ရှမ်းပြည်နယ်အရှေ့ပိုင်းဒေသအတွင်း KTV များကို စစ်ဆေးပြီး လိုင်စင်မရှိဘဲ ဖွင့်လှစ်သည့် ဆိုင်များကို အရေးယူသွားရန် ညွှန်ကြားထားကြောင်း သိရသည်။
ရှမ်းပြည်နယ်အရှေ့ပိုင်းဒေသအတွင်း ကျိုင်းတုံ၊ တာချီလိတ်၊ မိုင်းယောင်း၊ မိုင်းဆတ်စသည့် ခရိုင်အတွင်းရှိ မြို့များတွင် ဖွင့်လှစ်ထားရှိသော KTV များတွင် လိုင်စင်ရှိထားသည့် ဆိုင်များရှိသလို လိုင်စင်မရှိဘဲ ဖွင့်လှစ်နေသည်များလည်း ရှိနေ၍ စစ်ဆေးပြီး အရေးယူရန် ဒုတိယပြည်နယ်အုပ်ချုပ်ရေးမှူး ဦးဇော်လွင်ဦး က ညွှန်ကြားထားခြင်း ဖြစ်ကြောင်း သိရသည်။
"ကျိုင်းတုံမြို့နယ်ထဲက KTV တွေကိုလည်း စစ်ဆေးဖို့ ညွှန်ကြားထားပါတယ်။ အဓိက ကတော့ ကျိုင်းတုံနဲ့တာချီလိတ်ပေါ့။ လိုင်စင်လျှောက်ထားဆဲ နဲ့ လျှောက်ထားခြင်း မရှိတဲ့ ဆိုင်တွေကို အရေးယူဖို့ ညွန်ကြားထားတယ်။ ရှမ်း(ရှေ့)ထဲက မြို့နယ်တွေလည်း ဒီပတ်ထဲ KTV တွေကို စစ်ဆေးတာ ခေါ်ယူတွေ့ဆုံတာမျိုး လုပ်ကြလိမ့်မယ်"ဟု ကျိုင်းတုံမြို့နယ်အဆင့် တာဝန်ရှိသူ တစ်ဦးက Tachileik News Agency သို့ ဖေဖော်ဝါရီလ(၂၀)ရက်နေ့တွင် ပြောသည်။
ရှမ်းပြည်နယ်အရှေ့ပိုင်းဒေသအတွင်း မြို့များအနက် မြို့ကြီး (၂)မြို့ဖြစ်သည့် တာချီလိတ် နှင့် ကျိုင်းတုံတို့တွင် တာချီလိတ်မြို့တစ်ခုတည်းတွင် KTV အများဆုံး ဖွင့်လှစ်ထားခြင်းဖြစ်ပြီး လိုင်စစ်ရှိ ဆိုင်အရေအတွက် နှင့် လိုင်စင်လျှောက်ထားဆဲ ဆိုင်အရေအတွက် အပါအဝင် လိုင်စင်မရှိဘဲ ဖွင့်လှစ်ထားသည့် ဆိုင်အရေအတွက်များကို တင်ပြရမည်ဖြစ်ကြောင်း သိရသည်။
