~~~~~~~~⊰❂ Unicode Version ❂⊱~~~~~~~~

ရန်ကုန်-ရေး-ထားဝယ်-မြိတ်လမ်းပိုင်းမှ ပြိုကျသွားသည့် မလွဲတောင်ပေါ်အပိုင်း  ဘေလီတံတား သံဘောင်တံတားထိုးခြင်း ဆောင်ရွက်နေ
************
မိုးသည်းထန်စွာရွာသွန်းပြီး လမ်းသားပြတ်ကျသွားသည့် တနင်္သာရီတိုင်းဒေသကြီး ရန်ကုန်-ရေး-ထားဝယ်-မြိတ်လမ်းပိုင်းရှိ ထားဝယ်မြို့မှ မိုင်တိုင်(၈၀/၄) အကွာ မလွဲတောင်ပေါ်လမ်းပိုင်းတွင် ဘေလီတံတား သံဘောင်ထိုးခြင်းကို ၂၀၁၉ ခုနှစ်၊ သြဂုတ်လ (၁၄) ရက်နေ့ညပိုင်းမှစတင်ပြီး ဆောင်ရွက်နေပြီဖြစ်သည်။

တောင်ပြိုကျပြီး လမ်းသားပြတ်ကျသွားသည့် မလွဲတောင်လမ်းပိုင်းတွင် လမ်းအထူးအဖွဲ့ (၂၃) နှင့် တံတားအထူးအဖွဲ့ (၄) တို့က ဘေလီတံတားထိုးခြင်းလုပ်ငန်းကို သြဂုတ်လ (၁၄)ရက်နေ့ ညနေ(၄)နာရီကတည်းက စတင်နေခြင်းဖြစ်ပြီး သြဂုတ်လ (၁၆)ရက်နေ့တွင် အသုံးပြုနိုင်ဖွယ်ရှိသည်ဟု ခန့်မှန်းထားကြောင်း  ဆောက်လုပ်ရေးဝန်ကြီးဌာနက သတင်းထုတ်ပြန်ထားသည်။

ရေကြီးနစ်မြှပ်မှုနှင့် မြေပြိုမှုများကြောင့် ပျက်စီးသွားသည့် ရန်ကုန်-ရေး-ထားဝယ်-မြိတ်လမ်းပိုင်းများကိုပြင်ဆင်နေပြီး ကားငယ်များ ဖြတ်သန်းသွားလာနိုင်မည့် ဘေလီတံတားထိုးခြင်း လုပ်ငန်းကို သြဂုတ်လ (၁၆) ရက်နေ့တွင် အပြီးတည်ဆောက်သွားမည်ဖြစ်ပြီး ကုန်ကားကြီးများ သြဂုတ်လ (၁၈) ရက်နေ့တွင် ဖြတ်သန်းသွားနိုင်ဖွယ်ရှိကြောင်း သိရသည်။

တနသာင်္ရီတိုင်းဒေသကြီးအတွင်း လမ်းသားပြတ်တောက်နေသော ထားဝယ်မှ ၈၀/၂ မိုင်အကွာအထိ တောင်ပြိုလမ်းများအား မွန်ပြည်နယ်၊ လမ်းဦးစီးဌာနက ဖယ်ရှားရှင်းလင်းခဲ့ပြီး တနသာင်္ရီတိုင်းဒေသကြီး မလွဲတောင်-ထားဝယ်လမ်းပိုင်းတွင် တောင်ပြိုမြေ ဖယ်ရှားရှင်းလင်းခြင်းအား လမ်းအထူးအဖွဲ့က ဆောင်ရွက်နေရာ သြဂုတ်လ (၁၄)ရက်နေ့တွင် ပြီးစီးသွားခဲ့သဖြင့် တောင်နံရံလမ်းမြေသားတိုးချဲ့ခြင်းလုပ်ငန်းများကို ဆက်လက်ဆောင်ရွက်နေကြောင်း သိရသည်။

Tachileik News Agency
ဓါတ်ပုံ - ဆောက်လုပ်ရေးဝန်ကြီးဌာန