ဧရာဝတီတိုင်း ဟင်္သာတမြို့နယ် စက်မှုအထက်တန်းကျောင်းမှ ဆရာနှင့် ဆရာမတချို့ကို ပြည်သူ့ကာကွယ်ရေးတပ်များအား ထောက်ပံ့သည်ဆိုသော စွပ်စွဲချက်ဖြင့် စစ်ကောင်စီက ၂၀၂၄ခုနှစ် ဒီဇင်ဘာလ (၁၀)ရက်နေ့တွင် ဖမ်းဆီးသွားသည်ဟု စုံစမ်းသိရှိရသည်။
ဟင်္သာတမြို့နယ် စက်မှုအထက်တန်းကျောင်းမှ ဆရာဦးကြည်ဝင်းနှင့် ဆရာမတချို့ကို ပြည်သူ့ကာကွယ်ရေးတပ်အား ထောက်ပံ့သည်ဆိုသော စွပ်စွဲချက်ဖြင့် ဖမ်းဆီးသွားပြီးနောက် ဆက်စပ်သူများအား လိုက်လံစုံစမ်းနေသည်ဟုလည်း ဒေသခံများက ဆိုသည်။
“ဖမ်းဆီးသွားတာဟုတ်တယ်။ တခြားဘာတစ်ခုမှ မသိရသေးဘူး။”ဟု ဟင်္သာတမြို့နယ်မှ ဒေသခံတစ်ဦးက Tachileik News Agency ကို ယနေ့တွင်ပြောသည်။
ဆရာနှင့် ဆရာမတချို့ ဖမ်းဆီးခံရသည့် သတင်းနှင့်ပတ်သက်ပြီး Tachileik News Agency ၏ မေးမြန်းမှုကို ဖြေကြားရန်မရှိဟု ဧရာဝတီတိုင်းပြည်သူ့ကာကွယ်ရေးအဖွဲ့-သတင်းပြန်ကြားရေးဘက်က ဆိုသည်။
“ကျနော်တို့ဘက်က ဖြေကြားဖို့ မရှိသေးပါဘူး။”ဟု ဧရာဝတီတိုင်းပြည်သူ့ကာကွယ်ရေးအဖွဲ့ သတင်းပြန်ကြားရေးမှ တာဝန်ရှိသူတစ်ဦးက Tachileik News Agency ကို ပြောသည်။
အဆိုပါကိစ္စနှင့်ပတ်သက်ပြီး ထပ်မံအတည်ပြုနိုင်ရန် ဟင်္သာတမြို့နယ် ပြည်သူ့ကာကွယ်ရေးတပ်များနှင့် ဒေသတွင်း တပ်ဖွဲ့များထံ ဆက်လက်မေးမြန်းထားပြီး သီးခြားအတည်ပြုနိုင်ရန်လည်း ကြိုးစားနေသည်။
ဧရာဝတီတိုင်းတွင် အစိုးရရုံးစိုက်ရာမြို့ဖြစ်သော ဟင်္သာတမြို့သည် ဧရာဝတီမြစ်၏ အနောက်ဘက်ကမ်းပေါ်တွင် တည်ရှိပြီး စစ်ကောင်စီထောက်ခံသူအများစု နေထိုင်ရာမြို့လည်း ဖြစ်သည်။
မြို့အတွင်း၌ ဟင်္သာတတက္ကသိုလ်၊ ဟင်္သာတကွန်ပျူတာတက္ကသိုလ်၊ ဟင်္သာတနည်းပညာတက္ကသိုလ်၊ အစိုးရအထက်တန်းကျောင်း(၆)ကျောင်းနှင့် စက်မှုအထက်တန်းကျောင်း တစ်ကျောင်းတို့ရှိသည်ဟု သိရသည်။
#TachileikNewsAgency
