ထိုင်းနိုင်ငံတွင် တစ်ခါသုံးပလတ်စတစ်အိတ်များ (ကြွပ်ကြွပ်အိတ်များ) အသုံးပြုမှုကို ၂၀၂၀ ခုနှစ်တွင် ရပ်ဆိုင်းရန် ကုန်တိုက်ကြီးများ၊ ပလတ်စတစ်ထုတ်လုပ်သည့်လုပ်ငန်းများနှင့် စတိုးဆိုင်များက သဘောတူညီလိုက်ကြပြီဖြစ်သည်။

“ဒီပူးပေါင်းဆောင်ရွက်မှုက ထိုင်းနိုင်ငံကို ပင်လယ်ပြင်မှာ အမှိုက်စွန့်ပစ်မှုနဲ့ စွန့်ပစ်အမှိုက်အများဆုံးစာရင်းကနေ ပယ်ဖျက်သွားမှာ ဖြစ်ပါတယ်”ဟု သဘာဝပတ်ဝန်းကျင်ထိန်းသိမ်းရေးဝန်ကြီးဌာနက ၂၀၁၉ ခုနှစ်၊ စက်တင်ဘာလ (၆)ရက်နေ့က သတင်းစာရှင်းလင်းပွဲတွင် ပြောကြားသည်။

သဘာဝပတ်ဝန်းကျင်ထိန်းသိမ်းရေးဝန်ကြီးဌာနက ဦးဆောင်ပြုလုပ်သည့် တစ်ခါသုံးပလတ်စတစ်အိတ်များ အသုံးမပြုရေးကမ်ပိန်းသို့ ပါဝင်ကြရန် ဖိတ်ခေါ်ခဲ့ရာ ကုန်တိုက်ကြီးများ၊ ပလတ်စတစ်ထုတ်လုပ်သည့်လုပ်ငန်းများနှင့် စတိုးဆိုင်လုပ်ငန်းများ ပူးပေါင်းပါဝင်လာခြင်းဖြစ်ကြောင်း သိရသည်။

ယင်းသို့ ပူးပေါင်းလာသူများတွင် ထိုင်းနိုင်ငံတွင်း ကုမ္ပဏီကြီးများဖြစ်ကြသည့် Central Group၊ The Mall Group၊ CP All Plc၊ Robinson Plc၊ Bangchak Retail Co၊ Big C Supercenter Plc၊ Siam Makro Plc၊ Index Living Mall Plc၊ PTT Plc တို့အပြင် ပလတ်စတစ်ထုတ်လုပ်ငန်းများကလပ်ကလည်း ပူးပေါင်းလာခြင်းဖြစ်ကြောင်း သိရသည်။

အဆိုပါ လုပ်ငန်းများက တစ်ခါသုံးပလတ်စတစ်အိတ်များ အသုံးပြုမှုကို ၂၀၂၀ ခုနှစ် ဇန်နဝါရီလတွင် စတင်ရပ်ဆိုင်းကြတော့မည်ဖြစ်သည်။

ထိုင်းနိုင်ငံသည် နှစ်စဉ် တစ်ခါသုံး ပလတ်စတစ်အိတ်ပေါင်း (၄၅) ဘီလျံအသုံးပြုနပြေီး ယင်းတို့အနက် (၃၀)ရာခိုင်နှုန်းမှာ ကုန်တိုက်များနှင့် (၂၄)နာရီ စတိုးဆိုင်များမှ အသုံးပြုခြင်းဖြစ်ကာ လမ်းဘေးဈေးသည်များ၊ ရေပေါ်ဈေးသည်များက အသုံးပြုမှုမှာ (၃၀) ရာခိုင်နှုန်းရှိသည်ဟု ခန့်မှန်းထားခြင်းဖြစ်သည်။

Tachileik News Agency
Ref: Bangkok Post

~~~~~~~~⊰❂ Unicode Version ❂⊱~~~~~~~~