ရခိုင်ပြည်နယ် အမ်းမြို့နယ်ရှိ စစ်ကောင်စီတပ်ဌာနချုပ်ကို အာရက္ခတပ်တော်(AA)နှင့် ထိုးစစ်ဆင်နေသည့် တိုက်ပွဲအတွင်း ကျောင်းသားလက်ရုံးတပ်တော် (SAF)မှ ရဲဘော်တစ်ဦး ကျဆုံးသွားကြောင်း အဆိုပါ တပ်ဖွဲ့ထံမှ သိရသည်။ 

၂၀၂၄ ခုနှစ် အောက်တိုဘာလ (၂၀)ရက်နေ့တွင် အမ်းမြို့နယ်ရှိ အနောက်ပိုင်းတိုင်းစစ်ဌာနချုပ်ကို အာရက္ခတပ်တော်(AA)နှင့်အတူ ထိုးစစ်ဆင်တိုက်ပွဲအတွင်း SAF မှ ရဲဘော်တစ်ဦး ကျဆုံးသွားခြင်းဖြစ်ကြောင်း သိရသည်။ 

SAF ၏ ယနေ့ အောက်တိုဘာလ (၂၁)ရက်နေ့ ထုတ်ပြန်ချက်တွင် မဟာမိတ်ရဲဘော်များနှင့်အတူ ရဲဝံ့စွာ တွန်းလှန်တိုက်ခိုက်၍ ဖိနှိပ်ခံလူထုလွတ်မြောက်ရေးနှင့် နိုင်ငံတော်သစ်ဆီသို့ မျက်နှာမူလျက် တော်လှန်ရေးတာဝန်များကို ထမ်းဆောင်ရင်း အသက်ပေးလှူ ကျဆုံးခဲ့သည့်အတွက် တပ်တော်အနေဖြင့် များစွာဝမ်းနည်းကြေကွဲရကြောင်း SAF က ထုတ်ပြန်ထားသည်။ 

SAF တပ်သည် AA နှင့်အတူ အမ်းမြို့နယ် တောဟိန်းတောင် ဗျူဟာကုန်းတိုက်ပွဲများတွင်လည်း ပါဝင်သည်။ 

အောက်တိုဘာလ (၇)ရက်နေ့က AA ၏ ထုတ်ပြန်ချက်တွင် အမ်းမြို့နယ်အတွင်း လက်ကျန်စခန်းများထဲမှ တစ်ခုဖြစ်သော မဲတောင်ဗျူဟာစခန်းတစ်ခုလုံးနှင့် ၎င်းအနီး ပတ်ဝန်းကျင်ရှိ ရန်သူ့စခန်းများအားလုံးကို ယင်းနေ့တွင်ပင် အပြီးသတ်သိမ်းပိုက်ရယူနိုင်ခဲ့သည်ဟု ဆိုသည်။ 

မဲတောင်ဗျူဟာကုန်းသည် အမ်း နပခ ဌာနချုပ်မှ အဖြောင့်တိုင်းလျှင် (၁၄)ကီလိုမီတာခန့်သာ ကွာဝေးသည်ဟု သိရသည်။

#TachileikNewsAgency

Photo: ကျောင်းသားလက်ရုံးတပ်တော် (ပုံဟောင်း)