ပဲခူးတိုင်း တောင်ငူခရိုင် ဖြူးမြို့နယ်အတွင်း စစ်ကောင်စီစစ်ကြောင်းနှင့် အထိုင်စခန်းများကို ၂၀၂၄ ခုနှစ် ဒီဇင်ဘာလ နောက်ဆုံးအပတ်အတွင်း၌ ဒရုန်းဖြင့် ဗုံးသီးများ ကြဲချတိုက်ခိုက်ကြောင်း ဖြူးမြို့နယ် ပြည်သူ့ကာကွယ်ရေးအဖွဲ့ ထံမှ သိရသည်။
၂၀၂၄ ခုနှစ် ဒီဇင်ဘာလ (၂၆) ရက်နေ့တွင် အုတ်တွင်းမြို့နယ် ညောင်ခြေထောက်မြို့ အရှေ့ဘက် သရက်ကုန်းကျေးရွာရှိ စစ်ကောင်စီစစ်ကြောင်းအား ပြည်သူ့ကာကွယ်ရေးတပ်ဖွဲ့များက နံနက် (၁၁) နာရီ ၊ နေ့လယ် (၁)နာရီခွဲနှင့် ညနေ (၅)နာရီခွဲတို့တွင် ဒရုန်းဖြင့် 1 Kg ဗုံးသီး တစ်လုံးစီဖြင့် စုစုပေါင်း (၃)လုံး ကြဲချ တိုက်ခိုက်ခဲ့ကြောင်း သိရသည်။
ဖြူးမြို့နယ် ဇေယျဝတီမြို့ အရှေ့ဘက် သရက်ကုန်းကျေးရွာနှင့် နောခင်ကျေးရွာကြားရှိ သုဿန်တွင် စစ်ကြောင်းထိုးဝင်ရောက်နေသည့် စစ်ကောင်စီတပ်ဖွဲ့ဝင်များကိုလည်း ဒီဇင်ဘာလ (၂၇) ရက်နေ့ နေ့လယ် (၁၂)နာရီ ဝန်းကျင်တွင် ဖြူးမြို့နယ် ပကဖ ဒရုန်းတပ်ဖွဲ့မှ ဒရုန်းဖြင့် 1 Kg ဗုံးသီး (၂)လုံး ကြဲချတိုက်ခိုက်ခဲ့ကြောင်း သိရသည်။
ဒီဇင်ဘာလ (၂၈) ရက်နေ့တွင် ဇေယျဝတီမြို့ အရှေ့ဘက် နှောခင်ရွာသို့ ၀င်ရောက်နေသည့် စစ်ကောင်စီတပ်ဖွဲ့ဝင်များအား ပြည်သူ့ကာကွယ်ရေးပူးပေါင်းတပ်ဖွဲ့များက ဒရုန်းဖြင့် 1 Kg ဗုံးသီး (၈)လုံးကို အချိန်(၄)ချိန်ခွဲ၍ ကြဲချတိုက်ခိုက်ခဲ့ကြောင်း သိရသည်။
ထို့အပြင် ဒီဇင်ဘာလ (၃၁) ရက်နေ့တွင် ဇေယျဝတီမြို့ အရှေ့ဘက် ကြူအင်းကျေးရွာထိပ်၌ တပ်စွဲထားသည့် စစ်ကောင်စီတပ်များအား ဖြူးမြို့နယ် ပကဖ ဒရုန်းတပ်ဖွဲ့မှ ထိုနေ့ နေ့လယ် (၂) နာရီနှင့် ညနေ (၃) နာရီတို့တွင် ဒရုန်းဖြင့် 1 Kg ဗုံးသီး (၂) လုံးဖြင့် ကြဲချတိုက်ခိုက်ခဲ့ကြောင်း သိရသည်။
အဆိုပါ တိုက်ခိုက်မှုများအတွင်း စစ်ကောင်စီတပ်ဖွဲ့ဝင် (၁၅) ဦး သေဆုံးသည်ဟု ထုတ်ပြန်ချက်တွင် ဖော်ပြထားသော်လည်း Tachileik News Agency အနေဖြင့် သီးခြားအတည်မပြုနိုင်ပါ။
အဆိုပါ တိုက်ခိုက်မှုများအား ဖြူးမြို့နယ် ပြည်သူ့ကာကွယ်ရေးအဖွဲ့ (ပကဖ)၊ သာယာဝတီခရိုင် (ပကဖ)၊ PDF (၃၅၀၂) တပ်ရင်း ၊ ရန်ကုန် (ပကဖ) နှင့် အုတ်တွင်း (ပကဖ)တို့ ပူးပေါင်းဆောင်ရွက်ခဲ့ခြင်းဖြစ်ကြောင်း သိရသည်။
#TachileikNewsAgency
#TNA_LE
Photo:တောင်ပိုင်းစစ်ဒေသ အတွင်းမှ ရဲဘော်များကို ဒရုန်းဖြင့် စစ်ဆင်ရေးပြုလုပ်ရန် ပြင်ဆင်နေသည်ကို တွေ့ရစဥ် (ပုံဟောင်း)
