိမ်းလိုက်ကြပြီးနောက် ၎င်းသည် တူမီးသေနတ်ကိုင်ဆောင်လေ့ရှိကြောင်း သိရှိရခြင်းကြောင့် နေအိမ်အတွင်း ၀င်ရောက်ရှာဖွေ စစ်ဆေးရာက ၎င်းအိပ်သည့် အိပ်ခန်းအတွင်း၌ တူမီးသေနတ်(၁)လက်၊ ခဲသီး(၅)လုံး၊ ယမ်းကဒ်(၂၅)ခု နှင့် ယမ်းမှုန့် (၆၀)ဂရမ်ဝန်းကျင်တို့အား ရှာဖွေတွေ့ရှိ သိမ်းဆည်းရရှိခြင်း ဖြစ်ကြောင်း သိရသည်။

သိမ်းဆည်းရမိသည့် တူမီးသေနတ်အား   တောလိုက်ရန်အတွက် ဆောင်ထားခြင်းဖြစ်ကြောင်း သိရသည်။

ဓါးကိုင်သောင်းကျန်းပြီး တူမီးသေနတ်နှင့်အတူ ဖမ်းဆီးရမိသည့် ကျမူ အား တာချီလိတ်မြို့မရဲစခန်းတွင် (ပ)၄၅၈/၂၀၁၉၊  ရှမ်းလက်နက်ဥပဒေအမိန့်အမှတ် ၁၂(က)အရ အမှုဖွင့်အရေးယူဆောင်ရွက်ထားရှိကြောင်း သိရှိရသည်။

Tachileik News Agency