အင်အားပြင်း ငလျင်ဒဏ်ခံရသည့် ဒေသများ ပြန်လည်ထူထောင်ရေးအတွက် UWSA က ကျပ်သန်းနှစ်ထောင်မတည်ကာ ဒေသတွင်းနေ စေတနာရှင်များအားလုံး စုပေါင်း ပါဝင် လှူဒါန်းနိုင်ရန်အတွက် ၂၀၂၅ ခုနှစ် ဧပြီလကုန် နောက်ဆုံးထား၍ ရန်ပုံငွေရှာဖွေခြင်း အစီအစဉ်များ လုပ်ဆောင်ထားကြောင်း သိရသည်။
" ကျွန်တော်တို့အနေနဲ့ တစ်ဖက်မှာ အခက်အခဲရှိတယ်ဆိုရင် အမြဲကူညီမှုပေးနေတာပဲ ဖြစ်ပါတယ်။ ကိုယ်တိုင်မသွားနိုင်ရင်တောင် ကူညီနိုင်တဲ့ဖက်က ကူညီဖို့ ကြိုးစားလုပ်ဆောင်ပါတယ်။ လောက်ကိုင်စစ်ပွဲဖြစ်တုန်းကလည်း စစ်ဘေးရှောင်တွေကို ပစ်မထားခဲ့ပါဘူး။ ကူညီပေးခဲ့တာပဲ ဖြစ်ပါတယ်။ အခုလို အဖက်ဖက်က အခက်အခဲဖြစ်နေတဲ့အချိန်မှာ အခုလိုဖြစ်တော့ စိတ်မကောင်းပါဘူး။ ကိုယ့်နိုင်ငံသူ နိုင်ငံသား ကိုယ့်တိုင်းရင်းသားတွေ အချင်းချင်းပဲလေ။”ဟု UWSA လားရှိုးပြင်ပဆက်ဆံရေးရုံးတာဝန်ခံ ဦးညီရန်းက Tachileik News Agency ကို မတ်လ (၃၁)ရက်နေ့တွင် ပြောသည်။
ငလျင်ဘေးသင့်ဒေသ ပြန်လည်ထူထောင်ရေးအတွက် UWSA က ကျပ်သန်းနှစ်ထောင် မတည်ကာ ဒေသတွင်းမှ လုပ်ငန်းရှင်များ နှင့် အစုအဖွဲ့များ၊ ပြည်သူများအနေဖြင့် ဧပြီလ (၃၀)ရက်နေ့ နောက်ဆုံးထား၍ ထည့်ဝင်လှူဒါန်းကြရန်နှင့် ‘ဝ’ အမျိုးသမီးအစည်းအရုံးတိုက်ရိုက်လှူဒါန်းနိုင်ကြောင်းလည်း ကြေညာထားသည်ကို တွေ့ရသည်။
“ဒီအလှူငွေတွေကို ဧပြီလ (၃၀)ရက်နေ့ နောက်ဆုံးထားပြီး ထည့်ဝင်ကြဖို့ ပြောထားတာပါ။ အလှူငွေကို ဘယ်ကို ဘယ်လို ခွဲဝေ ပို့မယ်ဆိုတာကိုတော့ အသေးစိတ် ကျွန်တော် မသိရသေးပါဘူး”ဟု ဦးညီရန်းက ဆိုသည်။
မတ်လ (၂၈)ရက်နေ့က စစ်ကိုင်းကို အခြေပြု၍ လှုပ်ခတ်ခဲ့သည့် ပြင်းအား ၇ ဒဿမ ၇ ရစ်ချ်တာစကေးရှိသည့် အင်အားပြင်းငလျင်ကြောင့် ဒေသအများအပြားတွင် ထိခိုက်ပျက်စီး သေဆုံးဒဏ်ရာရမှု အများအပြား ဖြစ်ပွားခဲ့ခြင်းဖြစ်သည်။
ယင်းနေ့မှာပင် UWSA က ငလျင်ဘေးသင့်ဒေသများရှိ ပြည်သူအတွက် ဝမ်းနည်းကြောင်း သဝဏ်လွှာနှင့်အတူ ငွေကျပ်သန်းနှစ်ထောင် ကူညီလှူဒါန်းမည်ဟု ထုတ်ပြန်ခဲ့ခြင်းဖြစ်သည်။
ယင်းအပြင် ညီနောင်သုံးဖွဲ့ဖြစ်သည့် MNDAA၊ AA နှင့် TNLA တို့ကလည်း ငလျင်ဘေးသင့်ပြည်သူများအတွက် လိုအပ်သည့် ကူညီမှုများ လုပ်ဆောင်မည်ဟု ကြေညာသည့်နည်းတူ MNDAA ကလည်း သင်္ကြန်ကျင်းပရန် ပြင်ဆင်နေမှုများကို ဖျက်သိမ်းကာ ငလျင်ဘေးကြောင့် ဆေးကုသမှုခံယူရန်လိုအပ်သူများ လားရှိုးဆေးရုံတွင် အခမဲ့လာရောက်ကုသနိုင်ကြောင်း ကြေညာထားသည်။
အလားတူ ကရင်နီပြည် IEC က ငလျင်ဘေးသင့်ပြည်သူများ ကရင်နီပြည်တွင် လာရောက်ခိုလှုံနိုင်ကြောင်း ဖိတ်ခေါ်ကာ NDAA က ငလျင်ဘေးသင့်ကူညီရေး ရန်ပုံငွေရှာဖွေနေကာ RCSS ကလည်း တတ်နိုင်သမျှ ကူညီမည်ဟု ဆိုသည်။
အမျိုးသားညီညွတ်ရေးအစိုးရ (NUG) က ငလျင်ဘေးသင့်ပြည်သူများအား ကူညီကယ်ဆယ်ရေးလုပ်ကြရန် PDF တပ်ဖွဲ့များကို ညွှန်ကြားကာ နှစ်ပတ်ကြာ ထိုးစစ်ရပ်ကြောင်း ကြေညာပြီး စစ်ကောင်စီနယ်မြေများတွင် လုံခြုံရေး အာမခံချက်ပေးပါက ကူညီမည်ဟု ကမ်းလှမ်းသည်ကို တွေ့ရသည်။
ငလျင်ဒဏ်ကြောင့် စစ်ကိုင်း၊ မန္တလေး၊ ရှမ်းပြည်တောင်ပိုင်းနှင့် တစ်နိုင်ငံလုံးအတိုင်းအတာအရ သေဆုံးသူ (၁၇၀၀)ဦး၊ ဒဏ်ရာရ(၃၄၀၀)ဦးနှင့် ပျောက်ဆုံး(၃၀၀)ဦးရှိကြောင်း စစ်ကောင်စီက မတ်လ (၃၀)ရက်နေ့တွင် ထုတ်ပြန်ထားပြီး မြေပြင်တွင် ရှာဖွေကယ်ဆယ်ရေး မလုံမလောက်ဖြစ်နေကာ ယင်းထက်ပိုများနိုင်သည်ဟု မြေပြင်တွင် ကူညီနေကြသူများက ခန့်မှန်းထားသည်။
မတ်လ (၂၈)ရက်နေ့ ငလျင်လှုပ်သည့်နေ့မှာပင် စစ်ကောင်စီက ငလျင်ဒဏ်ခံရသည့် ဒေသအားလုံးအား အရေးပေါ်အခြေအနေကြေညာလိုက်ပြီး နိုင်ငံတကာအကူအညီများ တောင်းခံထားခြင်းဖြစ်သည်။
